Ajit Pawar Funeral: दादांना अखेरचा निरोप देऊनही बारामतीकरांचा पाय निघेना, अलोट गर्दी- घोषणा, शेवटी पार्थ -जयने केलं अभिवादन

विमान लँडिगदरम्यान दुर्घटना घडली आणि अजित पवारांसह पाच जणांचा मृत्यू झाला आहे. अजित पवारांच्या निधनाने राज्यात हळहळ व्यक्त होत आहे.

Ajit Pawar Funeral

असंख्य हुंदके, हजारोंच्या मनात भावनांचा एकच कल्लोळ, सुन्न मानसिकतेत राज्याचे उपमुख्यमंत्री अजित पवार अनंतात विलीन झाले.

बारामतीतील विद्या प्रतिष्ठानमध्ये आज (29 जानेवारी) अजित दादांना शोकाकूल वातावरणात शासकीय इतमामात अखेरचा निरोप देण्यात आला.

अजित पवारांच्या पार्थिवाला त्यांचे चिरंजीव पार्थ आणि जय पवार यांनी मुखाग्नि दिला. यावेळी अवघ्या बारामतीसह राज्यात एकच सन्नाटा पसरला.

दादांचं जाणं अनेकांना अजूनही पचवणं प्रचंड जड जात आहे. जमलेल्या जनसमुदायाला मागच्या गेटने परत जाण्याची विनंती केली जात आहे.

दादांना निरोप देऊन निघून जाणं प्रत्येकाला अवघड जात आहे. रस्ते तुडुंब भरले आहेत. त्यामुळे गेटवर रेलू नका अशा सूचना दिल्या जात आहेत. पोलिसांना सहकार्य करण्याची विनंती केली जातेय.

दादांना सोडून अनेकांचं पाय निघत नाहीय. गेल्या २० तासांपासून पोलीस अधिकारी गर्दी हाताळण्याचा प्रयत्न करत आहेत. दरम्यान, पार्थ आणि जय पवार यांनी एकत्र हात जोडत जनसमुदायाला अभिवादन केलंय.

यानंतर अजित पवार अमर रहे या घोषणांनी परिसर दुमदुमला होता. लोकांच्या भावनांचा आदर करत पार्थ आणि जय पवार यांनी लोकांना हात जोडून नमस्कार केला.

राज्याचे उपमुख्यमंत्री आणि राष्ट्रवादी काँग्रेस पक्षाचे अध्यक्ष अजित पवार यांचं काल (बुधवारी, ता 28) विमान अपघातामध्ये दुर्दैवी निधन झालं आहे.

दादांचा मिश्किल अंदाज, दिलखुलासपणा, वक्तशीरपणा या सर्व गोष्टी आणि त्यांची कामाची पध्दत यामुळे ते कायमच लोकप्रिय राहिले आहेत.