Gold-Silver Rate: सोने-चांदीचे दर सलग तिसऱ्या दिवशी गडगडले ; सोने-चांदीचे दर घसरण्याची काय आहेत कारणं, वाचा सविस्तर

Gold-Silver Rate: अमेरिकेच्या मध्यस्थीनंतर इराण आणि इस्रायल यांनी सध्या हवाई हल्ले थांबविल्याची माहिती समोर आली आहे.

Gold-Silver Rate

भारतीय सराफा बाजारात ९ जून २०२६ रोजी सोने आणि चांदीच्या किमतींमध्ये सलग तिसऱ्या दिवशी घसरण नोंदवली गेली आहे.

जागतिक बाजारातील घडामोडी आणि गुंतवणूकदारांच्या बदलत्या भूमिकेमुळे सोने सुमारे १,००० रुपये प्रति १० ग्रॅमने स्वस्त झाले असून चांदीच्या दरातही ५०० ते १,००० रुपये प्रति किलोपर्यंत घट झाली आहे.

‘ब्लॅक मंडे’नंतर जागतिक बाजारात मोठी उलथापालथ झाल्यानंतर मल्टी कमोडिटी एक्स्चेंज (MCX) आणि देशांतर्गत किरकोळ बाजारात सोने आणि चांदीच्या दरांवर दबाव कायम आहे. त्यामुळे सोने आणि चांदीच्या किमतींमध्ये सातत्याने घसरण होत असल्याचे दिसून येत आहे.

सोन्याप्रमाणेच चांदीच्या किमतीतही आज घसरण झाली आहे. सध्या चांदीचा दर प्रतिकिलो ₹२,५९,९०० ते ₹२,६०,००० दरम्यान आहे. किरकोळ बाजारात १० ग्रॅम चांदीचा दर ₹२६० ते ₹२७० दरम्यान व्यवहारात आहे.

अमेरिकेच्या मध्यस्थीनंतर इराण आणि इस्रायल यांनी सध्या हवाई हल्ले थांबविल्याची माहिती समोर आली आहे. युद्धाचा धोका कमी झाल्याने गुंतवणूकदारांनी सुरक्षित गुंतवणूक मानल्या जाणाऱ्या सोने आणि चांदीमधून पैसे काढण्यास सुरुवात केली आहे. याचा परिणाम दरांवर झाला आहे.

अमेरिकेच्या १० वर्षांच्या ट्रेझरी बाँडचे उत्पन्न (Yield) गेल्या दोन आठवड्यांतील उच्चांकावर पोहोचले आहे.

बाँडवरील परतावा वाढल्यामुळे व्याज न देणाऱ्या सोन्याकडे गुंतवणूकदारांचा कल कमी होत आहे.

जागतिक स्तरावर अमेरिकन डॉलर मजबूत झाल्यानेही सोने आणि चांदीच्या किमतींवर दबाव आला आहे.

यामुळे कमोडिटी बाजारात स्पॉट गोल्डचे दर घसरले असून ते दोन महिन्यांच्या नीचांकी पातळीच्या जवळ पोहोचल्याचे सांगितले जात आहे.

सोन्या-चांदीच्या किमतीतील या घसरणीमुळे ग्राहकांना काहीसा दिलासा मिळाला असला, तरी पुढील काही दिवस जागतिक आर्थिक आणि भू-राजकीय परिस्थितीनुसार दरांमध्ये आणखी चढ-उतार होण्याची शक्यता तज्ज्ञांकडून व्यक्त केली जात आहे.