Why BCCI Ban Rohit Yadav : BCCIने आधी ऑस्ट्रेलियाविरुद्ध मालिकेसाठी निवड केली, पण एक चूक भोवली; रोहित यादववर थेट 2 वर्षांची बंदी, नेमकं काय घडलं?
Why BCCI Ban Rohit Yadav : भारतीय क्रिकेटमध्ये वयाची खोटी माहिती दिल्याप्रकरणी मोठी कारवाई करण्यात आली आहे.
Why BCCI Ban Rohit Yadav : भारतीय क्रिकेटमध्ये वयाची खोटी माहिती दिल्याप्रकरणी मोठी कारवाई करण्यात आली आहे. भारतीय अंडर-19 संघाचा लेगस्पिनर रोहित यादव याच्यावर भारतीय क्रिकेट नियामक मंडळाने तब्बल दोन वर्षांची बंदी घातली आहे. वयाच्या कागदपत्रांमध्ये फेरफार केल्याचे समोर आल्यानंतर ही कारवाई करण्यात आली आहे. रोहित यादवची ऑस्ट्रेलियाविरुद्ध या महिन्यात होणाऱ्या अंडर-19 वनडे आणि मल्टी-डे मालिकेसाठी भारतीय संघात निवड झाली होती. मात्र, त्याच्या वयाबाबतचा घोटाळा समोर आल्यानंतर त्याला संघातून बाहेर करण्यात आले. क्रिकेट असोसिएशन ऑफ बंगालच्या प्री-सीझन डॉक्युमेंट तपासणीदरम्यान ही बाब उघडकीस आली.
कागदपत्रांमध्ये तब्बल 27 महिन्यांचा फरक
रोहित यादवने बंगालकडून वयोगटातील क्रिकेट खेळले आहे. CABच्या तपासणीत त्याच्या कागदपत्रांमध्ये 27 महिन्यांचा वयातील फरक आढळला. त्यानंतर ही माहिती बीसीसीआय आणि त्याच्याशी संलग्न सर्व राज्य क्रिकेट संघटनांना देण्यात आली. बीसीसीआयने रोहितवरील बंदी तात्काळ प्रभावाने लागू केली आहे. त्यामुळे ऑस्ट्रेलियाविरुद्धच्या मालिकेपूर्वीच त्याच्या अंडर-19 कारकिर्दीला मोठा धक्का बसला आहे.
भारतासाठी तीन अंडर-19 सामने
रोहित यादवने याच वर्षी जुलैमध्ये श्रीलंका दौऱ्यावर भारताच्या अंडर-19 संघाचे प्रतिनिधित्व केले होते. त्याने श्रीलंकेविरुद्ध एक युवा कसोटी आणि दोन वनडे सामने खेळले. या तीन सामन्यांमध्ये त्याने एकूण 7 विकेट्स घेतल्या होत्या. यानंतर ऑस्ट्रेलियाविरुद्धच्या मालिकेसाठीही त्याच्यावर विश्वास दाखवण्यात आला होता. मात्र, वयाबाबतच्या कागदपत्रांमधील विसंगतीमुळे त्याचे संघातील स्थान गेले आणि आता त्याच्यावर दोन वर्षांची बंदीही घालण्यात आली आहे.
STORY | BCCI hands Bengal leg-spinner Rohit Yadav 2-year ban for age fraud, CAB crackdown on 62 cricketers
— Press Trust of India (@PTI_News) September 4, 2026
The BCCI has imposed a two-year ban on Bengal leg-spinner Rohit Yadav for allegedly misrepresenting his age, weeks after he was selected in India's Under-19 squad for the… pic.twitter.com/6ycRQfMXjQ
अंडर-19 विश्वविजेत्या खेळाडूवरही कारवाई
रोहित यादवसोबतच बंगाल क्रिकेटमध्ये वयाच्या कागदपत्रांशी संबंधित प्रकरणांमध्ये 64 इतर खेळाडूंवरही कारवाई करण्यात आली आहे. यामध्ये 2022 साली भारताला अंडर-19 विश्वचषक जिंकून देणाऱ्या संघाचा भाग असलेल्या रवि कुमार याचाही समावेश आहे. डावखुरा वेगवान गोलंदाज रवि कुमारने 2022 अंडर-19 विश्वचषकात शानदार कामगिरी केली होती. त्याने स्पर्धेत सहा सामने खेळताना 10 विकेट्स घेतल्या. भारतीय गोलंदाजांमध्ये सर्वाधिक विकेट्स घेण्याच्या बाबतीत तो दुसऱ्या क्रमांकावर होता. इंग्लंडविरुद्धच्या विश्वचषकाच्या अंतिम सामन्यात तर रवि कुमारने भेदक गोलंदाजी केली. त्याने 9 षटकांत 34 धावा देत 4 विकेट्स घेत इंग्लंडच्या फलंदाजीचे कंबरडे मोडले होते.
हे ही वाचा -
महत्त्वाच्या बातम्या
