धाराशिव बंदची हाक, धुळे-सोलापूर महामार्गावरही रास्ता रोको; जरांगेंची प्रकृती खालावली, मराठा बांधव आक्रमक

मराठा आंदोलक मनोज जरांगे पाटील यांच्या आंदोलनाचा आज पाचवा दिवस असून सरकारच्यावतीने आज पत्रकार परिषद घेऊन आंदोलकांनी दोन पाऊल पुढे यावे असे आवाहन करण्यात आले.

maratha Dharashiv band manoj jarange patil

मराठा आंदोलक मनोज जरांगे पाटील यांच्या आंदोलनाचा आज पाचवा दिवस असून सरकारच्यावतीने आज पत्रकार परिषद घेऊन आंदोलकांनी दोन पाऊल पुढे यावे असे आवाहन करण्यात आले.

मराठा आंदोलकांनी धुळे सोलापूर महामार्ग रोखून धरला असून महाकाळा येथे आंदोलकांनी रास्ता रोको केल्याने मोठी वाहतूक कोंडी झाल्याचं दिसून आलं.

मनोज जरांगे यांच्याकडे सरकार दुर्लक्ष करत असल्याचा आरोप करत मनोज जरांगे समर्थकांनी आता आक्रमक भूमिका घ्यायला सुरुवात केली आहे.

जरांगे पाटील यांची प्रकृती खालावत चालली असताना धुळे-सोलापूर महामार्गावर रास्ता रोको करण्यात आल्याने शेकडो वाहने अडकून पडली होती. दोन्ही बाजूचा महामार्ग आंदोलकांनी आंदोलकांनी रोखला.

महामार्गावरील अंकुशनगर परिसरात मराठा आंदोलक एकवटले, एक मराठा लाख मराठा अशी घोषणाबाजी करत सरकारचा निषेध व्यक्त केला.

दरम्यान, दोन तासानंतर पोलिसांच्या हस्तक्षेपानंतर वाहतूक सुरळीत करण्यात आला असून धुळे सोलापूर महामार्ग खुला झाला आहे.

पुण्यातही मराठा बांधवानी मनोज जरांगे पाटील यांच्या समर्थनार्थ आंदोलन केले, सरकारने लवकरात लवकर मागण्या मान्य कराव्या अशी भूमिका आंदोलकांनी घेतली.

मराठा आरक्षणासाठी उपोषणाला बसलेल्या मनोज जरांगे पाटलांच्या आंदोलनाचे धाराशिवमध्ये देखील तीव्र पडसाद उमटत आहेत. गेली दोन दिवस धाराशिव मध्ये मराठा समाज बांधव रस्त्यावर येत असून आक्रमक पद्धतीने आंदोलन केले जात आहे.

सरकारकडून मनोज जरांगे पाटलांना सकारात्मक प्रतिसाद मिळत नसल्याचा आरोप करत उद्या धाराशिव बंदची हाक देण्यात आली आहे. सर्वांनी या बंदमध्ये स्वखुशीने सहभागी व्हावं असे आवाहन मराठा कार्यकर्त्यांकडून करण्यात आले आहे.

येत्या काळात सरकारने लवकर प्रतिसाद दिला नाही तर अधिक आक्रमक आंदोलन करू असा इशाराही दिला आहे. मराठा समाजाकडून पुकारण्यात आलेल्या बंदला व्यापारी संघटनांनी पाठिंबा दर्शवला आहे.