माझी माय...बाबांच्या खुर्चीवर आई बसताच पार्थ पवारांनी हुंदका आवरला, पण शेवटी अश्रुंचा बांध फुटला, काळीज चिरणारं चित्र!

Sunetra Pawar Pledges to Uphold Ajit Pawars Legacy: अजित पवार यांचं निधन झाल्यानंतर सुनेत्रा पवार यांनी उपमुख्यमंत्रिपद स्वीकारलं. यावेळी त्यांनी अजित पवार यांचा वारसा जपण्याचे वचन दिले.

Sunetra Pawar Pledges to Uphold Ajit Pawars Legacy

28 जानेवारी 2026 रोजी अजित पवार यांचं निधन झाल्यानंतर त्यांच्या पत्नी सुनेत्रा पवार यांनी सत्तेची सु्त्रे हातात घेतली. उपमुख्यमंत्रिपदासह इतर खात्यांचा त्यांनी पदभार स्वीकारला.

31 जानेवारी 2026 रोजी सुनेत्रा पवार यांचा शपविधी कार्यक्रम लोकभवनात पार पडला. आज त्यांनी पदभार स्वीकारला.

पदभार स्वीकारताना सुनेत्रा पवारांसह चिरंजीव पार्थ पवारही भावुक झाल्याचे पाहायला मिळाले. सुनेत्रा पवार उपमुख्यमंत्रिपदाच्या खुर्चीवर बसताच पार्थ पवारांना रडू कोसळल्याचे दिसून आले.

सुनेत्रा पवारांनी उपमुख्यमंत्रिपदाचा पदभार स्वीकारला, त्याक्षणी पार्थ पवारांसह राष्ट्रवादीतील मंत्री, आमदारांसह अनेक नेतेही उपस्थित होते.

सुनेत्रा पवार यांनी यासंदर्भात समाजमाध्यमांमध्ये पोस्ट शेअर केली आहे. "आज महाराष्ट्र राज्याच्या उपमुख्यमंत्री पदाची जबाबदारी स्वीकारत असताना विश्वासाची, कर्तव्याची आणि त्यागाची जाणीव सुद्धा आहे. अजितदादांनी आयुष्यभर महाराष्ट्राच्या जनतेसाठी झटत विकासाचा जो ध्यास घेतला, तोच माझ्यासाठी मार्गदर्शक दीपस्तंभ आहे", असं सुनेत्रा पवार यांनी म्हटलं.

"अजितदादांची कार्यशैली, निर्णयक्षमता आणि लोकांशी असलेले आत्मीय नाते, हेच बळ घेऊन मी पुढील वाटचाल करणार आहे. त्यांच्या अपूर्ण स्वप्नांना पूर्णत्व देणे, शेतकरी, महिला, युवक आणि सर्वसामान्य नागरिकांच्या अपेक्षांना न्याय देणे, हीच माझी प्राथमिकता असेल", असं सुनेत्रा पवारांनी सांगितलं.

"अजितदादांची जागा कुणीच घेऊ शकत नाही; पण त्यांच्या विचारांचा वारसा जपण्याचा आणि अधिक सक्षम महाराष्ट्र घडवण्याचा प्रामाणिक प्रयत्न मी नक्की करेन", असंही सुनेत्रा पवार म्हणाल्या.

"या कठीण प्रसंगी जनतेने दिलेले प्रेम, आधार आणि विश्वास हेच माझे सामर्थ्य आहे. त्यांच्या स्मृतीपुढे आज मी एकच वचन देते की, महाराष्ट्राच्या हितासाठी निष्ठेने आणि समर्पणाने कार्य करत राहीन", असंही सुनेत्रा पवार यांनी उपमुख्यमंत्रिपदाचा पदभार स्वीकारल्यानंतर म्हटलं.