Girish Mahajan: मंत्री गिरीश महाजनांना नदी स्वच्छता मोहिमेदरम्यान सापडली 'पिस्तूल', नाशिकमध्ये खळबळ; PHOTO

Girish Mahajan: नदी स्वच्छता मोहिमेवेळी मंत्री गिरीश महाजन यांना पिस्तूल सापडल्याने नाशिकमध्ये एकच खळबळ उडाली आहे.

Girish Mahajan

नाशिकमध्ये आयोजित करण्यात आलेल्या नदी स्वच्छता मोहिमेदरम्यान आज एक अत्यंत धक्कादायक प्रकार समोर आला आहे.

या स्वच्छता मोहिमेत स्वतः सहभागी झालेले राज्याचे मंत्री गिरीश महाजन यांना नदीच्या पात्रात थेट एक पिस्तूल सापडल्याने घटनास्थळावरील सर्वच जण अवाक झाले.

नाशिकमधील उंटवाडी परिसरातील 'नंदिनी नदी'पात्रात स्वच्छता मोहीम सुरू असताना ही घटना घडली.

नदीतील कचरा आणि गाळ काढण्याचे काम सुरू असताना तिथे एक गंजलेल्या अवस्थेतील पिस्तूल आढळून आली.

हे पिस्तूल कायदेशीर की बेकायदेशीर आहे, याबाबत अद्याप स्पष्टता नसली तरी, कुठल्यातरी अज्ञात व्यक्तीने ते नदी पात्रात फेकून दिल्याचा प्राथमिक संशय व्यक्त केला जात आहे.

नदीच्या पात्रात थेट घातक शस्त्र आढळून आल्याचे समजताच स्वच्छता मोहिमेच्या ठिकाणी तातडीने स्थानिक पोलिसांना पाचारण करण्यात आले.

माहिती मिळताच पोलीस पथक तात्काळ घटनास्थळी दाखल झाले असून, त्यांनी ते गंजलेले पिस्तूल आपल्या ताब्यात घेतले आहे.

पोलिसांनी या प्रकरणाची गंभीर दखल घेतली असून, हे पिस्तूल नेमके कोणाचे आहे आणि ते नदीत कधी व का फेकण्यात आले, याचा शोध सुरू केला आहे.

एका मंत्र्यांच्या उपस्थितीत सुरू असलेल्या मोहिमेतच शस्त्र सापडल्याने नाशिक शहरात या घटनेची जोरदार चर्चा सुरू झाली आहे.

नंदिनी नदी पात्रात शस्त्र मिळून आल्याने गुन्हेगारी पार्श्वभूमीतून हे शस्त्र तिथे नष्ट करण्याचा प्रयत्न केला गेला का, या अँगलनेही पोलीस आता सखोल तपास करत आहेत.