TCS Q4 Result : टीसीएसचा चौथ्या तिमाहीचा निकाल जाहीर, नफा घटला, महसूल वाढला, 30 रुपये लाभांश जाहीर

TCS Q4 Result : टाटा कन्सलटन्सी सर्व्हिसेसचे जानेवारी ते मार्च या चौथ्या तिमाहीचे निकाल जाहीर झाले आहेत. कंपनीचा फायदा 2 टक्क्यांनी घटला तर महसूल वाढला आहे.

टाटा कन्सलटन्सी सर्व्हिसेस

देशातील सर्वात मोठी आयची कंपनी टाटा कन्सलटन्सी सर्व्हिसेसनं जानेवारी-मार्च 2025 च्या तिमाहीतील आकडे आणि आर्थिक वर्ष 2024-25 ची आर्थिक निकाल जाहीर केले आहेत. जानेवारी ते मार्च या तिमाहीत कंपनीचा निव्वळ नफा 1.67 टक्क्यांनी घसरुन 12293 कोटी रुपये झाला आहे.2023-24 च्या आर्थिक तिमाहीत कंपनीचा नफा 12502 कोटी होता. तर, शेअरधारकांसाठी मार्च 2025 च्या तिमाहीत नफा 12224 कोटी इतका आहे.

टाटा कन्सलटन्सी सर्व्हिसेसचा ऑपरेशन्सच्या कन्सोलिडेटेड बेसिसवर महसूल 5 टक्क्यांनी वाढून 64479 कोटी रुपये झाला आहे. गेल्या वर्षी महसूल 61237 कोटी होती. या तिमाहीत कंपनीचा खर्च 49105 कोटी रुपये झाला. गेल्या वर्षीच्या तिमाहीतील खर्च 45545 कोटी इतका होता.

टाटा कन्सलटन्सी बोर्डानं शेअरधारकांसाठी प्रति शेअर 30 रुपये अंतिम लाभांश वाटप करण्यास मंजुरी दिली आहे. मात्र, या संदर्भातील रेकॉर्ड डेट जाहीर केलेली नाही.

टीसीएसनं डिसेंबर 2024 च्या तिमाहीतील कंपनीचे कांगिरीचे आकडे जाहीर करताना प्रति शेअर 10 रुपये अंतरिम लाभांश जाहीर केला होता. याशिवाय 66 रुपये अतिरिक्त लाभांशाची घोषणा केली होती. यासाठी 17 जानेवारी 2025 रेकॉर्ड डेट निश्चित करण्यात आली होती.

कंपनीनं यापूर्वी आर्थिक वर्ष 2024-25 मध्ये 20 रुपयांचा लाभांश वाटला होता. आता नव्यानं जाहीर करण्यात आलेला लाभांश शेअर धारकांना कधी मिळणार याकडे लक्ष लागलं आहे. (टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)