श्रीदेवींच्या अंत्यदर्शनासाठी सलमान मध्यरात्री कपूर कुटुंबीयांच्या निवासस्थानी

चाहत्यांनी श्रीदेवी यांच्या अंतिम दर्शनासाठी मोठी गर्दी केली आहे. श्रीदेवी यांना अखेरचा निरोप देण्यासाठी देशभरातून लाखो चाहते मुंबईत दाखल झाले आहेत.

मुंबईतील विलेपार्ले येथील पवनहंस परिसरातील स्मशानभूमीत त्यांच्यावर अंतिम संस्कार केले जातील. त्याआधी अंधेरी येथील सेलिब्रेशन स्पोर्ट्स क्लबमध्ये श्रीदेवी यांच्या चाहत्यांना त्यांचं अंतिम दर्शन घेता येईल.

श्रीदेवी यांच्या मृत्यूमागील कारणांबाबतची चौकशी पूर्ण झाल्यानंतर काल दुपारी त्यांचं पार्थिव कुटुंबीयांकडे सुपूर्द करण्यात आलं. आज दुपारी साडेतीन वाजता त्यांच्यावर अंत्यसंस्कार करण्यात येतील.

सलमान खानने श्रीदेवी यांच्यासोबत दोन सिनेमांमध्ये काम केलं आहे. ज्यामध्ये 1993 साली आलेला ‘चंद्रमुखी’ आणि 1994 सालचा ‘चांद का टुकडा’ यांचा समावेश आहे.

अभिनेता सलमान खाननेही श्रीदेवींच्या अंत्यदर्शनासाठी कपूर कुटुंबीयांच्या निवासस्थानी मध्यरात्री धाव घेतली. यावेळी सिनेनिर्माते रमेश तौरानीही त्याच्यासोबत होते.

अभिनेत्री श्रीदेवींचं पार्थिव मुंबईतील त्यांच्या निवासस्थानी दाखल होताच कपूर कुटुंबीयांच्या सांत्वनासाठी बॉलिवूड सेलिब्रिटींनी हजेरी लावली.