Wrestler Divya Kakran Divorce : सायना नेहवालनंतर आणखी एका स्टार खेळाडूचा संसार मोडला; लग्नानंतर फक्त दोनच वर्षांत घेतला घटस्फोट

Wrestler Divya Kakran Divorce News : काही दिवसांपूर्वीच भारतीय बॅडमिंटन स्टार सायना नेहवालच्या घटस्फोटाच्या बातमीने सगळ्यांनाच धक्का बसला होता.

Wrestler Divya Kakran Divorce

काही दिवसांपूर्वीच भारतीय बॅडमिंटन स्टार सायना नेहवालच्या घटस्फोटाच्या बातमीने सगळ्यांनाच धक्का बसला होता. सायनाने लग्नानंतर सात वर्षांनी पती पारुपल्ली कश्यपपासून वेगळं होण्याचा निर्णय घेतला होता. आता प्रसिद्ध महिला कुस्तीपटू दिव्या काकरन हिनेही तिच्या वैवाहिक आयुष्यात मोठा निर्णय घेतला आहे.

दिव्या काकरन हिचं लग्न 2023 साली सचिन प्रताप सिंग याच्याशी झालं होतं. त्यावेळी तिचं वय केवळ 25 वर्ष होतं. आता अवघ्या दोन वर्षांतच तिचा घटस्फोट झाला आहे. स्वतः दिव्यानं ही माहिती एका भावनिक सोशल मीडिया पोस्टद्वारे दिली आहे.

या पोस्टमध्ये दिव्याने लिहिलं आहे की, “हे माझ्या आयुष्यातलं सर्वात कठीण टप्पं आहे. पण अशा काही गोष्टी समोर आल्या, ज्यांची कल्पनाही मी पूर्वी कधी केली नव्हती. ही गोष्ट मी सहजासहजी शेअर करू शकत नाही. पण मला वाटलं की लोकांनी हे जाणून घ्यायला हवं.”

दिव्याने आपल्या पोस्टमध्ये चाहत्यांच्या पाठिंब्याबद्दलही लिहिलं आहे की, “तुमचा पाठिंबा माझ्यासाठी खूप मोलाचा आहे. आता मी या सगळ्यांतून बाहेर पडण्याचा प्रयत्न करते आहे. मी नव्याने सुरुवात करत आहे. आयुष्यात काही वळणं अशी येतात, ज्यांची कल्पनाही आपण करत नाही.”

तिनं असंही नमूद केलं की, “या प्रवासातून मी खूप काही शिकते आहे. हे सगळं होईल असं कधीच वाटलं नव्हतं...”

दिव्या काकरन सोशल मीडियावरही सक्रीय असते. ती आपले ट्रेनिंगचे व्हिडीओ आणि कुस्तीशी संबंधित अपडेट्स वेळोवेळी शेअर करत असते.

उत्तर प्रदेशमधील मुजफ्फरनगर येथे जन्म झालेल्या दिव्या काकरन सध्या 27 वर्षांची आहे. तिने नोएडामधून शिक्षण पूर्ण केलं असून सध्या इंडियन रेल्वेमध्ये कार्यरत आहे. तिनं 2020 मध्ये नवी दिल्लीत आणि 2021 मध्ये अलमाटी (कझाकिस्तान) येथे झालेल्या एशियन चॅम्पियनशिपमध्ये सुवर्णपदक जिंकलं आहे.