मोठी बातमी! मला चक्कर येतेय, नारायण राणेंना भोवळ, थांबवलं भाषण; कालच दिले राजकीय निवृत्तीचे संकेत

भाजप नेते तथा खासदार नारायण राणे यांनी कालच आपल्या भाषणात राजकीय संन्यास घेण्याचे, राजकारणातून निवृत्त होण्याचे संकेत दिले होते. आता, वय झालंय, थांबायला हवं असे त्यांनी म्हटलं होतं.

Narayan rane Dizziness chiplun

भाजप नेते तथा खासदार नारायण राणे यांनी कालच आपल्या भाषणात राजकीय संन्यास घेण्याचे, राजकारणातून निवृत्त होण्याचे संकेत दिले होते. आता, वय झालंय, थांबायला हवं असे त्यांनी म्हटलं होतं.

महापालिका निवडणुकांच्या प्रचाराच्या अनुषंगाने नारायण राणेंनी आपल्या दोन्ही मुलांबाबत भाष्य करत, दोन्ही मुले राजकारणात सेट झाली आहेत. आता, उद्योग सांभाळायलाही कोणीतरी पाहिजे, असे म्हणत राजकीय निवृत्तीचे संकेत दिले होते.

कालच राजकीय निवृत्तीचे संकेत दिल्यानंतर चिपळूणमधील कृषी महोत्सवाच्या कार्यकमावेळी माजी मुख्यमंत्री आणि खासदार नारायण राणे यांना भोवळ आल्याने सर्वांची धावपळ उडाल्याचं पाहायला मिळालं.

आपल्या भाषणादरम्यान अखेरच्या टप्प्यात आवाजही बसल्याने राणे यांनी भाषण आटोपतं घेतलं.

विशेष म्हणजे, चक्कर आल्यासारखे वाटत असल्याने माध्यमांशी बोलण्याची राणेंनी नकार दिला. तर, या कार्यक्रमाच्या ठिकाणाहून नारायण राणे थेट गेस्ट हाऊसकडे रवाना झाले.

नारायण राणे आपल्या पत्नीसह विश्रामगृहाकडे परतले, यावेळी, मोठा बंदोबस्त त्यांच्यासमवेत होता. अनेक कार्यकर्त्यांनी त्यांची काळजी घेतली.

दरम्यान, सिंधुदुर्गातल्या सभेत बोलताना नारायण राणे म्हणाले की, "आजही नारायण राणे रस्त्यावर भाजी घेतो. हातात अंगठ्या घालून, काळ्या काचेच्या गाड्या घेऊन काही जण येतात... पण माझ्या गाडीला काळ्या काचा नाहीत.

माणुसकी हा माझा धर्म आहे. बऱ्याच जणांनी माझ्या आड येण्याचं काम केलं, त्यावर मी आज बोलणार नाही. तेव्हाही मला अडचणी आल्या, आतांही आल्या. राजकारणात कट कारस्थान केलं जातंय. त्यामुळे, आता मी ठरवलंय, घरी बसायचं. मुलांना सांगेन नांदा सौख्य भरे... चांगल्याला जोपासा." असे त्यांनी म्हटले होते.