Prasad Vedpathak Controversy: 'पट्टी विचारुन मारली असती तर...'; सोसायटीतील पांढऱ्या पट्टीचा वाद, युट्यूबर प्रसाद वेदपाठक काय म्हणाला?

Prasad Vedpathak Viral Video: विद्याविहार येथील सोसायटीत जैन धर्मगुरुंसाठी पांढरी पट्टी आखण्यात आली. यावरुन युट्यूबर प्रसाद वेदपाठकची नाराजी.

Prasad Vedpathak Viral Video

Prasad Vedpathak: प्रसिद्ध सोशल मीडिया इन्फ्लुएंसर युट्यूबर प्रसाद वेदपाठक सध्या एका व्हिडिओमुळे चर्चेत आहे. मुंबईतील विद्याविहार येथील 'कैलास अवेन्यू' सोसायटीच्या आवारात पांढरी पट्टी मारण्यात आली होती. या कृतीचा प्रसादनं आक्षेप घेतला.

सोसायटी कमिटीमधील काही सदस्यांनी इमारतीमधील रहिवाशांची परवानगी न घेताच, जैन धर्मगुरुंसाठी आवारात ऑइल पेंटने पट्टी मारली, असं प्रसादने आपल्या व्हिडीओत सांगितलं होतं.

दरम्यान, आता प्रसादचा आणखी एक व्हिडीओ सोशल मीडियात व्हायरल होत आहे. या व्हिडीओत त्यानं, 'पट्टी विचारुन मारली असती, तर कुणी आक्षेप नसता उचलला', असं प्रसाद म्हणाला.

'जर ही पांढरी पट्टी सर्वांना विचारुन मारण्यात आली असती, तर मला असं वाटतं कुणी आक्षेप घेतला नसता'.

'पण ही धार्मिक पट्टी, बंद दरवाज्याआड 5 लोकांनी निर्णय घेऊन मारली आहे. या ठिकाणी 33 फ्लॅट्स आहेत. कुठे न कुठे या ठिकाणी रहिवाशांना यासंदर्भात माहिती देऊन विचारणा करायला हवी होती'.

'पाणी मारलं आणि पट्टी निघून जाईल, असं असतं तर, काही वाद नव्हता, पण असा हा रंग नाही. पर्मेनंट ऑइलपेंटने मारलेला आहे. जे इथे वर्षोनूवर्ष राहणारे रहिवासी आहेत, त्यांना हे रोज पाहावं लागेल.

'इमारतीच्या आवारात काहीही करण्यापूर्वी इथल्या रहिवाशांना एकदा विचारायला हवे होते, असं मला वाटतं', असं प्रसाद म्हणाला.