US-Israel Iran Attack : खामेनींच्या मृत्यूचे पाकिस्तानमध्ये उमटले पडसाद, अमेरिकेच्या वाणिज्य दुतावासावर शिया समुदायाचा हल्ला, 14 जणांचा मृत्यू
US Israel Iran Attack: इराणचे सर्वोच्च नेते अयातुल्ला अली खामेनी यांच्या मृत्यूनंतर कराचीमध्ये अमेरिकेच्या वाणिज्य दुतावासावर निदर्शने करण्यात आली.
US Israel Iran Attack: इराणचे सर्वोच्च नेते अयातुल्ला अली खामेनी यांच्या मृत्यूनंतर पाकिस्तानमधील कराची शहरात व्यापक आंदोलनाचे चित्र दिसून येत आहे. आंदोलनकर्ते मोठ्या संख्येने अमेरिकन वाणिज्य दूतावास (यूएस कॉन्सुलेट) बाहेर जमले आणि अमेरिकेविरोधात घोषणाबाजी केली. आंदोलनादरम्यान परिस्थिती तणावपूर्ण बनली. मिळालेल्या माहितीनुसार, माई कोलाची ते सुल्तानाबाद या मार्गावरील ये-जा करणारे दोन्ही रस्ते बंद करण्यात आले. काही आंदोलनकर्त्यांनी यूएस कॉन्सुलेटच्या परिसरात घुसून तेथे तोडफोड केली. या घटनेत 14 जणांचा मृत्यू झाला असून 20 जण जखमी झाल्याची माहिती आहे. दरम्यान, परिस्थिती नियंत्रणात आणण्यासाठी पोलिसांनी गोळीबार केल्याचे समोर येत आहे.
पाकिस्तानी वृत्तवाहिनी सामा टीव्हीच्या वृत्तानुसार, जमावाला पांगवण्यासाठी पोलिसांनी अश्रुधुराच्या नळकांड्या फोडल्या. सुरक्षा दलांनी परिसराला वेढा घातला आणि अतिरिक्त पोलिस तैनात केले. परिस्थिती अजूनही संवेदनशील आहे आणि अधिकाऱ्यांनी जनतेला शांतता राखण्याचे आवाहन केले आहे. स्थानिक प्रशासन आणि सुरक्षा संस्था घडामोडींवर लक्ष ठेवून आहेत.
US Israel Iran Attack: मध्य पूर्वेतील तणावाचा परिणाम
दरम्यान, मध्यपूर्वेत सुरू असलेला तणाव, विशेषतः इराण आणि इस्त्रायल यांच्यात वाढत चाललेला संघर्ष, आता दक्षिण आशियातही जाणवू लागला आहे. अशा प्रकारच्या आंदोलनांचा विविध स्तरांवर परिणाम होऊ शकतो. ही आंदोलने देशांमधील राजनैतिक संबंधांवर परिणाम करू शकतात. कारण दूतावास आणि वाणिज्य दूतावास हे देशाच्या अधिकृत उपस्थितीचे प्रतीक आहेत. दुसरे म्हणजे, अशा परिस्थिती सुरक्षा व्यवस्था आणखी गुंतागुंतीच्या ठरू शकतात. कायदा आणि सुव्यवस्था राखण्यासाठी स्थानिक अधिकाऱ्यांना अतिरिक्त संसाधने तैनात करावी लागतील. तिसरे म्हणजे, आंतरराष्ट्रीय मिशन आणि परदेशी नागरिकांच्या सुरक्षिततेबद्दल चिंता वाढेल, ज्यामुळे जागतिक पातळीवरही प्रतिक्रिया उमटण्याची शक्यता आहे.
Ali Khamenei Death: इराणमध्ये 40 दिवसांचा राष्ट्रीय दुखवटा जाहीर
खामेनी यांच्या सोबत कुटुंबातील आणखी चार सदस्यांचाही मृत्यू झाल्याची माहिती समोर आली आहे. इराणी माध्यमांनीही या बातमीची पुष्टी केल्याचे सांगितले जाते. ‘प्रेस टीव्ही’ने खामेनी आता हयात नसल्याचे वृत्त दिले आहे. त्यांच्या निधनानंतर 40 दिवसांच्या राष्ट्रीय शोकाची घोषणाही करण्यात आली आहे. मध्यपूर्वेत तणावाची परिस्थिती कायम आहे. इस्त्रायल आणि अमेरिकेच्या हल्ल्यांना प्रत्युत्तर म्हणून इराणने अनेक अमेरिकन लष्करी तळांना लक्ष्य केले आहे. दरम्यान, रविवारी (1 मार्च 2026) खामेनी यांच्यासह त्यांच्या मुलगी, जावई आणि नात यांचाही मृत्यू झाल्याचे वृत्त समोर आले आहे.
आणखी वाचा
महत्त्वाच्या बातम्या
