RBI : रिझर्व्ह बँक ऑफ इंडियाचा कारवाईचा धडाका सुरुच, मुथूट फायनान्ससह 6 कंपन्यांना दणका, आर्थिक दंड ठोठावला

RBI : रिझर्व्ह बँक ऑफ इंडियाकडून नियमांचं पालन न करणाऱ्या बँका, फायनान्स कंपन्यांवर दंडाची कारवाई केली जाते. रिझर्व्ह बँकेनं मुथूट फायनान्स सह 6 फायनान्स कंपन्यांना आर्थिक दंड केला आहे.

रिझर्व्ह बँक ऑफ इंडिया

रिझर्व्ह बँक ऑफ इंडियानं 10 जुलै 2026 च्या आदेशानं मुथूट फायनान्स लिमिटेडला आरबीआयच्या केवायसी संदर्भातील सूचनांची पूर्तता न केल्यानं 5 लाख 80 हजार रुपयांचा दंड केला आहे. ही कारवाई रिझर्व्ह बँक ऑफ इंडिया कायदा 1934 नुसार मिळालेल्या अधिकारांचा वापर करत कण्यात आली आहे. मुथूट फायनान्स ला खात्यांच्या जोखमीच्या वर्गीकरणासंदर्भातील नियमित रिव्यू नोंदवण्यात अपयश आलं. संशयास्पद व्यवहारांचं रिपोर्टिंग करण्यासाठी अद्ययावत सॉफ्टवेअर तयार करण्यात कंपनीला अपयश आलं.

रिझर्व्ह बँक ऑफ इंडियानं 13 जुलैच्या आदेशानं सत्य मायक्रो कॅपिटल लिमिटेडला 3.10 लाख रुपयांचा दंड करण्यात आला आहे. असेट क्लासिफिकेशन संदर्भातील सूचनांचं पालन करण्यात कंपनीला अपयश आल्यानं ही कारवाई करण्यात आलीय.पुनर्रचनेनंतर एनपीए खात्यांचं वर्गीकरण करण्यात कंपनीला अपयश आल्याचं आरबीआयनं म्हटलं आहे.

आरबीआयनं पॅन इमामी कॉस्मेड लिमिटेडला 3.10 लाख रुपयांचा दंड केला आहे. एका गटाला वित्तपुरवठा करताना कंपनीनं निश्चित करण्यात आलेली मर्यादा ओलांडल्याचा ठपका आरबीआयनं ठेवला आहे.

आरबीआयनं धनी लोन्स अँड सर्व्हिसेस लिमिटेडला 2.70 लाख रुपयांचा दंड केला आहे. असेट क्लासिफिकेशन संदर्भातील सूचनांचं पालन करण्यात कंपनीला अपयश आलं. त्यामुळं परीक्षणानंतर आरबीआयनं दंडात्मक कारवाई केली आहे.

रिझर्व्ह बँक ऑफ इंडियानं 13 जुलै 2026 च्या आदेशानं मुथूट वेईकल्स अँड असेट फायनान्स लिमिटेडला 2.70 लाख रुपयांचा दंड केला आहे. आरबीआयच्या केवायसी संदर्भातील सूचनांची पूर्तता न केल्यानं ही कारवाई करण्यात आली आहे.

Continues below advertisement

रिझर्व्ह बँक ऑफ इंडियानं 10 जुलैच्या आदेशानं अविल फायनान्स सर्व्हिसेस लिमिटेडला 6.20 लाख रुपयांचा दंड केला आहे. या कंपनीचा व्यवस्थापकीय संचालक इतर दोन एनबीएफसीमध्ये मिडल लेअर संचालक असल्याचं आरबीआयनं म्हटलं. वित्त पुरवठ्यासंदर्भातील नियमांचं उल्लंघन झाल्याचं देखील आरबीआयनं कारवाई करताना नोंदवलं आहे.