MS Dhoni IPL 2026 : 2 आठवड्यांत परतेन म्हणणारा धोनी अजूनही बाहेरच; आता लखनऊचं तिकीट बुक, कमबॅकच्या चर्चांनी चाहते भावूक

LSG vs CSK IPL 2026 : आयपीएल 2026 मध्ये प्रत्येक सामन्यासोबत एकच प्रश्न अधिक चर्चेत येतोय, अखेर महेंद्रसिंह धोनी मैदानावर परतणार तरी कधी?

MS Dhoni IPL 2026

आयपीएल 2026 मध्ये प्रत्येक सामन्यासोबत एकच प्रश्न अधिक चर्चेत येतोय, अखेर महेंद्रसिंह धोनी मैदानावर परतणार तरी कधी?

MS धोनी यंदाच्या संपूर्ण हंगामात अद्याप एकही सामना खेळलेले नाहीत, पण आता चाहत्यांसाठी मोठी आनंदाची बातमी समोर आली आहे.

धोनीचे लखनऊला जाण्याचे तिकीट बुक झाल्याची माहिती समोर आल्याने त्यांच्या पुनरागमनाच्या चर्चांना पुन्हा हवा मिळाली आहे.

हंगाम सुरू होण्यापूर्वी पिंडरीच्या दुखापतीमुळे धोनी दोन आठवडे मैदानाबाहेर राहणार असल्याचे सांगितले गेले होते.

मात्र, आता महिन्याहून अधिक काळ उलटून गेला तरी माजी कर्णधार अजूनही मैदानात दिसलेले नाहीत.

सुरुवातीला त्यांनी संघासोबत अवे सामनेही गाठले नव्हते, पण नंतर हैदराबाद आणि मुंबई दौऱ्यात ते संघासोबत दिसल्याने चाहत्यांच्या आशा पुन्हा जाग्या झाल्या.

तरीही आयपीएल 2026 मध्ये चेन्नई सुपर किंग्सच्या 11 सामन्यांत धोनी प्लेइंग स्क्वॉडमध्येही दिसले नाहीत. त्यांनी चेन्नईतील घरच्या मैदानावरील सामनेसुद्धा मिस केले आहेत.

दरम्यान, क्रिकबजच्या रिपोर्टनुसार CSK कॅम्पमधून मोठे अपडेट समोर आले आहे. संघाचे CEO काशी विश्वनाथन यांनी सांगितले की, उर्वरित खेळाडूंप्रमाणेच धोनीचेही इंडिगोच्या कमर्शियल फ्लाइटचे तिकीट बुक करण्यात आले आहे. जवळपास 60 सदस्यीय CSK ताफा लखनऊला रवाना होणार असून, धोनीही या दौऱ्याचा भाग असतील अशी व्यवस्थापनाला अपेक्षा आहे.