"मी दुसऱ्याच्या इशाऱ्यावर नाचत..." आर. माधवनने सिनेसृष्टीतून 4 वर्षांचा ब्रेक का घेतला होता? अभिनेत्यानं स्पष्टच सांगितलं

R Madhavan Opens Up About Career Break: आर. माधवनने करिअरच्या शिखरावर असताना चार वर्षांचा ब्रेक घेतला होता. त्यानं मुलाखतीतून कारण उघड केलं.

R Madhavan Opens Up About Career Break That Changed His Life And Cinema

R Madhavan Opens Up About Career Break That Changed His Life And Cinema: आर. माधवनने ब्लॉकबस्टर धुरंधर या चित्रपटात अजय सान्याल ही भूमिका साकारली होती. या भूमिकेला प्रेक्षकांकडून भरभरून प्रतिसाद मिळाला. पण तुम्हाला माहिती आहे का की, या अभिनेत्याने त्याच्या कारकि‍र्दीच्या शिखरावर असताना चार वर्षांचा ब्रेक घेतला होता?

आर माधवने 2011 साली अभिनयातून ब्रेक घेतला होता. 2016 मध्ये साला खडूस या चित्रपटातून त्यानं सिनेसृष्टीत पुन्हा एकदा पाऊल ठेवलं होतं.

साला खडूस हा चित्रपट त्याने त्याच्या कारकि‍र्दीत पूर्वी साकारलेल्या रोमँटिक भूमिकांपासून पूर्णपणे वेगळा होता.

याबाबत त्यानं एका मुलाखतीतून खुलासा केला आहे, माधवन म्हणाला, "ब्रेकनंतर माझ्याकडे विक्रम वेधा हा चित्रपट आला होता. साला खडूसच्या आधी, मला कामातून ब्रेक घ्यावा लागला होता. मी ज्या प्रकारच्या कामात गुंतलो होतो, ते काम करत असताना खूप निराश झालो होतो".

"मी स्वित्झर्लंडमध्ये नारंगी पँट आणि हिरवा शर्ट घालून एका तामिळ गाण्याचे शूट करत होतो. मी रस्त्याच्या मधोमध होतो. तेथील एक शेतकरी आमच्याकडे पूर्ण द्वेषाने पाहत होता. तो त्यावेळी चहा पित होता".

"मी त्याच्याकडे पाहिले आणि विचार केला, त्याला मनात म्हणालो चेन्नईला ये, मी तिथे कोण आहे तो दाखवतो. तेव्हा मला खूप वाईट वाटले. पण अचानक मला जाणवले. मी अक्षरश: दुसऱ्याच्या इशाऱ्यावर नाचत आहे".

"मी एक उत्तम पब्लिक स्पीकर आहे. मला बंदूक चालवायला येते. मी खूप काही करू शकतो, पण मी यातील काहीही माझ्या चित्रपटांमध्ये सादर करू शकत नाही. मी केवळ प्रेक्षकांना प्रभावित करण्याचा प्रयत्न करत होतो. जेणेकरून मी सुपरस्टार बनू शकेन. मला माझी चूक कळली", असं आर. माधवनने स्पष्ट केलं.

"मी यानंतर ब्रेक घेतला. देश कोणत्या दिशेनं जात आहे, हे मला समजून घ्यायचे होते. मी भ्रमंती केली. लोकांशी चर्चा केली. चार वर्षांच्या ब्रेकमध्ये मी जे काही शिकलो, ते आज माझ्या मदतीला आलं", असं माधवनने सांगितलं.

"मी नव्या दिग्दर्शकाच्या शोधात होतो. 4 वर्षात जे काही मी शिकलो, या बदलामुळे मोठे परिवर्तन घडले", असंही माधवनने स्पष्ट केलं.

माधवनने विक्रम वेधा, शैतान, दे दे प्यार दे 2 आणि ब्लॉकबस्टर धुरंधरसारख्या हिट चित्रपटांमध्ये प्रमुख भूमिका साकारली.