भिवंडीच्या कोनगाव खाडीवर परदेशी पाहुण्यांची वर्दळ; अमेरिका अन् युरोपमधून आले सीगल पक्षी ठरताय आकर्षणाचा केंद्रबिंदू

Bhiwandi News: भिवंडीच्या कोनगाव खाडीवर परदेशी पाहुण्यांची सध्या वर्दळ बघायला मिळत आहे. यात अमेरिका अन् युरोपमधून आलेले सीगल पक्षी आकर्षणाचा केंद्रबिंदु ठरतायत

Bhiwandi News

भिवंडीच्या कोनगाव खाडीवर सध्या परदेशी पाहुण्यांची वर्दळ वाढली आहे. यात अमेरिका आणि युरोपमधून हजारो किलोमीटरचा प्रवास करून आलेले सीगल पक्षी येथे विसावले आहेत.

या पक्ष्यांचे मोहक रूप पाहण्यासाठी नागरिकांची मोठी गर्दी होत आहे. सीगल पक्ष्यांचा पांढरा शुभ्र रंग, पंखांवरील करडा छटा, लालसर काळी चोच आणि काळेभोर डोळे या वैशिष्ट्यांमुळे ते विशेष लक्ष वेधून घेतात.

हे पक्षी पाण्यात विहार करताना जणू मोत्यांची माळच पाण्यात अंथरल्याचा भास होतो. त्यामुळे अनेक लोक या पक्ष्यांना कॅमेऱ्यात बंदिस्त करण्यासाठी आणि सेल्फी काढण्यासाठी खाडीवर पोहोचत आहेत.

सीगल पक्ष्यांचे मुख्य खाद्य छोटे मासे आणि खेकडे असले तरी आता त्यांना शेव, चिवडा आणि कुरकुरे खाण्याची सवय लागली आहे.

नागरिकांनी खाडीच्या पुलावर येताच हे पक्षी उत्साहाने पुलाजवळ येऊन मनमोकळ्या वातावरणात फोटोसेशनसाठी सज्ज होतात.

सीगल पक्ष्यांच्या या हिवाळी आगमनामुळे कोनगाव खाडीवर एक वेगळाच उत्साह संचारला असून, पक्षीप्रेमी आणि छायाचित्रकारांसाठी हा एक विशेष आनंददायी अनुभव ठरत आहे.