Share Market Crash:शेअर बाजारात सलग चौथ्या दिवशी घसरण, गुंतवणूकदारांनी 87279 कोटी गमावले, घसरण कशामुळं?

Share Market Fall: शेअर बाजारात सलग चौथ्या दिवशी घसरण झाली आहे. यामुळं गुंतवणूकदारांचं मोठं नुकसान झालं आहे. आयटी, ऑटो शेअरच्या विक्रीमुळं बाजारावर दबाव दिसून आला.

शेअर मार्केट अपडेट

Share Market Fall मुंबई : भारतीय शेअर बाजारात सलग चौथ्या दिवशी घसरण पाहायला मिळाली आहे. सेन्सेक्स 417.49 अंकांनी कमी होत 76152.86 अंकांवर बंद झाला. तर निफ्टी 50 देखील 41 अकांनी घसरुन 23873.45 अंकांवर बंद झाला. शेअर बाजारातील आजच्या घसरणीमुळं गुंतवणूकदारांचं 87279 कोटी रुपयांचं नुकसान झालं आहे.

भारतीय शेअर बाजारातील आजच्या घसरणीचं कारण नफावसुली, आयटी, ऑटो आणि एफएमसीजी शेअरची विक्री कारणीभूत होती. बीएसईवर लिस्ट असलेल्या कंपन्यांचं बाजारमूल्य 487 लाख 97 हजार 259.056 कोटी रुपये होते. आज बाजार बंद झाला तेव्हा बीएसईवर लिस्ट असलेल्या कंपन्यांचं बाजारमूल्य 487 लाख 09 हजार 979.50 कोटी रुपये होतं. म्हणजेच आज दिवसभरात गुंतवणूकदारांना 87 हजार 279.556 कोटींचं नुकसान झालं.

शेअर बाजारात सलग तीन दिवस घसरण पाहायला मिळाली होती. जागतिक बाजारांमधील कमजोर संकेत आणि पश्चिम आशियातील वाढत्या तणावामुळं क्रूड ऑईलचे दर वाढले आहेत. याचा परिणाम सेन्सेक्स आणि निफ्टीवर दिसून आला.

जागतिक बाजारांचा विचार केला असता आशियाई बाजारामंध्ये तेजी आणि घसरणीचा ट्रेंड पाहायला मिळाला. निक्केई 225, हेंग सेंग आणि तैवान वेटेडमध्ये घसरण झाली. दुसरीकडे कॉस्पी, SET कंपोझिट आणि जकार्ता कंपोझिट आणि शांघाई कंपोझिट तेजीसह बंद झाले. अमेरिकन बाजारात तेजी दिसून आली तर यूरोपियन बाजारात घसरण पाहायला मिळाली.

एकीकडे शेअर बाजारात घसरण होत असली तरी डॉलरच्या तुलनेत रुपया मजबूत झाला आहे. 17 पैशांनी रुपयांनी मजबूत होत 94.56 प्रति डॉलरवर बंद झाला आहे.

(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)