Solapur Rain News: सीना नदीला पूर; 20 ते 25 गावांचा संपर्क तुटला, शेती पिकांचं मोठं नुकसान, पुराच्या वेढ्याची दृश्यं

Solapur News: उभी पिक पाण्याखाली गेल्याने शेतकरी संकटात सापडला आहे. त्याचबरोबर विजेच्या मोटारी देखील पाण्याखाली गेल्या आहेत.

Solapur News

राज्याच्या विविध भागात सद्या मुसळधार पाऊस कोसळत आहे. नदी नाले दूथडी भरून वाहत आहेत. त्यामुळे अनेक भागात पूरस्थिती झाली आहे. सोलापूर जिल्ह्यातील माढा तालुक्यात देखील मोठा पाऊस झाला आहे.

त्याचबरोबर धाराशिव जिल्ह्यातील सीना कोळेगाव या धरणातून मोठ्या प्रमाणात पाण्याचा विसर्ग सीना नदीत सोडण्यात आला आहे. यामुळे सीना नदीला पूर आला आहे. यामुळे माढा आणि बार्शी या दोन तालुक्यातील २० ते २५ गावांचा संपर्क तुटला आहे. पुलावरून ४ ते ५ फूट पाणी वाहत आहे.

दरम्यान, सीना नदीला पूर आल्यामुळे शेतीचं प्रचंड मोठ्या प्रमाणात नुकसान झालं आहे. नदीकाठी ऊसासह केळीचे मोठे नुकसान झालं आहे. उभी पिक पाण्याखाली गेल्याने शेतकरी संकटात सापडला आहे. त्याचबरोबर विजेच्या मोटारी देखील पाण्याखाली गेल्या आहेत.

प्रशासनाने तातडीने नुकसान झालेल्या शेतकऱ्यांच्या पिकांचे तातडीने पंचनामे करावेत अशी मागणी शेतकऱ्यांनी केली आहे. त्याचबरोबर धाराशिव जिल्ह्यातील सीना कोळगाव धरणात ज्यावेळी पूरस्थिती निर्माण होते त्यावेळी सीना नदीत पाणी सोडलं जातं.

ज्यावेळी उन्हाळ्यात साधारणत: मे महिन्यात सीना नदी काठच्या शेतकऱ्यांना पाण्याची गरज असते त्यावेळी मात्र पाणी सोडलं जात नाही. त्यामुळे उन्हाळ्यात सीना कोळेगाव धरण प्रशासनाने १ टीएमसी पाणी सीना नदीत सोडावे अशी मागणी शेतकऱ्यांनी केली आहे.

अन्यथा पावसाळ्यात सीना कोळेगाव धरणाचे पाणी सीना नदीत सोडू नये, त्यांनी पर्यायी व्यवस्था करावी, अशी मागणी शेतकऱ्यांनी केली आहे.

सोलापुरात पावसाने केला कहर, सीना नदीची भयावह दृश्य ड्रोन कॅमेरात कैद झाली आहेत. मागील आठवडाभरात झालेल्या मुसळधार पावसामुळे सीना नदीला पूर आला आहे. पुरामुळे दक्षिण सोलापूर, उत्तर सोलापूर आणि मोहोळ तालुक्यातील काही गावांचा संपर्क तुटला आहे.

सीना आणि भीमा नदीवरील जवळपास 15 बंधारे पाण्याखाली गेले आहेत. उत्तर सोलापूर तालुक्यातील तिऱ्हे गावात सीना नदीचे रौद्र रूप पाहायला मिळतंय.

ड्रोन पायलट बुद्धभूषण काटे यांनी टिपलेली ही दृश्य समोर आली आहेत.