Share Market : शेअर बाजारातील घसरणीला ब्रेक, सेन्सेक्स आणि निफ्टीत तेजी, गुंतवणूकदारांची 3 लाख कोटींची कमाई

Share Market Today: भारतीय शेअर बाजार गुरुवारच्या घसरणीनंतर थोडा सावरल्याचं दिसून आलं आहे. सेन्सेक्स आणि निफ्टीत तेजी पाहायला मिळाली.

शेअर मार्केट अपडेट

भारतीय शेअर बाजारात 19 मार्चच्या घसरणीनंतर 20 मार्चला तेजी दिसून आली. आजचं कामकाज संपल्यानंतर सेन्सेक्स 325.72 अंकांच्या तेजीसह 74532.96 अंकांवर बंद झाला. निफ्टी 50 निर्देशांक 112.35 अंकांच्या तेजीसह 23114.50 स्तरावर पोहोचला आहे.

भारतीय शेअर बाजारात सकाळी मजबुती पाहायला मिळाली कारण अमेरिका- इस्त्रायल आणि इराण यांच्यातील युद्ध लवकर संपण्याची अपेक्षा, कच्चा तेलाच्या दरातील नरमाई होती. दुपारच्या सत्रात गुंतवणूकदारांनी नफावसुलीचं धोरण स्वीकारल्यानं बाजारात घसरण पाहायला मिळाली.

आज मिडिया, खासगी बँका आणि रिअल्टी क्षेत्र वगळता इतर क्षेत्रात तेजी दिसून आली. टेलीकॉम, आयटी, मेटल आणि सार्वजनिक बँक निर्देशांकात 1 ते 2 टक्क्यांची तेजी पाहायला मिळाली. निफ्टी मिडकॅपमध्ये तेजी होती तर स्मॉलकॅप निर्देशांक सपाट राहिला.

डॉलरच्या तुलनेत रुपयाचं कमजोर होणं चिंतेचं कारण बनलं आहे. भारतीय रुपया सलग दुसऱ्या दिवशी घसरुन 93 रुपयांच्या पुढे पोहोचला. आज डॉलरच्या तुलनेत रुपयाचं मूल्य 93.76 रुपये इतकं आहे.

बीएसईवर लिस्ट असलेल्या कंपन्यांचं बाजारमूल्य 426.13 लाख कोटींवरुन 429.23 लाख कोटींवर पोहोचलं. म्हणजेच बीएसईवर लिस्ट असलेल्या कंपन्यांचं बाजारमूल्य 3.10 लाख कोटींनी वाढलं आहे. आज सर्वाधिक तेजी टाटा स्टील, टेक महिंद्रा, इन्फोसिस, ट्रेंट, रिलायन्स इंडस्ट्रीजच्या शेअरमध्ये दिसून आली.

Continues below advertisement

(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)