Cook Vegetables : शिजवलेल्या की कच्च्या? भाज्यांचा जास्त फायदा कधी मिळतो?

Cook Vegetables : भाज्या ना पूर्ण कच्च्या, ना खूप शिजवलेल्या हलक्या वाफवून किंवा परतून खाल्ल्यास त्यांची चव आणि पौष्टिकता दोन्ही टिकून राहतात, आणि आरोग्याचा खरा फायदा मिळतो.

Cook Vegetables

भाज्या आपल्या आहारातील महत्त्वाचा भाग आहेत. त्या जीवनसत्त्वे, खनिजे आणि फायबर देतात. मात्र, त्या कशा शिजवल्या जातात यावर त्यातील पौष्टिक घटक टिकून राहतात की नाही, हे ठरते.

भाज्यांमध्ये व्हिटॅमिन A, C, K आणि B-कॉम्प्लेक्स तसेच लोह, कॅल्शियम आणि पोटॅशियम असतात. जास्त शिजवल्याने काही संवेदनशील जीवनसत्त्वे नष्ट होतात.

व्हिटॅमिन C आणि B कॉम्प्लेक्स पाण्यात विरघळणारी असतात. त्यामुळे जास्त उकळल्यास हे घटक पाण्यात मिसळतात. म्हणूनच भाज्या हलक्या वाफवून किंवा परतून घेणे अधिक योग्य ठरते.

सर्व पोषक घटक नष्ट होत नाहीत. लोह, मॅग्नेशियम आणि कॅल्शियम उष्णतेमुळे प्रभावित होत नाहीत आणि शरीर त्यांना सहज शोषते.

काही पोषक घटक शिजवल्यानंतर अधिक उपयोगी ठरतात. उदाहरणार्थ, टोमॅटोतील लाइकोपीन आणि गाजरातील बीटा कॅरोटीन शिजवल्यानंतर शरीराला अधिक सहज उपलब्ध होतात.

भाज्या शिजवताना संतुलन राखणे आवश्यक आहे. खूप कच्च्या किंवा खूप शिजवलेल्या भाज्या दोन्ही आरोग्यासाठी योग्य नाहीत. वाफवणे, हलके परतणे किंवा ग्रिल करणे हे उत्तम पर्याय आहेत.

भाज्यांच्या साली ठेवाव्यात, कारण त्यात जीवनसत्त्वे आणि फायबर असतात. उकळल्यावर उरलेले पाणी सूपमध्ये वापरल्यास पोषक घटक वाया जात नाहीत.

डॉक्टरांच्या मते भाज्या शिजवण्याची योग्य पद्धत निवडली तर त्यातील पोषक घटक अधिक टिकतात. त्यांच्या मते, वाफवणे ही सर्वात आरोग्यदायी पद्धत आहे.

शेवटी, भाज्या न खूप शिजवलेल्या, न खूप कच्च्या अशा मध्यम स्वरूपात खाल्ल्यास त्यांची चव आणि पौष्टिकता दोन्ही टिकून राहतात.

(टीप: वरील सर्व माहिती केवळ माहितीपुरती असून, एबीपी माझा यामध्ये कोणताही दावा करत नाही).