Asia Boxing Championship : गतविजेत्या अमित पंघालनं (Amit Panghal) (52 किलो) कझाकस्तानच्या साकन बिबोसिनोववर मात करत आज शुक्रवारी येथे आशियाई बॉक्सिंग चँपियनशिपच्या (Asia Boxing Championship : ) अंतिम फेरीत प्रवेश केला आहे. पंघल सलग दुसऱ्यांदा या स्पर्धेच्या अंतिम फेरीत पोहोचला आहे. अव्वल मानांकित अमित पंघालनं बिबोसिनोवचा 5-0 असा पराभव केला. कझाकस्तानचा बिबोसिनोव हा जागतिक स्पर्धेत कांस्यपदकाचा मानकरी ठरला आहे. पंघलनं 2019 विश्व चॅम्पियनशिपच्या सेमीफायनलमध्ये देखील साकेनला हरवलं होतं.
तिसऱ्या मानांकित बिबोसिनोवने खेळात लवकर आक्रमकता दाखवली. मात्र पंघलनं चतुराईनं खेळत त्याला वरचढ होऊच दिलं नाही. त्याला अखेर 5-0 नं हरवत पंघालनं फाय़नलचं तिकीट मिळवलं. फायनलमध्ये त्याचा सामना मंगोलियाच्या ओरखोनटुंगालाग उनूबोल्ड सोबत होणार आहे. त्याने सेमीफायनलमध्ये उजबेकिस्तानच्या मिजार्खेदोव नोदीरजोनला पराभूत केलं आहे.
आजच्या विजयासह पंघालनं आपल्यासाठी किमान रजतपदक निश्चित केलं आहे.