Iran Israel War : इराण वि. इस्त्रायल-अमेरिका! पाकिस्तान इराणसोबत, तर इटलीच्या मेलोनींचीही स्पष्ट भूमिका; कोण कुणाच्या बाजूने?
Iran Israel Conflict : अमेरिका-इस्त्रायलच्या हल्ल्यानंतर आणि अयातुल्ला अली खामेनी यांच्या मृत्यूनंतर युरोप, रशिया, चीन, पाकिस्तान आणि GCC देशांनी तीव्र प्रतिक्रिया नोंदवली.
Iran Israel Conflict : अमेरिका आणि इस्त्रायलने इराणवर केलेल्या हल्ल्यानंतर आणि तेहरानकडून झालेल्या प्रत्युत्तरात्मक कारवाईनंतर जागतिक पातळीवर तीव्र प्रतिक्रिया उमटल्या आहेत. विशेषतः इराणचे सर्वोच्च नेते अयातुल्ला अली खामेनी यांच्या मृत्यूच्या पार्श्वभूमीवर अनेक देशांनी आपली भूमिका स्पष्ट केली आहे.
अमेरिका-इराण युद्धाच्या पार्श्वभूमीवर भारताने शांततेची भूमिका कायम ठेवली आहे. युद्धापेक्षा चर्चा आणि मध्यस्थीतून मार्ग काढावं असं आवाहन पंतप्रधान नरेंद्र मोदींनी दोन्ही बाजूंना केलं आहे. तसेच आखाती देशात अडकलेल्या भारतीयांच्या सुखरुप सुटकेचंही आश्वासन त्यांनी दिलं.
European Reaction : आंतरराष्ट्रीय कायद्याचे पालन करण्याचे आवाहन
युरोपीय आयोगाच्या अध्यक्षा उर्सुला वॉन डेर लेयेन यांनी इराणच्या ‘हत्यारे शासनाविरुद्ध’ युरोपियन युनियनने व्यापक निर्बंध लावल्याची आठवण करून दिली. सर्व पक्षांनी संयम बाळगावा, नागरिकांचे संरक्षण करावे आणि आंतरराष्ट्रीय कायद्याचा पूर्ण सन्मान करावा, असे त्यांनी म्हटलं आहे.
इटलीच्या पंतप्रधान जॉर्जिया मेलोनी यांनी इराणच्या सामान्य जनतेबरोबर एकजूट दर्शवली. नागरिक आणि राजकीय अधिकारांचा सन्मान कायम ठेवण्याची मागणी त्यांनी केली असून तणाव कमी करण्यासाठी सहयोगी आणि प्रादेशिक नेत्यांशी चर्चा करणार असल्याचे स्पष्ट केले.
ऑस्ट्रेलियाचे पंतप्रधान अँथनी अल्बनीज यांनी दमनाविरुद्ध लढणाऱ्या इराणी जनतेला पाठिंबा दर्शवला आणि इराणला अण्वस्त्रे मिळू नयेत यासाठी अमेरिकेच्या प्रयत्नांना समर्थन दिले.
GCC Meeting : आखाती देशांची तीव्र निषेध
गल्फ कोऑपरेशन कौन्सिलच्या (GCC) सदस्य देशांची रविवारी बैठक झाली. यूएई, बहरीन, सौदी अरेबिया, ओमान, कतार आणि कुवैत या देशांनी इराणी हल्ल्यांची तीव्र निषेध केला. नागरी भाग आणि निवासी क्षेत्रांना लक्ष्य करण्यात आल्याचा आरोप करत त्यांनी इराणवर सार्वभौमत्व आणि आंतरराष्ट्रीय कायद्याचे उल्लंघन केल्याचा ठपका ठेवला.
जीसीसीने इराणला हल्ले थांबवण्याचे आणि संवादाचा मार्ग स्वीकारण्याचे आवाहन केले. मात्र गरज पडल्यास सुरक्षेसाठी सर्व आवश्यक पावले उचलण्याचा इशाराही दिला.
Iran Foreign Minister Response : शेजारी देशांना लक्ष्य नाही
इराणचे परराष्ट्रमंत्री अब्बास अराघची यांनी आखाती देशांवर हल्ला केल्याचा आरोप फेटाळला. त्यांनी स्पष्ट केले की, आखातातील शेजाऱ्यांना नव्हे तर त्या देशांतील अमेरिकन तळांना लक्ष्य करण्यात येत आहे.
Russia and China Stand : सार्वभौमत्वाच्या उल्लंघनाचा आरोप
रशियाचे राष्ट्राध्यक्ष व्लादिमीर पुतिन यांनी खामेनी यांच्या मृत्यूबद्दल शोक व्यक्त केला. त्यांनी या हत्येला ‘मानव नैतिकता आणि आंतरराष्ट्रीय कायद्याविरुद्धची हत्या’ असे संबोधले. रशियन परराष्ट्र मंत्रालयाने तात्काळ राजकीय आणि राजनैतिक तोडग्याचा मार्ग स्वीकारण्याची मागणी केली.
चीननेही अमेरिका आणि इस्त्रायलच्या कारवाईचा तीव्र निषेध केला. संयुक्त राष्ट्रांच्या सनदेत नमूद केलेल्या उद्दिष्टे आणि तत्त्वांच्या विरोधात ही कारवाई असल्याचे चीनने म्हटलं. इराणच्या सार्वभौमत्वाचे गंभीर उल्लंघन झाल्याचा आरोप करत तात्काळ लष्करी कारवाई थांबवण्याचे आणि तणाव न वाढवण्याचे आवाहन केले.
Pakistan Reaction : खामेनींच्या मृत्यूवर शोक
पाकिस्तानचे पंतप्रधान शहबाज शरीफ यांनी अयातुल्ला अली खामेनी यांच्या मृत्यूवर दुःख व्यक्त केले. पाकिस्तान सरकार आणि जनता या दुःखाच्या काळात इराणसोबत असल्याचे त्यांनी सांगितले. आंतरराष्ट्रीय कायद्याचे उल्लंघन झाल्याची चिंता व्यक्त करत कोणत्याही देशाच्या प्रमुखाला लक्ष्य करणे ही चुकीची परंपरा असल्याचे त्यांनी नमूद केले.
पाकिस्तानचे संरक्षणमंत्री ख्वाजा आसिफ यांनीही इराणवरील हल्ले ‘अत्यंत दुर्दैवी’ असल्याचे म्हटले असून संयुक्त राष्ट्रांत पाकिस्तानने या कारवाईची स्पष्ट निंदा केल्याचे सांगितले.
Global Tension Rising : मध्यपूर्वेतील तणाव वाढला
इराण-इस्त्रायल संघर्षामुळे मध्यपूर्वेत तणाव शिगेला पोहोचला आहे. विविध देशांनी शांततेचे आवाहन केले असले तरी परिस्थिती अधिक चिघळण्याची भीती व्यक्त केली जात आहे. पुढील काही दिवसांत राजनैतिक प्रयत्न किती यशस्वी ठरतात यावरच या संघर्षाचे भवितव्य अवलंबून राहणार आहे.
ही बातमी वाचा:
महत्त्वाच्या बातम्या
