एबीपी माझाचे क्रीडा प्रतिनिधी विजय साळवी यांना २०२६चा राजरत्न पुरस्कार घोषित
Vijay Salvi : एबीपी माझाचे क्रीडा प्रतिनिधी विजय साळवी यांना पत्रकारितेमधील योगदानासाठी 2026 या वर्षाचा श्रीमंत राजे रघुजी राजे भोंसले (प्रथम) स्मृती राजरत्न पुरस्कार जाहीर झाला आहे.
नागपूर: एबीपी माझाचे क्रीडा प्रतिनिधी विजय साळवी यांना पत्रकारितेतल्या योगदानासाठी 2026 या वर्षासाठीचा श्रीमंत राजे रघुजी राजे भोंसले (प्रथम) स्मृती राजरत्न पुरस्कार जाहीर झाला आहे.
सेनासाहेब सुभा आणि हिंदवी स्वराज्य विस्तारक श्रीमंत राजे रघुजी महाराज भोंसले (प्रथम) यांच्या जयंती आणि पुण्यतिथी निमित्तानं दरवर्षी 14 फेब्रुवारी रोजी या पुरस्कारांचं वितरण करण्यात येतं. भोंसले प्रतिष्ठान आणि महाराजा ऑफ नागपूर ट्रस्टच्या वतीनं 2026 सालासाठीच्या राजरत्न पुरस्कारांची आज घोषणा करण्यात आली. राजरत्न पुरस्कार समितीचे अध्यक्ष आणि नागपूर महाराज राजे मुधोजी भोंसले यांनी पत्रकार परिषदेत ही घोषणा केली.
2026 या वर्षासाठी पत्रकारिता क्षेत्रात एबीपी माझाचे क्रीडा प्रतिनिधी विजय साळवी यांना, इतिहास आणि साहित्य क्षेत्रात नागपूरच्या प्रा. विजया मारोतकर यांना, क्रीडाक्षेत्रात पुण्याच्या सागर कांबळे यांना, संगीत आणि वादन या सांस्कृतिक क्षेत्रात नागपूरच्या डॉ. संगीता राऊत यांना, पत्रकारिता क्षेत्रात नागपूरचे छायाचित्रकार विनय शुक्ला यांना, वैशिष्ट्यपूर्ण कार्यासाठी यवतमाळच्या संदीप शिंदे यांना आणि 18 वर्षांखालील वयोगटात वैशिष्ट्यपूर्ण कार्यक्षेत्रात नागपूरच्या मधुरा राजेश मेहेर यांना, क्रीडाक्षेत्रात नागपूरच्या क्रिशा रितेश सोनी नागपूर यांना राजरत्न पुरस्कार जाहीर झाला आहे.
या कार्यक्रमाच्या अध्यक्षस्थानी श्री स्वामी समर्थ सेवा आणि आध्यात्मिक विकास महामार्ग दिंडोरी, अखिल भारतीय श्री स्वामी समर्थ गुरुपीठ त्रंबकेश्वरचे गुरुमाऊली अण्णासाहेब मोरे असतील. मुख्यमंत्री देवेंद्र फडणवीस, केंद्रीय मंत्री नितीन गडकरी, मध्य प्रदेशच्या कॅबिनेट मंत्री संपत्तीया उईके आणि भोसले प्रतिष्ठानचे अध्यक्ष राजे रघुजी भोंसले (पंचम) हेही या सोहळ्याला उपस्थित राहतील.
महत्त्वाच्या बातम्या
