Share Market : शेअर बाजारात गुंतवणूकदारांची दिवाळी, 5 सेकंदात संपत्ती 8 लाख कोटींनी वाढली, ट्रम्प यांच्या शांतता कराराच्या घोषणेनं अच्छे दिन

Share Market Rally : भारतीय शेअर बाजारात सेन्सेक्स आणि निफ्टीमध्ये तुफान तेजी पाहायला मिळाली. बाजार सुरु होताच गुंतवणूकदारांची संपत्ती 8 लाख कोटींनी वाढली.

शेअर बाजारात तेजी, गुंतवणूकदारांची दिवाळी

मुंबई : अमेरिका आणि इराण यांच्यातील कराराची घोषणा झाल्यानंतर क्रूड ऑईलच्या दरात घसरण झाली. दुसरीकडे आशियाई बाजारांमध्ये जोरदार तेजी पाहायला मिळाली. सेन्सेक्स आणि निफ्टीत दीड-दीड टक्क्यांची तेजी दिसून आली. सेन्सेक्समध्ये 1300 अंकांपर्यंत तेजी दिसून आली आणि निफ्टी 50 नं देखील 24 हजारांचा टप्पा पार केला. निफ्टी मिडकॅप 100 आणि निफ्टी स्मॉलकॅप 100 मध्येही दीड टक्क्यांची तेजी दिसून आली आहे.

फार्मा सेक्टर सोडून इतर सर्व निफ्टी निर्देशांक तेजीत आहेत. रिअल्टी सेक्टर देखील दीड टक्क्यांनी वाढला आहे. पीएसयू बँक निर्देशांक 2 टक्क्यांनी अधिक झाला. निफ्टी ऑटो 2 टक्क्यांनी वाढले. एफएमसीजी, आयटी मेटल निर्देशांकात देखील तेजी दिसून आली. शेअर बाजारातील तेजी पाहता बीएसईवर लिस्ट असलेल्या कंपन्यांचं बाजारमूल्य 8 लाख कोटींनी वाढलं आहे.

शेअर बाजारात 1300 अंकांपर्यंत तेजी दिसून आली होती. सकाळी 10.24 वाजता सेन्सेक्स 1093 अंकांच्या तेजीसह 76629 पर्यंत पोहोचला होता. तर, निफ्टीत 325 अंकांची तेजी होती. निफ्टीनं 24 हजारांचा टप्पा ओलांडला होता.

12 जूनला बीएसईवर लिस्ट असलेल्या कंपन्यांचं बाजारमूल्य 461 लाख कोटी रुपये होतं. आज सकाळी बाजार सुरु झाला तेव्हा गुंतवणूकदारांच्या संपत्तीत मोठी वाढ झाली. बीएसईर लिस्ट असलेल्या कंपन्यांचं बाजारमूल्य 469 लाख कोटींवर पोहोचलं आहे.

सेन्सेक्सवरील टॉप 30 पैकी केवळ एका स्टॉकमध्ये घसरण झाली होती. सन फार्माच्या स्टॉकमध्ये घसरण झाली. इंडिगो, अल्ट्राटेक सिमेंट आणि बजाज फायनान्सच्या शेअरमध्ये सर्वाधिक तेजी दिसून आली.

(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)