पायाला दुखापत, वाचविण्यासाठी सर्वांची धावपळ, पण अखेर वाघिणीने जीव सोडला; डॉक्टरांचेही डोळे पाणावले

यवतमाळ जिल्ह्यामधील त्या जखमी वाघिणीचा नागपुरात उपचारापूर्वीच मृत्यू झाल्याने वन विभागात आणि वन्यप्राणी प्रेमींकडून हळहळ व्यक्त होत आहे.

Yavatmal female tiger death in nagpur

यवतमाळ जिल्ह्यामधील त्या जखमी वाघिणीचा नागपुरात उपचारापूर्वीच मृत्यू झाल्याने वन विभागात आणि वन्यप्राणी प्रेमींकडून हळहळ व्यक्त होत आहे.

यवतमाळ जिल्ह्यातील मुकुटबन वनपरिक्षेत्रातील भेंडाळा नियतक्षेत्र सावळी रोपवनामध्ये वाघिणीच्या मागच्या पायाला दुखापत झाल्याचे मंगळवारी आढळून आले होते.

वाघिणीला मागचा पाय उचलता येत नसल्याने या परिस्थितीत तिच्या जीवाला धोका असल्याने तिला उपचारासाठी ताडोबा अंधारी व्याघ्र प्रकल्पातील जलद बचाव पथकाने काल संध्याकाळी जेरबंद केले होते.

वाघिणीला रात्री उशिरा जेरबंद केल्यानंतर वन अधिकारी व कर्मचाऱ्यांनी संबंधित डॉक्टरांच्या मदतीने वाघिणीवर प्राथमिक उपचारही केले होते.

वाघिणीला जेरबंद केल्यानंतर प्राथमिक उपचार करुन तिला जखमी अवस्थेतच पुढील उपचाराकरीता नागपूर येथील गोरेवाडा वन्यप्राणी बचाव केंद्रात स्थलांतरीत करण्यात आले.

मात्र, उपचारापूर्वीच आज तिचा मृत्यू झाला, तिच्या मृत्यूनंतर तिला वाचविण्यासाठी धडपडणाऱ्या वन अधिकारी व कर्मचाऱ्यांचेही डोळे पाणावले होते. गोरेवाडा बचाव केंद्रात आज शवविच्छेदन करुन तिच्यावर अंत्यसंस्कार करण्यात आले.

दरम्यान, वाघ हा हिंस्त्र प्राणी असल्याने मानवांसोबत त्याचाल सहसा लळा लागत नाही. मात्र, जखमी वाघिणीला उपचारासाठी घेऊन जाणाऱ्या कर्मचाऱ्यांना काही क्षणातच त्या वाघिणीबद्दल आपुलकी निर्माण झाली होती.