Share Market Crash : निर्मला सीतारमण यांची एक घोषणा आणि शेअर बाजारात हाहाकार, गुंतवणूकदारांचे 8 लाख कोटी स्वाहा

Budget 2026 : भारतीय शेअर बाजारात अर्थसंकल्पादिवशी मोठी पडझड झाली आहे. गुंतवणूकदारांचे तब्बल 8 लाख कोटी बुडाले आहेत.

शेअर बाजारात मोठी घसरण

भारतीय शेअर बाजाराचं विशेष सत्र अर्थसंकल्पानिमित्त आयोजित करण्यात आलं आहे. अर्थसंकल्पात ऑप्शन अँड फ्युचर्सवरील एसटीटी वाढवण्याचा निर्णय निर्मला सीतारमण यांनी जाहीर केला. यामुळं सेन्सेक्स आणि निफ्टी मध्ये घसरण पाहायला मिळाली.

शेअर बाजारात सेन्सेक्स 1546.84 अकांच्या घसरणीसह 80722.94 अंकांवर पोहोचल्याचं दिसून आलं. तर, निफ्टी 50 देखील 495 अंकांनी घसरुन 24825.45 वर आला. बँक निफ्टीमध्ये 1225 अंकांची घसरण पाहायला मिळाली. दुपारी तीन वाजता शेअर बाजार घसरणीचा ट्रेंड कायम होता.

भारतीय शेअर बाजारातील घसरणीचं प्रमुख कारण फ्युचर्सवरील 'एसटीटी' (STT) 0.02 टक्के वरून वाढवून 0.05 टक्के करण्यात आला आहे, तर ऑप्शन्स प्रीमियमवर तो 0.15 टक्के करण्यात आला आहे. याव्यतिरिक्त, आता शेअर बायबॅकवर होणारा सर्व फायदा 'कॅपिटल गेन्स' (भांडवली नफा) म्हणून करपात्र असेल.

एसटीटी वाढ आणि शेअर बायबॅकमध्ये होणारा नफा कॅपिटल गेन्स म्हणून करपात्र करण्यात आलेला आहे. याचा नकारात्मक परिणाम शेअर बाजारावर दिसून आला. सेन्सेक्सवर 2400 अंकांपर्यंत घसरण पाहायला मिळाली होती. शेअर बाजारातील घसरणीनं गुंतवणूकदारांचं 8 लाख कोटींचं नुकसान झाल्याचा अंदाज आहे.

अर्थसंकल्पात काही क्षेत्रांसाठी मोठ्या घोषणा करण्यात आल्यानंतर त्या सेक्टरमधील स्टॉकला दिलास मिळाला. सरकारनं इन्फ्रास्ट्रक्चर क्षेत्रासाठी मोठी घोषणा करताच इन्फ्रा कंपन्यांच्या शेअरमध्ये वाढ झाली. सूक्ष्म लघू आणि मध्यम उद्योगांसाठी 10 हजार कोटींचा निधी जाहीर करण्यात आलं आहे.

Continues below advertisement

शेअर बाजारात लार्ज कॅप कंपन्यांचे स्टॉक कोसळले. मात्र, गुंतवणूकदारांनी शेअर कोसळत असताना खरेदी केल्यानं दिलासा मिळाला आहे. शेअर बाजार अर्थसंकल्प जाहीर झाल्यानंतर दबाव पाहायला मिळत आहे. सोमवारी देखील शेअर बाजारावर दबाव राहणार का ते पाहावं लागेल. (टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)