Donald Trump: अमेरिका आता थेट हिंद महासागरात प्रवेश करणार! डोनाल्ड ट्रम्प भारताजवळील 'हे' बेट विकत घेणार; ब्रिटनला वगळून स्वतंत्र प्रस्ताव, नेमकं प्रकरण काय?

अमेरिका हिंद महासागरातील चागोस बेटे खरेदी करण्याच्या प्रस्तावावर विचार करत आहे. ब्रिटनने यापूर्वी चागोस बेटांचे सार्वभौमत्व मॉरिशसला हस्तांतरित करण्यास सहमती दर्शवली होती. आता, हा करार रखडला आहे.

US considers buying Chagos Islands

Source : ABP Majha

 

Donald Trump US : हिंद महासागरातील चागोस बेटांसंदर्भात अमेरिका आणि ब्रिटन यांच्यात पुन्हा तणाव निर्माण झाला आहे. 'द टेलिग्राफ' (The Telegraph) मधील एका वृत्तानुसार, व्हाईट हाऊस (White House) थेट मॉरिशसकडून चागोस बेटे (Chagos Islands) खरेदी करण्याच्या प्रस्तावावर (US considers buying Chagos Islands) विचार करत आहे. या निर्णयाचा ब्रिटनच्या बेटांचे सार्वभौमत्व मॉरिशसला हस्तांतरित करण्याच्या योजनेवर परिणाम होऊ शकतो, अशी देखील माहिती आहे. या वृत्तानुसार, ट्रम्प प्रशासनातील अधिकाऱ्यांनी ब्रिटनला वगळून डिएगो गार्सिया लष्करी तळावर थेट नियंत्रण मिळवण्यासाठी पर्याय तयार केले आहेत. डिएगो गार्सिया हा हिंद महासागरातील एक संयुक्त यूके-अमेरिका लष्करी तळ आहे, जो पश्चिम आशिया आणि इंडो-पॅसिफिक प्रदेशातील लष्करी कारवायांसाठी महत्त्वपूर्ण मानला जातो.

दरम्यान, चागोस बेटांवरील सार्वभौमत्व मॉरिशसकडे हस्तांतरित केल्याने सुरक्षेचा धोका वाढू शकतो, अशी भीती अमेरिकन अधिकाऱ्यांना वाटते. वॉशिंग्टनमध्ये विशेषतः मॉरिशसच्या चीन आणि इराणसोबतच्या संबंधांबद्दल चिंता व्यक्त केली जात आहे. या अहवालानुसार, अमेरिका आणि ब्रिटन या विषयावर चर्चा करत आहेत.

अमेरिकेच्या आक्षेपानंतर करार रखडला (US Considers Buying Chagos Islands)

अमेरिकन अधिकाऱ्यांनी सांगितले की, डिएगो गार्सिया एक सुरक्षित आणि प्रभावी प्रादेशिक सुरक्षा केंद्र म्हणून काम करेल, हे सुनिश्चित करण्यासाठी दोन्ही देश एकत्र काम करत आहेत. ब्रिटनने यापूर्वी चागोस बेटांवरील सार्वभौमत्व मॉरिशसकडे हस्तांतरित करण्यास सहमती दर्शवली होती. प्रस्तावित करारानुसार, ब्रिटन डिएगो गार्सिया लष्करी तळ दीर्घ कालावधीसाठी भाड्याने घेणार होते. किंबहुना, अमेरिकेच्या आक्षेपानंतर हा करार सध्या रखडला आहे.

ब्रिटिश पंतप्रधान कीर स्टारमर यांच्या सरकारने हे स्पष्ट केले आहे की, अमेरिकेच्या संमतीशिवाय कोणताही अंतिम करार होणार नाही. अहवालानुसार, ट्रम्प प्रशासनानेही चागोस बेटे खरेदी करण्याचा पर्याय निवडला आहे. ट्रम्प यांनी यापूर्वी ब्रिटन-मॉरिशस करारावर टीका केली होती. त्यांनी या कराराला एक मोठी चूक म्हटले होते आणि यामुळे ब्रिटन आपले सामरिक नियंत्रण गमावेल, असे म्हटले होते.

UK- US: फेब्रुवारीमध्ये ट्रम्प यांनी हा करार म्हणजे "मोठी चूक" असल्याचे म्हटले होते.

"सरकारला अशी परिस्थिती वारशाने मिळाली होती जिथे डिएगो गार्सिया येथील लष्करी तळावरील युकेचे (UK) नियंत्रण धोक्यात आले होते. युकेचे राष्ट्रीय हितसंबंध जपण्यासाठी आणि अत्यंत मोक्याच्या ठिकाणी असलेल्या या तळावर आपल्या विरोधकांना पाय रोवण्यापासून रोखण्यासाठी पावले उचलणे आवश्यक होते," असे युके सरकारच्या प्रवक्त्याने सांगितले.

"डिएगो गार्सिया ही युके आणि अमेरिका या दोघांसाठीही एक महत्त्वाची मोक्याची लष्करी मालमत्ता आहे, जिने गेल्या जवळपास ६० वर्षांपासून आपल्या सामायिक सुरक्षेचे रक्षण केले आहे," असे प्रवक्त्याने पुढे नमूद केले. "डिएगो गार्सियावरील दीर्घकालीन कार्यात्मक नियंत्रण आणि सुरक्षा कायम राखणे हाच युके-मॉरिशस कराराचा मुख्य आधार आहे; हा करार या तळाला असलेल्या वास्तविक आणि दीर्घकालीन धोक्यांच्या पार्श्वभूमीवर करण्यात आला आहे, ज्याची युके आणि अमेरिका या दोघांनाही पूर्ण जाणीव आहे."

हे सुद्धा वाचा