Asia Cup Team India Report Card: आशिया कप 2025 चे विजेतेपद पटकावून भारतीय संघ (Indian Cricket Team) जल्लोषात स्वदेशात परतला आहे. कर्णधार सूर्यकुमार यादव (Suryakumar Yadav) यांच्या नेतृत्वाखाली भारतीय संघाने ग्रुप स्टेज, सुपर-4 आणि अंतिम सामना असा सलग विजयांचा धडाका लावत पाकिस्तानला अंतिम फेरीत 5 गडी राखून पराभूत केलं. या सामन्यात तिलक वर्मा ‘प्लेयर ऑफ द मॅच’ ठरला. त्याने 69 धावांची नाबाद खेळी साकारली. तर, अभिषेक शर्माला त्यांच्या एकूण सात सामन्यांतील 314 धावांच्या दमदार कामगिरीसाठी ‘प्लेयर ऑफ द टूर्नामेंट’ म्हणून गौरवण्यात आले. गोलंदाजीत कुलदीप यादवने सात सामन्यांत 17 बळी घेत सर्वाधिक विकेट घेणारा खेळाडू ठरला.
सूर्यकुमार यादव (Suryakumar Yadav)
सूर्यकुमार यादवला 6 सामन्यांत फलंदाजीची संधी मिळाली. यूएईविरुद्धच्या सामन्यात लक्ष्य लहान असल्याने तो 7 धावांवर नाबाद राहिला. पाकिस्तानविरुद्धच्या सुपर-4 सामन्यात त्याने 47 धावांची खेळी केली, मात्र उर्वरित चार डावांत मिळून फक्त 18 धावा करू शकला. अंतिम सामन्यात केवळ 1 धावा करून तो माघारी परतला.
अभिषेक शर्मा (Abhishek Sharma)
अभिषेक शर्माने या स्पर्धेत सात सामन्यांत 314 धावा केल्या. तो या स्पर्धेत सर्वाधिक धावा करणारा खेळाडू ठरला. त्याने सुपर-4 मधील सर्व तीन सामन्यांत अर्धशतकं झळकावली. पाकिस्तानविरुद्ध 74, बांगलादेशविरुद्ध 75, श्रीलंकेविरुद्ध 61, अशा धावा त्याने केल्या. अंतिम सामन्यात तो फक्त 5 धावांवर बाद झाला असला तरी, संपूर्ण स्पर्धेत त्याची कामगिरी चमकदार ठरली.
हार्दिक पांड्या (Hardik Pandya)
अनुभवी अष्टपैलू हार्दिक पांड्याने चांगली गोलंदाजी करत प्रतिस्पर्ध्यांवर दबाव टाकला, मात्र फलंदाजीत त्याची कामगिरी निराशाजनक ठरली. त्याला दुखापत झाली असल्याने तो अंतिम सामना खेळू शकला नाही. त्याआधीच्या चार डावांत त्याने केवळ 48 धावा केल्या.
वरुण चक्रवर्ती (Varun Chakaravarthy)
वरुण चक्रवर्तीने 6 सामन्यांत 7 बळी घेतले. जरी विकेटसंख्या फारशी मोठी नव्हती, तरीही त्याच्या अचूक गोलंदाजीने महत्त्वपूर्ण प्रभाव टाकला. श्रीलंकेविरुद्ध त्याने सर्वाधिक 31 धावा दिल्या होत्या. या स्पर्धेदरम्यान तो जगातील नंबर-1 टी 20 गोलंदाज बनला.
तिलक वर्मा (Tilak Varma)
तिलक वर्माने फक्त अंतिम सामन्यातच अर्धशतक झळकावले (नाबाद 69). श्रीलंकेविरुद्ध 49 धावा नाबाद, तर सुपर-4 मध्ये पाकिस्तानविरुद्ध 30 धावा केल्या. एकूण 6 डावांत त्याने 213 धावा केल्या.
कुलदीप यादव (Kuldeep Yadav)
कुलदीप यादवने आपल्या फिरकीने प्रतिस्पर्ध्यांना अक्षरशः अडचणीत आणलं. त्याने एशिया कप 2025 च्या पहिल्या सामन्यात आणि अंतिम सामन्यात 4-4 विकेट्स घेतल्या. सात सामन्यांत एकूण 17 बळी घेत त्याने स्पर्धेतील सर्वाधिक यशस्वी गोलंदाज होण्याचा मान पटकावला.
जसप्रीत बुमराह (Jasprit Bumrah)
बुमराहने 5 सामन्यांत 7 विकेट्स घेतल्या. पाकिस्तानविरुद्ध तीन, बांगलादेश आणि यूएईविरुद्ध प्रत्येकी एक सामना खेळला. अंतिम सामन्यात बुमराहने 25 धावांत 2 विकेट्स घेत प्रभावी भूमिका बजावली.
शुभमन गिल (Shubman Gill)
शुभमन गिलवर या स्पर्धेपूर्वी अनेक प्रश्न उपस्थित करण्यात आले होते. अनेक फॅन्सना श्रेयस अय्यरला संघात पाहायचं होतं. मात्र गिलने सातही सामने खेळले. सर्वात मोठी खेळी त्याने पाकिस्तानविरुद्ध सुपर-4 मध्ये 47 धावांची केली. मात्र उर्वरित सामन्यांत फारशी चमक दाखवू शकला नाही. एकूण 127 धावा त्याच्या खात्यात जमा झाल्या.
आणखी वाचा