Israel vs Iran War: संपूर्ण जगाचे लक्ष लागून राहिलेल्या मध्य पूर्वेतील तणाव (Israel vs Iran War) दिवसागणिक वाढताना दिसत आहे. 28 फेब्रुवारी 2026 रोजी अमेरिका आणि इस्रायलने इराणवर केलेल्या संयुक्त हल्ल्यांनी याची सुरुवात झाली, ज्यामध्ये इराणचे सर्वोच्च नेते अयातुल्ला अली खामेनी यांचा मृत्यू झाला. तेव्हापासून परिस्थिती झपाट्याने बिघडली आहे. इराणने प्रत्युत्तर म्हणून हल्ले सुरू केले, आखाती देशांमधील अमेरिकन तळ आणि दूतावासांवर ड्रोन आणि क्षेपणास्त्रे डागली. इस्रायलने लेबनॉनमधील हिजबुल्लाहच्या लक्ष्यांवर हल्ले वाढवले आहेत.
इस्रायली हवाई दलाचा इराणच्या हवाई संरक्षण यंत्रणेवर हल्ला- (israeli Air Force attacks Iranian air defense system)
इस्रायली हवाई दल इराणच्या हवाई संरक्षण यंत्रणेवर सतत हल्ला करत आहे. इस्रायली लष्कराचे प्रवक्ते अविचाय अद्राई यांच्या मते, इस्रायली विमानांनी इराणी रडार प्रणाली आणि क्षेपणास्त्र प्रक्षेपकांना लक्ष्य केले आहे. या संरक्षण प्रणाली चालवणाऱ्यांनाही लक्ष्य करण्यात आले. इस्रायलने इराणी बॅलिस्टिक क्षेपणास्त्र स्थळांवर हल्ला केल्याचा दावाही केला आहे. इस्रायलने तेहरान-बैरूत येथे हवाई हल्ले केले. आतापर्यंत इराणमध्ये 742 लोक ठार झाले आहेत आणि 750 हून अधिक जखमी झाले आहेत.
होर्मुझ सामुद्रधुनी पूर्णपर्णे बंद- (Strait of Hormuz completely closed)
इराणच्या रिवोल्यूशनरी गार्ड्सनी एक मोठी घोषणा केलीय. त्यांनी सांगितले की होर्मुझची सामुद्रधुनी जहाजांसाठी बंद करण्यात आली आहे. इराणच्या सरकारी माध्यमांनी वृत्त दिले आहे की, त्यातून जाण्याचा प्रयत्न करणाऱ्या कोणत्याही जहाजाला आग लावली जाईल. हा निर्णय इराण आणि अमेरिका आणि इस्रायल यांच्यातील सुरू असलेल्या युद्धातील एक मोठे पाऊल आहे, ज्यामुळे जागतिक तेल व्यापारात व्यत्यय येऊ शकतो. परिणामी तेलांच्या किमतीचा भडका उडण्याची दाट शक्यता असून त्याचा परिणाम भारतीय अर्थव्यवस्थेवरही होण्याची दाट शक्यता आहे.
पहिल्या 30 तासात इराणवर 2000 हल्ले- (Israel vs Iran War)
आज सकाळपासून तेहरानमध्ये अमेरिका आणि इस्रायली हल्ले सुरू आहेत. 2000 हून अधिक लक्ष्यांवर हल्ला करण्यात आला आहे. इस्रायलने तेहरानमधील अधिक IRIB (इराणी प्रसारण) साइट्स नष्ट केल्या. इराणने इराकमधील एर्बिल येथील अमेरिकन तळावर ड्रोनने हल्ला करून प्रत्युत्तर दिला, ज्यामध्ये दोन अमेरिकन सैनिक ठार झाले. लेबनॉनमधील दक्षिणेकडील गावांमध्ये हजारो लोक पळून जात आहेत आणि वाहतूक कोंडीमुळे आज लेबनॉनमध्ये 20 जणांचा मृत्यू झाला आहे.
पंतप्रधान नरेंद्र मोदी यांनी पाच राष्ट्रप्रमुखांशी केली चर्चा- (Narendra Modi On Israel vs Iran War)
गेल्या 48 तासांत, भारताचे पंतप्रधान नरेंद्र मोदी यांनी भारतीय समुदायाच्या सुरक्षेबाबत आखाती देशांच्या अनेक राष्ट्रप्रमुखांशी चर्चा केली आहे. त्यांनी सुरुवातीला इस्रायलचे पंतप्रधान बेंजामिन नेतान्याहू आणि यूएईचे अध्यक्ष शेख मोहम्मद बिन झायेद अल नाह्यान यांच्याशी संवाद साधला. हवाई हल्ल्यांबद्दल आणि भारतीय समुदायाच्या सुरक्षेबद्दल चर्चा केली. पंतप्रधान मोदींनी बहरीनचे राजा हमद बिन अल खलिफा, सौदी अरेबियाचे क्राउन प्रिन्स एमबीएस आणि जॉर्डनचे राजा अब्दुल्ला बिन अल-हुसेन यांच्याशीही फोनवरून चर्चा केली. या कठीण काळात नरेंद्र मोदी यांनी या सर्व देशांच्या नेत्यांना पाठिंबा दर्शविला आहे.