मुंबई महामार्गावर एकाच वेळी दोन ठिकाणी अपघात ; खड्ड्यांमुळे कार दुभाजकावर आदळली, दुसरी कार खोल दरीत जाता जाता बचावली

महामार्गावरील खड्ड्यांमुळे आणि रस्त्यावरील अडथळ्यांमुळे वाहनधारकांना मोठा धोका निर्माण होत असल्याचे स्थानिकांचे म्हणणे आहे.

Mumbai Goa Highway

मुंबई-गोवा महामार्गावर खेड परिसरात दोन वेगवेगळ्या ठिकाणी जवळजवळ एकाच वेळी अपघात झाल्याची घटना घडली.

सुदैवाने या अपघातांमध्ये कोणतीही जीवितहानी झाली नाही. मात्र, काही जण जखमी झाले असून त्यांच्यावर खासगी रुग्णालयात उपचार सुरू आहेत.

पहिला अपघात खेडजवळील जगबुडी नदीवरील पुलावर घडला. पुलाच्या भागात असलेल्या मोठ्या खड्ड्यांमुळे एक कार नियंत्रण सुटून मध्य दुभाजकावर आदळली.

दरम्यान, दुसरा अपघात खेडच्या भोस्तेघर परिसरात घडला. येथील एका वळणावर वेगाने येणारी कार अचानक घसरून खोल दरीच्या दिशेने जाऊ लागली. मात्र, चालकाच्या उपस्थितीमुळे आणि स्थानिकांच्या तातडीच्या मदतीमुळे मोठा अनर्थ टळला.

अपघाताची माहिती मिळताच खेड पोलिस तात्काळ घटनास्थळी दाखल झाले. त्यांनी दोन्ही ठिकाणची पाहणी करून आवश्यक ती कारवाई सुरू केली आहे.

महामार्गावरील खड्ड्यांमुळे आणि रस्त्यावरील अडथळ्यांमुळे वाहनधारकांना मोठा धोका निर्माण होत असल्याचे स्थानिकांचे म्हणणे आहे.या दोन अपघातांमुळे पुन्हा एकदा मुंबई-गोवा महामार्गावरील रस्त्यांची अवस्था आणि सुरक्षिततेचा प्रश्न ऐरणीवर आला आहे.