French President Macron Offers to Host Ceasefire: फ्रान्सचे अध्यक्ष इमॅन्युएल मॅक्रॉन यांनी लेबनॉन आणि इस्रायलमधील युद्धविरामासाठी (Ceasefire) पॅरिसमध्ये चर्चा आयोजित करण्याची तयारी दर्शवली आहे. दोन्ही देशांनी चर्चेच्या टेबलावर यावे, असे आवाहन त्यांनी केले आहे. मॅक्रॉन यांनी शुक्रवारी लेबनॉनचे अध्यक्ष, पंतप्रधान आणि संसदेच्या अध्यक्षांशी चर्चा केली. या चर्चेनंतर मॅक्रॉन यांनी स्पष्ट केले की, लेबनॉन प्रशासन इस्रायलसोबत "थेट चर्चा" करण्यास तयार आहे. ही एक मोठी राजनैतिक घडामोडी मानली जात आहे. 28 फेब्रुवारी रोजी युद्धाला सुरुवात झाल्यापासून, इराणमध्ये अमेरिका आणि इस्रायलने केलेल्या हल्ल्यांमध्ये जवळपास 1450 लोकांचा बळी गेला आहे; तर दुसरीकडे, दक्षिण लेबनॉनमधील एका आरोग्य केंद्रावर इस्रायलने केलेल्या हल्ल्यात 12 वैद्यकीय कर्मचाऱ्यांचा मृत्यू झाला असून, इस्रायलच्या हल्ल्यांमुळे तेथील एकूण मृतांचा आकडा 773 वर पोहोचला आहे. ज्यामध्ये 103 मुलांचा समावेश आहे.
दोन्ही बाजूंना महत्त्वाचे आवाहन
इस्रायलने त्यांचे मोठे लष्करी हल्ले त्वरित थांबवावेत आणि शांततेची ही संधी गमावू नये, तसेच हिजबुल्लाने (Hezbollah) देखील संघर्षाची ही बेजबाबदार वाढ थांबवावी, असे आवाहन मॅक्रॉन यांनी केले आहे. मॅक्रॉन यांच्या मते, या चर्चेतून केवळ तात्पुरती शांतता नको, तर एक 'कायमस्वरूपी तोडगा' निघणे आवश्यक आहे. यामुळे लेबनॉनचे सार्वभौमत्व टिकून राहील आणि तिथल्या प्रशासनाला आपली जबाबदारी पार पाडता येईल.
युएईमधील अमेरिकेच्या तळांना लक्ष्य केले जाईल
दुसरीकडे, इराणच्या इस्लामिक रिव्होल्यूशनरी गार्ड कॉर्प्स (IRGC) ने म्हटले आहे की आता संयुक्त अरब अमिराती (UAE) मधील अमेरिकेच्या तळांना लक्ष्य केले जाईल. इराणच्या खार्ग बेटावर अमेरिकेच्या हल्ल्यानंतर हे विधान आले आहे. तस्निम न्यूज एजन्सीनुसार, IRGC ने म्हटले आहे की इराणला त्याच्या राष्ट्रीय सार्वभौमत्वाचे आणि प्रदेशाचे रक्षण करण्याचा अधिकार आहे. म्हणून, ते ज्या ठिकाणांवरून अमेरिकन क्षेपणास्त्र हल्ले केले गेले त्या ठिकाणांना लक्ष्य करू शकते. निवेदनात असेही म्हटले आहे की युएईच्या काही शहरांमधील बंदरे, गोदी आणि अमेरिकन लष्करी तळ हे संभाव्य लक्ष्य असू शकतात. कोणत्याही संभाव्य हल्ल्यात नुकसान टाळण्यासाठी IRGC ने युएईच्या लोकांना बंदरे, गोदी आणि अमेरिकन लष्करी क्षेत्राजवळील क्षेत्रे रिकामी करण्याचे आवाहन केले आहे.
बहरीनने 124 क्षेपणास्त्रे आणि 203 ड्रोन पाडले
दुसरीकडे, बहरीनच्या हवाई संरक्षण यंत्रणेने म्हटले आहे की इराणशी युद्ध सुरू झाल्यापासून त्यांच्या हवाई संरक्षण यंत्रणेने 124 क्षेपणास्त्रे आणि 203 ड्रोन रोखले आहेत आणि नष्ट केले आहेत. संरक्षण दलांच्या मते, इराणने केलेल्या या हल्ल्यांमध्ये अमेरिकेचे लष्करी तळ आणि या प्रदेशातील सहयोगी देशांना लक्ष्य करण्यात आले. बहरीनमध्ये अमेरिकन नौदलाचे पाचवे फ्लीट मुख्यालय देखील आहे. अधिकाऱ्यांनी सांगितले की देशाची हवाई संरक्षण प्रणाली सक्रियपणे कार्यरत आहे आणि इराणी हल्ल्यांना प्रत्युत्तर देत आहे.
इतर महत्वाच्या बातम्या