सोलापूर-पुणे महामार्गावर भीषण अपघात, टेंभुर्णीजवळ ट्रॅव्हल्स खड्यात पलटी; 30 प्रवासी जखमी, 20 जणांची प्रकृती गंभीर

ही ट्रॅव्हल्स शिरपूर लातूर येथून पुण्याकडे निघाली होती. अपघातावेळी ट्रॅव्हल्समध्ये मुख्यतः मराठवाडा आणि पुणे भागातील प्रवासी होते.

Solapur Pune Accident

सोलापूर-पुणे राष्ट्रीय महामार्गावर आज पहाटेच्या सुमारास टेंभुर्णी जवळील आढेगाव शिवारात एक प्रवासी ट्रॅव्हल्स पलटी झाली.

ट्रॅव्हल्स पलटी होऊन झालेल्या या भीषण अपघातात 30 प्रवासी जखमी झाले असून त्यापैकी 20 जणांची प्रकृती गंभीर असल्याची प्राथमिक माहिती समोर आली आहे.

ही ट्रॅव्हल्स शिरपूर लातूर येथून पुण्याकडे निघाली होती. अपघातावेळी ट्रॅव्हल्समध्ये मुख्यतः मराठवाडा आणि पुणे भागातील प्रवासी होते.

पहाटे चालकाला झोप लागल्याने ट्रॅव्हल्स रस्त्याच्या कडेला असलेल्या खड्ड्यात पलटी झाली, अशी माहिती घटनास्थळावरून मिळत आहे.

अपघाताची माहिती मिळताच स्थानिक ग्रामस्थांनी आणि पोलिसांनी घटनास्थळी धाव घेत बचावकार्य सुरू केले. जखमींना तातडीने जवळच्या रुग्णालयात दाखल करण्यात आले आहे.

जीवितहानी झाली नसली तरी ट्रॅव्हल्स पलटी झाल्याने प्रवासी मोठया प्रमाणावर जखमी झाले आहेत.

घटनास्थळावर मोठी खळबळ उडाली असून पोलीस घटनास्थळी पंचनामा करत आहेत.