Ind vs NZ Champions trophy 2025: न्यूझीलंडने सगळी अस्त्रं वापरली, हवेत उडून फिल्डिंग, टिच्चून बॉलिंग, क्षेत्ररक्षणाची अभेद्य तटबंदी; पण टीम इंडियाच्या वाघांनी चॅम्पियन्स ट्रॉफीची फायनल जिंकलीच

Ind vs NZ Champions trophy 2025: टीम इंडियाने चॅम्पियन्स ट्रॉफीच्या अंतिम सामन्यात उत्कृष्ट सांघिक कामगिरी करत न्यूझीलंडचा पराभव केला. रोहित शर्मा, के.एल राहुल, श्रेयस अय्यर यांची निर्णायक खेळी

Ind vs NZ Champions trophy 2025

भारतीय क्रिकेट संघाने रविवारी दुबईत पार पडलेल्या चॅम्पियन्स ट्रॉफीच्या अंतिम सामन्यात न्यूझीलंडचा चार गडी राखून पराभव केला. 49 व्या षटकापर्यंत गेलेला हा सामना अत्यंत रंगतदार झाला होता. भारतीय संघाने तब्बल 12 वर्षांनी चॅम्पियन्स ट्रॉफीवर आपले नाव कोरले आहे.

न्यूझीलंडने प्रथम फलंदाजी करताना भारतासमोर विजयासाठी 252 धावांचे लक्ष्य ठेवले होते. या आव्हानाचा पाठलाग करण्यासाठी मैदानात उतरलेल्या भारतीय संघाची सुरुवात तुफानी झाली. रोहित शर्मा आणि शुभमन गिल यांनी शतकी भागीदारी केली. मात्र, 100 धावांची वेस ओलांडल्यानंतर शुभमन गिल, रोहित शर्मा आणि विराट कोहली हे झटपट बाद झाल्याने भारतीय संघ संकटात सापडला होता.

विराट कोहली एकही धाव न करता माघारी परतला. ब्रेसवेलच्या गोलंदाजीवर तो पहिल्याच चेंडूवर आऊट झाला. तो बाद झाल्यानंतर भारतीय ड्रेसिंग रुममध्ये सन्नाना पसरला होता. भारतीय संघ पुन्हा एकदा हाराकिरी करुन हातातला सामना हारणार का, अशी शंकेची पाल क्रीडारसिकांच्या मनात चमकून गेली.

मात्र, भारतीय संघाने संपूर्ण चॅम्पियन्स ट्रॉफीत प्रोफेशनल खेळ केला होता. त्याचाच प्रत्यय कालच्या सामन्यात आला. विराट कोहली आणि रोहित शर्मा हे दोन प्रमुख आधारस्तंभ ढासळल्यानंतर इतर खेळाडून गांगरुन गेले नाहीत. लहान भागीदाऱ्या करुन टीम इंडियाने लक्ष्याच्या दिशेने आगेकूच केली आणि विजय प्राप्त केला

सुरुवातीला रोहित शर्माने तुफानी फटकेबाजी केली. रोहित शर्मा याने 83 चेंडूत 76 धावा केल्या. त्याने सात चौकार आणि तीन षटकार मारले. तर सलामीवीर शुभमन गिल यानेही त्याला चांगली साथ दिली. शुभमन गिलही चांगली फटकेबाजी करण्याच्या बेतात होता. मात्र, न्यूझीलंडच्या ग्लेन फिलिप्सने हवेत सूर मारून शुभम गिलचा अप्रतिम झेल पकडला.

भारताचे तीन गडी बाद झाल्यानंतर जवळपास सहा ते सातच्या आसपास असलेला रनरेट एकदम कमी झाला. न्यूझीलंडच्या सँटनर, ब्रेसवेल आणि रचीन रविंद्र या फिरकी गोलंदाजांनी भारतीय खेळाडूंना अडचणीत आणले. त्यामुळे भारतीय संघाचा रनरेट प्रचंड मंदावला. त्यामुळे भारतीय संघ पराभूत होणार का, अशी शंका निर्माण झाली होती.

ग्लेन फिलिप्सने हवेत सूर मारत शुभमन गिलचा अविश्वसनीय झेल पकडला आणि भारतीय संघाच्या डावाला पहिले खिंडार पडले

एकीकडे न्यूझीलंडच्या गोलंदाजांकडून होणारा टिच्चून मारा आणि क्षेत्ररक्षणाची अभेद्य तटबंदी असतानाही श्रेयस अय्यर, अक्षर पटेल, के.एल. राहुल आणि हार्दिक पांड्या यांनी लहान धावसंख्या आणि भागीदारी करुन भारतीय संघाला विजयाच्या समीप नेले.

श्रेयस अय्यर याने 48 धावा केल्या. त्याने अक्षर पटेलच्या साथीने 50 धावांची निर्णायक भागीदारी केली. मात्र, मोक्याच्या क्षणी फटकेबाजी करण्याच्या नादात तो बाद झाला.

श्रेयस अय्यर बाद झाल्यानंतर के.एल. राहुल मैदानात आला. त्याने अक्षर पटेलच्या साथीने भारतीय संघाचा डाव पुढे नेला. मात्र, काही धावा बाकी असताना अक्षर पटेलही फटकेबाजीच्या नादात बाद झाला.

त्यानंतर आलेल्या हार्दिक पंड्याने त्याच्या शैलीत फटकेबाजी सुरु केली. हार्दिकच्या तुफान फलंदाजीमुळे भारतीय संघासाठी आव्हान एकदम सोपे झाले. 18 चेंडूत 12 धावा असे समीकरण हार्दिकने करुन ठेवले. मात्र, त्यानंतर तो फटकेबाजीच्या नादात बाद झाला.

त्यानंतर भारताचा अनुभवी खेळाडू रवींद्र जाडेजा मैदानात आला. केएल राहुल आणि जडेजा यांनी भारताचा विजय निश्चित केला. रवींद्र जाडेजा याने विजयी चौकार मारत भारतीय संघाच्या विजयावर शिक्कामोर्तब केले.