Muhurat Trading : मुहूर्त ट्रेडिंगला मार्केटमध्ये तेजी, गुंतवणूकदारांची 1 तासात कोट्यवधी रुपयांची कमाई

Muhurat Trading : दिवाळीनिमित्त नवं आर्थिक वर्ष सुरु होत असताना शेअर बाजारात मुहूर्त ट्रेडिंग सत्र आयोजित करण्यात आलं होतं. यामध्ये सेन्सेक्स आणि निफ्टी तेजीसह बंद झाले.

मुहूर्त ट्रेडिंगला गुंतवणूकदार मालामाल

भारतीय शेअर बाजारात मुहूर्त ट्रेडिंगचं सत्र आयोजित करण्यात आलं होतं. सेन्सेक्स आणि निफ्टी मध्ये तेजी दिसून आली. निफ्टीनं 25900 अंकांचा टप्पा ओलांडला आहे.

मुहूर्त ट्रेडिंग सुरु झाल्यानंतर सुरुवातीच्या तेजी घसरणीनंतर अखेरीस सेन्सेक्स आणि निफ्टी तेजीसह बंद झाले. सार्वजनिक क्षेत्रातील बँका, रिअल्टी, फायनान्शिअल सर्व्हिसेस निफ्टी निर्देशांक घसरणीसह बंद झाले.

मुहूर्त ट्रेडिंगला बीएसई सेन्सेक्सवर लिस्ट असलेल्या कंपन्यांचा बाजारमूल्य 1.20 लाख कोटींनी वाढलं. म्हणजेच गुंतवणूकदारांच्या संपत्तीत 1.20 लाख कोटींची वाढ झाली. सेन्सेक्स 62.97 अंकांच्या तेजीसह 84426.34 अंकांवर तर निफ्टी 50 निर्देशांक 25868 अंकांवर बंद झाला.

20 ऑक्टोबरला बीएसईवर लिस्ट असलेल्या कंपन्यांचं बाजारमूल्य 4,69,68,698.89 कोटी म्हणजेच 469 लाख होती. जी आज 470 लाख कोटी झाली.

सेन्सेक्सच्या टॉप 30 शेअरपैकी 17 कंपन्यांचे स्टॉक तेजीसह बंद झाले. सर्वाधिक तेजी बजाज फिनसर्व्ह,एक्सिस बँक, इन्फोसिस यासह इतर स्टॉकमध्ये तेजी पाहायला मिळाली. तर, कोटक महिंद्रा बँक, आयसीआयसीआय बँक, एचसीएल टेकमध्ये घसरण पाहायला मिळाली.

(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)