Bhushan Gavai In Kolhapur: सरन्यायाधीश भूषण गवई कोल्हापुरात पोहोचताच लोकराजा राजर्षी शाहूंच्या चरणी नतमस्तक; शहरात प्रवेश करताच इंडिया आघाडी आणि कोल्हापुरवासियांकडून पुष्पवृष्टीने स्वागत

भारताचे सरन्यायाधीश भूषण गवई यांच्या हस्ते कोल्हापूरमधील सर्किट बेंचचे अधिकृत उद्घाटन होणार आहे. या कार्यक्रमाला राज्याचे मुख्यमंत्री देवेंद्र फडणवीस दोन्ही उपमुख्यमंत्री उपस्थित राहणार आहेत.

Bhushan Gavai In Kolhapur

भारताचे सरन्यायाधीश भूषण गवई यांचे करवीरनगरी कोल्हापूर विमानतळावर शनिवारी जल्लोषात स्वागत करण्यात आले.

कोल्हापूरसह संपूर्ण महाराष्ट्राला प्रतीक्षा असणाऱ्या कोल्हापूर सर्किट बेंचच्या उद्घाटनासाठी ते कोल्हापूरला आले आहेत. यावेळी मान्यवरांनी त्यांचे स्वागत केले.

आज (17 ऑगस्ट) भूषण गवई यांच्याहस्ते व मुख्यमंत्री देवेंद्र फडणवीस यांच्या प्रमुख उपस्थितीत ऐतिहासिक इमारतीमध्ये सर्किट बेंचचे उद्घाटन होणार आहे.

भूषण गवई यांचे आगमन होताच इंडिया आघाडी आणि कोल्हापूरवासियांकडून ताराराणी चौकात पुष्पवृष्टी करून स्वागत करण्यात आले.

विमानतळावरील स्वागतानंतर तसेच ताराराणी चौकातील स्वागतानंतर सरन्यायाधीशांचा ताफा थेट राजर्षी छत्रपती शाहू महाराज यांच्या समाधी स्थळाला भेट देण्यासाठी पोहोचला.

गवई यांनी राजर्षी छत्रपती शाहू महाराजांच्या समाधीस्थळाला भेट देऊन त्यांना अभिवादन केले.

गवई यांनी शाहू महाराजांच्या सामाजिक न्याय, शिक्षण आणि समानतेसाठी केलेल्या कार्याचे स्मरण करून त्यांच्या योगदानाला आदरांजली वाहिली.

समाधीस्थळी पुष्प अर्पण करून नतमस्तक होत शाहू महाराजांच्या कार्याचा गौरवही केला.

शाह समाधीस्थळी भेट दिल्यानंतर विविध क्षेत्रातील मान्यवरांनी सरन्यायाधीश भूषण गवई यांची शासकीय विश्रामगृह येथे भेट घेऊन त्यांच्याशी संवाद साधला.

विधी, सामाजिक संस्थांचे प्रतिनिधी, प्रशासन, वकील संघटनांचे प्रतिनिधी तसेच विविध क्षेत्रातील मान्यवरांनी सरन्यायाधीश भूषण गवई यांची भेट घेतली.

सर्किट बेंचसाठी 9 हेक्टर 18 आर जागा शेंडा पार्क येथे प्रस्तावित करण्यात आली आहे.

या जागेसाठी शासनाची मान्यता मिळण्याबाबतची कार्यवाही सुरु असल्याची माहिती जिल्हाधिकारी अमोल येडगे यांनी सरन्यायाधीश भूषण गवई यांना दिली.

दरम्यान सुमारे दीडशे वर्षांपूर्वी 1874 मध्ये बांधलेल्या आणि कौटुंबिक न्यायालयासाठी वापरात असलेल्या इमारतीची माहिती सरन्यायाधीश भूषण गवई यांनी घेतली.