Share Market Fall : शेअर बाजार एका दिवसाच्या तेजीनंतर पुन्हा घसरला, सेन्सेक्स 500 अंकांनी कोसळला,निफ्टीत घसरण

Share Market Fall : भारतीय शेअर बाजारात एका दिवसाच्या तेजीनंतर दुसऱ्या दिवशी घसरण पाहायला मिळाली. सेन्सेक्स 500 पेक्षा जास्त अंकांनी घसरल्याचं दिसून आलं.

शेअर बाजारात घसरण

भारतीय शेअर बाजारात एका दिवसाच्या तेजीनंतर पुन्हा घसरणीचं चित्र पाहायला मिळत आहे. सेन्सेक्स 500 पेक्षा जास्त अंकांनी घसरला तर निफ्टी देखील 24650 अंकांवर आला. पश्चिम आशियातील वाढत्या भूराजनैतिक तणावामुळं,कच्चा तेलाच्या वाढत्या दरांमुळं आणि विदेशी गुंतवणूकदारांकडून सुरु असलेल्या विक्रीमुळं शेअर बाजारावर दबाव दिसून आला.

आज 12.30 वाजता सेन्सेक्स 611 अंकांपेक्षा जास्त अंकांनी घसरला. सेन्सेक्स 79400 अंकांवर पोहोचला आहे. तर, निफ्टी 169 अंकांनी घसरला असून 24595.00 अंकांवर आहे. निफ्टीवरील बहुतांश सेक्टरोल निर्देशांक घसरले आहेत.

भारतीय शेअर बाजारातील घसरणीच्या कारणांचा विचार केला असता अमेरिका, इस्त्रायल आणि इराण यांच्यातील तणाव वाढत असल्यानं गुंतवणूकदारांनी जोखीम कमी घेण्याचं धोरण स्वीकारलं आहे. ऊर्जा साधनांच्या पुरवठ्यात अडथले निर्माण झाले तर कच्चा तेलाचे दर वाढू शकतात, याचा जागतिक अर्थव्यवस्थेवर परिणाम होण्याची शक्यता आहे.

आशियाई बाजारातील घसरण झाल्यानं त्याचा भारतीय शेअर बाजारावर परिणाम दिसून आला. दक्षिण कोरियाचा कोस्पी निर्देशांक ए टक्क्यांहून अधिक अंकांनी घसरला. अमेरिकेचा शेअर बाजार देखील गुरुवारी घसरणीसह बंद झाला.

विदेशी संस्थात्मक गुंतवणूकदारांकडून सातत्यानं विक्री सुरु आहे. गुरुवारी 3752.52 कोटी रुपयांच्या शेअरची विक्री विदेशी गुंतवणूकदारांनी केली आहे. तर, मार्च महिन्यात विदेशी संस्थात्मक गुंतवणूकदारांनी 16 हजार कोटी रुपयांच्या शेअरची विक्री केली आहे.

ब्रेंट क्रूड ऑईलच्या दरात गुरुवारी 5 टक्क्यांची वाढ झाली. ब्रेंट क्रूड ऑईलचे दर 86.28 डॉलर प्रति बॅरलवर पोहोचले. हा गेल्या 20 महिन्यातील उच्चांक आहे. शुक्रवारी हे दर 84.4 डॉलर प्रति बॅरलवर पोहोचले आहेत. याशिवाय बँकिंग क्षेत्रातील शेअरमधील घसरणीचा परिणाम शेअर बाजारावर दिसून आला. (टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)