महापौर रितू तावडेंच्या कारवरील लाल-निळे दिवे हटले; विरोधकांच्या टीकेनंतर अधिकाऱ्यांना जाग

महापौरांच्या गाडीवर लावण्यात आलेल्या लाल-निळ्या दिव्यांमुळे पुन्हा एकदा मुंबईच्या महापौर रितू तावडे चर्चेत आल्या आहेत. काही दिवसांपूर्वी महागड्या घड्याळामुळे त्यांची चर्चा होती.

Mayor Ritu tawade car remove lamp

महापौरांच्या गाडीवर लावण्यात आलेल्या लाल-निळ्या दिव्यांमुळे पुन्हा एकदा मुंबईच्या महापौर रितू तावडे चर्चेत आल्या आहेत. काही दिवसांपूर्वी महागड्या घड्याळामुळे त्यांची चर्चा होती.

केंद्र सरकारने मे 2017 मध्ये सामान्य सरकारी वाहनांवर लाल दिवा वापरण्यास बंदी घातली होती. व्हीआयपी संस्कृती कमी करण्याच्या उद्देशाने हा निर्णय घेण्यात आला होता. त्या निर्णयानंतर बहुतांश सरकारी वाहनांवरील लाल दिवे हटवण्यात आले होते.

मुंबईच्या नवनिर्वाचित महापौरांच्या नव्या वाहनावर मात्र पुन्हा लाल-निळे फ्लॅश दिवे दिसल्याने नियमांचे उल्लंघन होत असल्याची टीका विरोधकांकडून करण्यात आली.

"नवनिर्वाचित महापौरांच्या विरोधात नक्की काय चाललंय?" असा सवाल ठाकरेंच्या शिवसेनेचे आमदार मिलिंद नार्वेकर यांनी ट्विट करुन उपस्थित केला.

कधी महापौरांचे घड्याळ तर कधी गाडी तर कधी त्यांनी केलेली वक्तव्य हे चांगली चर्चेत राहतात शिवाय त्यामुळे वाद सुद्धा निर्माण होतोय. "मात्र महापौरांच्या विरोधात नक्की काय चाललंय?" अशी पोस्ट मिलिंद नार्वेकरांनी केली, भाजपच्या अंतर्गत गटबाजीकडे त्यांनी बोट दाखवल्याचे दिसून आले.

शिवसेना ठाकरे गटाच्या नगरसेविका किशोरी पेडणेकर यांनीही थेट सवाल केला. मुख्यमंत्री आणि पंतप्रधानांपेक्षा महापौर मोठ्या झाल्या का? असा हल्लाबोल त्यांनी केला होता.

दरम्यान, महापौरांच्या गाडीवरील लाल दिवे दोन दिवसांपूर्वीच काढले आहेत, असे स्पष्टीकरण महापौर कार्यालयाकडून देण्यात आलंय.

नियमांचे पालन करत हे दिवे हटवण्यात आल्याचेही अधिकाऱ्यांकडून स्पष्ट करण्यात आले. त्यामुळे, सध्या महापौरांच्या गाडीवर कोणतेही विशेष दिवे नसल्याचे सांगण्यात येत आहे.