SIP Investment : शेअर बाजारातील घसरणीचा ट्रेंड संपुष्टात, SIP गुंतवणूकदारांनी काय केल्यास फायदा,तज्ज्ञांनी काय सांगितलं?

SIP Investment : शेअर बाजारात गेल्या पाच महिन्यांपासून सुरु असलेली घसरण थांबल्याचं चित्र गेल्या काही दिवसांमध्ये पाहायला मिळालं होतं.

बाजारात पुन्हा तेजी, एसआयपीचं काय करावं?

भारतीय शेअर बाजारात गेल्या सहा महिन्यांपासून सुरु असणारी घसरण थांबल्याचं मार्च महिन्याच्या शेवटच्या दोन आठवड्यात पाहायला मिळालं. बाजारात तेजी आणि घसरण सुरु असली तरी सर्वांचं एकमत एका गोष्टीवर आहे.ते म्हणजे म्युच्युअल फंड गुंतवणूकदारांनी एसआयपी सुरु ठेवणं आवश्यक आहे.

एसआयपीचा सर्वाधिक फायदा हा आहे की बाजारात तेजी आणि घसरण सुरु असते त्याचा गुंतवणुकीवर कमी परिणाम पाहायला मिळतो. याशिवाय तुमची गुंतवणूक आणि बचत करण्याची सवय काम राहते. याशिवाय काही प्रमाणात रोख रक्कम तुमच्याजवळ ठेवा त्यामुळं जेव्हा बाजार पुन्हा कोलमडल्यास कमी दरात चांगले स्टॉक्स खरेदी करण्याची संधी मिळेल.

गेल्या दन आठवड्यामध्ये बाजारात चांगली सुधारणा झाली आहे. सर्वाधिक तेजी स्मॉलकॅप आणि मिडकॅप फंडसमध्ये पाहायला मिळाली आहे. मात्र गेल्या सहा महिन्यात स्मॉल कॅप आणि मिडकॅप फंडमध्ये घसरण झाली होती. यानंतर देखील एसआयपीद्वारे गुंतवणूक सुरु आहे.

मनी मंत्राचे संस्थापक विरल भट्ट आणि क्रेडेंस वेल्थचे संस्थापक कीर्तन शाह यांनी एसआयपी गुंतवणूकदारांनी आपल्या दीर्घकालीन गुंतवणुकीच्या नियोजनावर ठाम राहावं. साधारणपणे जे लोक 4-5 वर्षांपासून गुंतवणूक करत आहेत त्यांनी दीर्घकालीन गुंतवणूक सुरु ठेवावी.

काही मिडकॅप आणि स्मॉल कॅप कंपन्यांनी अलीकडच्या वर्षांमध्ये जोरदार कमाई केली आहे. कॅपिटल गुड्स ते उत्पादन क्षेत्र, स्पेशालिटी केमिकल्स सारख्या क्षेत्रातील कंपन्यांनी चांगली कमाई केली आहे. यामुळं या कंपन्यांचं मूल्यांकन वाढलं आहे. स्वत:हून पैसे गुंतवणाऱ्यांनी स्मॉल कॅप आणि मिडकॅपमधील कंपन्यांमध्ये गुंतवणूक करताना त्यांचं ताळेबंदपत्रक मजबूत आहे का ते पाहावं, रोख रकमेचा प्रवाह स्थिर असावा, व्यवस्थापन व्यावसायिक असावं.

(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)