Dharashiv: भीषण! मांजरा नदीला पुराचा वेढा, पुरात शेतकरी वाहून गेला; शोधमोहीम सुरू, घटनास्थळी आमदारांची उपस्थिती

मांजरा नदीला पूर आल्याने प्रशासनाने बजावला आहे आसपासच्या परिसरातील गावाला सतर्कतेचा इशारा देण्यात आलाय.

Dharashiv news

धाराशिव जिल्ह्यातील मांजरा नदीला आलेल्या पुरामुळे भीषण घटना घडली आहे. सुबराव शंकर लांडगे (वय 65, व्यवसाय – शेतकरी) हे नदीवरील पुलावरून जात असताना पाय घसरल्याने थेट पुराच्या पाण्यात पडले आणि वाहून गेले.

ही घटना आज सकाळी घडली असून, गेल्या तीन तासांपासून शेतकऱ्याचा शोध घेण्यासाठी प्रशासन आणि स्थानिकांनी जोरदार मोहीम हाती घेतली आहे.

घटनास्थळी भाजप आमदार राणा पाटील आणि ठाकरे गटाचे आमदार कैलास पाटील हे देखील उपस्थित राहून परिस्थितीचा आढावा घेत आहेत.

शेतकऱ्याचा शोध घेण्यासाठी NDRF ची पथक घटनास्थळी दाखल झाली आहे. त्याचबरोबर स्थानिक ग्रामस्थदेखील स्वतःच्या जीवाची पर्वा न करता पुराच्या पाण्यात उतरून शोधकार्य करत आहेत

शोधमोहीमेत आधुनिक साधनांचा वापर करण्यात येत असून, ड्रोनच्या माध्यमातून नदीच्या प्रवाहात आणि परिसरात तपास सुरू आहे.

मात्र, नदीला आलेल्या जोरदार पुरामुळे पाण्याचा प्रवाह वेगवान आणि धोकादायक झाल्याने शोधमोहीमेत अडथळे येत आहेत.

मांजरा नदीला झालेल्या पूरस्थितीमुळे प्रशासनाने परिसरातील गावकऱ्यांना सतर्कतेचा इशारा दिला आहे. नदीच्या पाण्याची पातळी वेगाने वाढत असल्याने नागरिकांना नदीकाठावर किंवा पूल परिसरात न जाण्याचे आवाहन करण्यात आले आहे.

तसेच, शेतकरी आणि नागरिकांनी आपल्या जनावरांना देखील सुरक्षित ठिकाणी हलवण्याचे निर्देश देण्यात आले आहेत.

घटनास्थळी वातावरण तणावपूर्ण असून, सुबराव लांडगे यांचा शोध लागेल या आशेने कुटुंबीय आणि गावकरी अधीर झाले आहेत.

प्रशासन, पोलिस, आणि स्थानिकांच्या संयुक्त प्रयत्नांतून शोधमोहीम सुरू असून, पाणी ओसरल्यावर शोधकार्याला आणखी गती मिळेल, अशी माहिती अधिकाऱ्यांनी दिली आहे.

या घटनेमुळे परिसरात हळहळ व्यक्त होत असून, पावसाळ्यात नदी आणि नाल्यांमधील वाढत्या पाण्यामुळे सुरक्षिततेचे नियम पाळण्याचे महत्व पुन्हा अधोरेखित झाले आहे.