GDP Growth : मार्च तिमाहीत जीडीपी वाढ 7.8 टक्क्यांवर, जागतिक अस्थिरतेच्या काळात भारतीय अर्थव्यवस्थेची 2025-2026 मध्ये कामगिरी कशी राहिली?

GDP Growth : मार्च तिमाहीत जीडीपी वाढीचा दर 7.8 टक्क्यांवर पोहोचला आहे. भारतीय अर्थव्यवस्थेची वाढ आर्थिक वर्ष 2025-26 मध्ये 7.7 टक्के होती.

मार्च तिमाहीत जीडीपी वाढ 7.8 टक्क्यांवर

अमेरिका आणि इराण युद्धामुळं निर्माण झालेली परिस्थिती, अमेरिकेनं लादलेलं टॅरिफ यामुळं निर्माण झालेल्या जागतिक तणावाच्या पार्श्वभूमीवर मार्च तिमाहीत देशाच्या अर्थव्यवस्थेचा वाढीचा वेग 7.8 टक्के राहिला. मागील तिमाहीच्या तुलनेत जीडीपी ग्रोथमध्ये घसरण झाली आहे. डिसेंबर तिमाहीत जीडीपी वाढीचा वेग 8 टक्के होता. मार्च तिमाहीतील वाढीवर अमेरिका आणि इराणच्या युद्धाचा परिणाम पाहायला मिळाला.

सरकारी आकडेवारीनुसार आर्थिक वर्ष 2025-26 मध्ये जीडीपी वाढीचा दर 7.7 टक्के राहिला. गेल्या आर्थिक वर्षाच्या तुलनेत 2025-26 मध्ये कामगिरी सुधारली आहे. 2024-25 मध्ये जीडीपी वाढीचा दर 7.1 टक्के होता.

सांख्यिकी मंत्रालयाच्या निर्णयानुसार स्थिर किंमतीनुसार जीडीपीचा आकार आर्थिक वर्ष 2025-26 मध्ये वाढून 323.12 लाख कोटींचा अंदाज होता. 2024-25 मध्ये अपडेटेड अंदाजानुसार 299.89 लाख कोटी होता. सध्याच्या दरांनुसार जीडीपीचा आकार 2025-26 मध्ये 346.36 लाख कोटी अंदाजित आहे. 2024-25 च्या तुलनेत ही आकडेवारी अधिक आहे.

भारतानं जीडीपीची नवी सिरीज स्वीकारली आहे. 2022-23 ला आधारभूत वर्ष निश्चित करण्यात आलं आहे. त्यानुसार राष्ट्रीय उत्पन्नाचे आकडे अपडेट करण्यात आलं आहे. करोना संकटानंतर बदलतं स्वरुप आणि डिजीटल अर्थव्यवस्थेच्या वाढत्या प्रभावाची योग्य पद्धतीनं मोजणी केली जावी असा हेतू आहे.

आरबीआयनं जागतिक अनिश्चितता आणि कच्चा मालाचे वाढलेले दर लक्षात घेता चालू आर्थिक वर्षात जीडीपी वाढीचा अंदाज 6.6 टक्के केला आहे. यापूर्वी तो अंदाज 6.9 टक्के होता. 2025-26 साठी अंदाज 7.6 टक्के होता. जागतिक सप्लाय चेनमधील दीर्घकाळ अडचणी, जागतिक बाजारातील वाढती वित्तीय अस्थिरता, मान्सूनचा सी संबंधित देशांतर्गत घटकांमुळं जोखीम कायम आहे.