आम्हाला न्याय पाहिजे, भीक नको; खंडणीविरोधी पथकाच्या कार्यालयापुढे पूर्णेकरांचा संताप, नरेश म्हस्केही पोलीस ठाण्यात

Thane Honeytrap Case : मुंबईतील प्रसिद्ध मॉडेलविरोधात 1.39 कोटींच्या खंडणीचा गुन्हा! उद्योगपतीला ब्लॅकमेल करून उकळले कोट्यवधी रुपये

सचिन गाड — Fri, 30 Oct 2026 22:00:26 +0530

मुंबई : सोशल मीडियावर 10 लाखांपेक्षा जास्त फॉलोअर्स असलेल्या मुंबईतील एका प्रसिद्ध मॉडेलविरोधात ठाण्यातील कासारवडवाली पोलीस ठाण्यात 1 कोटी 39 लाख रुपयांच्या खंडणीचा गुन्हा दाखल करण्यात आला आहे. एका व्यावसायिकाला हनीट्रॅपमध्ये अडकवून, बदनामीची तसेच खोट्या गुन्ह्यात अडकवण्याची धमकी देऊन त्याच्याकडून कोट्यवधी रुपये उकळल्याचा आरोप करण्यात आला आहे. व्यावसायिकाने दिलेल्या तक्रारीनुसार, संबंधित मॉडेलने त्याला प्रेमाच्या जाळ्यात ओढून आणि खासगी फोटो आणि व्हिडीओचा वापर करून ब्लॅकमेल करण्यास सुरुवात केली होती.

Flats Cars And Foreign Trips : आलिशान कार, फ्लॅट आणि परदेश वारीचा खर्च

कासारवडवाली पोलिसांत दाखल झालेल्या तक्रारीनुसार आणि एफआयआरमधील दाव्यांनुसार, या मॉडेलने व्यावसायिकाकडून विविध महागड्या गरजांसाठी मोठी रक्कम उकळली आहे.

तक्रारदाराकडून खालील गोष्टींसाठी पैसे उकळल्याचा आरोप आहे:

आलिशान मालमत्ता: मुंबईतील आलिशान फ्लॅट, ऑफिससाठी जागा आणि बंगळुरूमधील मालमत्ता.

वाहने: आलिशान MG Hector कार.

परदेश दौरे: बँकॉक, व्हिएतनाम, जॉर्जिया आणि बाकू यांसारख्या देशांतील विविध अलिशान परदेश दौऱ्यांचा सर्व खर्च.

Counter Rape FIR : दबाव आणण्यासाठी अत्याचाराचा गुन्हा?

या प्रकरणाला आता एक वेगळे वळण मिळाले आहे. संबंधित मॉडेलने याआधी व्यावसायिकाविरोधात मुंबईतील वर्सोवा पोलीस ठाण्यात पाठलाग करणे, मारहाण आणि शारीरिक अत्याचारासारखे गंभीर गुन्हे दाखल केले आहेत. मात्र, हे सर्व गुन्हे केवळ आपल्या पक्षकारावर दबाव आणण्यासाठी आणि खंडणीची रक्कम वसूल करण्यासाठीच दाखल करण्यात आल्याचा दावा तक्रारदार व्यावसायिकाच्या वकिलांनी केला आहे.

Thane Model Extortion Case : कासारवडवाली पोलिसांकडून तपास सुरू

संबंधित मॉडेलचे सोशल मीडियावर 10 लाखांहून अधिक फॉलोअर्स असल्याने या हाय-प्रोफाइल प्रकरणामुळे सोशल मीडिया आणि मनोरंजन विश्वात मोठी खळबळ उडाली आहे. कासारवडवाली पोलीस या प्रकरणातील आर्थिक व्यवहार, बँक खाती आणि डिजिटल पुराव्यांची तपासणी करत असून पुढील सखोल तपास सुरू आहे.

ही बातमी वाचा:

Pimpri Chinchwad : लंडनमध्ये MBA साठी गेली, पण गुप्तपणे भारतात परतली, पिंपरीतील अलिशान फ्लॅटमध्ये 34 वर्षीय मुग्धाचा मृतदेह कुजला, झोमॅटो-ब्लिंकिटमुळे शोध

Thane Crime news: पोलिसांनी सूर्यफूल तेल लावून लघवीच्या जागेवर मारलं,अंतर्वस्त्र डोक्यात घातली, राम पूर्णेकरांचा गंभीर आरोप, आदित्य ठाकरेंच्या आंदोलनातील तरुणांना ठरवून टार्गेट केल्याचा दावा

हितेश पांचाळ — Fri, 30 Oct 2026 15:12:35 +0530

Ram Purnekar Thane Police Crime news: ठाकरे गटाचे विभागप्रमुख प्रदीप पूर्णेकर यांच्या हत्याप्रकरणावरुन राजकीय वातावरण प्रचंड तापले असताना राम पूर्णेकर यांनी शुक्रवारी ठाणे पोलिसांवर गंभीर आरोप केले. आदित्य ठाकरे (Aaditya Thackeray) हे गुरुवारी ठाण्यात पूर्णेकर कुटुंबाच्या भेटीला गेले होते. यानंतर त्यांनी ठाणे पोलीस (Thane Police) आयुक्तांची भेट घेतली होती. यावेळी त्यांच्यासोबत असणाऱ्या दोन तरुणांना कापुरबावडी पोलिसांनी शोधून पोलीस ठाण्यात आणले आणि त्यांना बेदम मारहाण केल्याचा आरोप राम पूर्णेकर (Ram Purnekar) यांनी केला. या तरुणांना नग्न करण्यात आले. त्यांची अंतर्वस्त्रही काढण्यात आली होती, पोलिसांनी त्यांची अंतर्वस्त्र काढून एकमेकांच्या डोक्यावर घातल्याचा दावा पूर्णेकर यांनी केला. राम पूर्णेकर या तरुणांना घेऊन तक्रार दाखल करण्यासाठी कापुरबावडी पोलीस ठाण्यात गेले होते. (Thane Crime news)

काल दुपारी आदित्य ठाकरे आणि संजय राऊत यांनी पूर्णेकर कुटुंबीयांची भेट घेतली होती होती. या भेटीनंतर पूर्णेकर समर्थकांना पोलिसांनी ताब्यात घेतले होते. त्यांच्यावर पोलिसांनी कापुरबावडी पोलीस ठाण्यात अमानुष अत्याचार केल्याचा आरोप पूर्णेकर कुटुंबीयांकडून करण्यात आला. राम पूर्णेकर शुक्रवारी आपल्या वकिलासह या तरुणांना घेऊन कापुरबावडी पोलीस ठाण्यात आले होते. यावेळी राम पूर्णेकर यांनी प्रसारमाध्यमांशी संवाद साधताना म्हटले की, पोलिसांनी अर्जुन पुंदरे या तरुणाला काल ताब्यात घेतले होते. त्याच्यासोबत आणखी काही तरुण होते. कापुरबावडी पोलीस ठाण्यात नेल्यानंतर त्यांचे कपडे काढण्यात आली. त्यांच्या अंगावर अंतर्वस्त्रही ठेवण्यात आली नव्हती. पोलिसांनी या सगळ्यांची अंतर्वस्त्र काढून एकमेकांच्या डोक्यावर घातल्याचा आरोप अर्जुन पुंदरे याने केला. तसेच पोलिसांनी सूर्यफुल तेल लावून या तरुणांच्या शरीराच्या नाजूक भागावर, लघवीच्या ठिकाणी मारहाण केल्याचा खळबळजनक आरोप राम पूर्णेकर यांनी केला.

आम्हाला कापूरबावडी पोलीस ठाण्यात पकडून आणले. फक्त सांगण्यात आले होते, एका व्यक्तीचा फोटो दाखवला जाईल, त्याला ओळखता का याची तपासणी करायची आहे. त्यानंतर कापूरबावडी पोलीस ठाण्यात आम्हाला आणले. अश्लील प्रकारे आम्हाला टॉर्चर केले कपडे काढून साध्या कपड्यांवरील व्यक्ती आम्हाला यायचे आणि मारहाण करायचे बेदम मारहाण केली पट्ट्यांनी मारहाण केली, असा आरोप तरुणांनी केला. राम पूर्णेकर यांनी सांगितले की, एका तरुणाच्या शरीराच्या चुकीच्या जागी पोलिसांनी बोट घातले. लघवीच्या जागेवर सूर्यफुल तेल लावण्यात आले. एका पोलिसाच्या पार्श्वभागात पोलिसांनी बोट घातले. आमच्या वकिलांनी पोलिसांना पत्र दिले आहे. संबंधितांवर कठोर कारवाई करण्याचे आश्वासन वरिष्ठ पोलीस अधिकाऱ्यांनी दिले आहे.

राम पूर्णेकर या तरुणांना घेऊन पोलीस ठाण्यात आले तेव्हा तिथे वरिष्ठ अधिकारी उपस्थित होते. कथित पोलीस अत्याचाराच्या आरोपांमुळे पूर्णेकर समर्थक आक्रमक झाले आहेत. या प्रकरणाची चौकशी करुन संबंधित पोलिसांवर कारवाई करण्याची मागणी पूर्णेकर यांच्याकडून करण्यात आली आहे. या सगळ्यावर आता ठाणे पोलिसांकडून स्पष्टीकरण देण्यात येणार का, हे बघावे लागेल.

आणखी वाचा

Meenakshi Shinde and Pradeep Purnekar: मिनाक्षी शिंदेंना दुहेरी धक्का, आधी राजीनामा द्यावा लागला, नंतर शिवसेनेच्या नगरसेवकांनी साथही सोडली, टेंभी नाक्यावर कोणीच फिरकलं नाही

Anand Paranjpe : मराठी भाषा खूप समृद्ध, आमच्याकडे पण खूप मोठा शब्दकोश, पण....; एकनाथ शिंदेंवरील टीकेवरून आनंद परांजपेंचा महायुतीतील मित्रपक्षांना सल्लावजा सूचक इशारा

हितेश पांचाळ — Fri, 30 Oct 2026 14:38:40 +0530

Anand Paranjpe : ज्या प्रकारचे शब्द भाजप प्रवक्त्यांनी वापरले ते महायुतीमध्ये योग्य नाही. मराठी भाषा खूप समृद्ध आहे, आमच्याकडे पण मराठी शब्दांचा खूप मोठा शब्दकोश आहे. आम्ही देखील ते वापरू शकतो. पण दोस्तीत कुस्ती करायची नसते आणि म्हणून महायुतीमध्ये कुठल्याही पक्षावर शिवसेनेच्या प्रवक्त्यांकडून किंवा शिवसेनेच्या नेत्यांकडून कुठल्याही प्रकारची टीका होणार नाही, हीच अपेक्षा आम्ही भारतीय जनता पार्टी (BJP)आणि राष्ट्रवादी काँग्रेस पक्षाकडून (NCP) ठेवतो. युती टिकावी हे मला महत्वाचं वाटतं. त्यामुळे प्रवीण दरेकर यांना असलेल्या आपल्या मर्यादा ओलांडून टीका करू नये, असा सल्लावजा सूचक इशारा शिवसेनेचे प्रवक्ते आनंद परांजपे (Anand Paranjpe) यांनी महायुतीतील मित्र पक्षांना दिला आहे.

जिथे-जिथे नैसर्गिक संकट येते तिथे एकनाथ शिंदे धावून जातात. महाराष्ट्राच नाही तर केरळ, जम्मू, नेपाळ अशा अनेक ठिकाणी धावून ते गेलेत. दसरा मेळावा देखील समर्पित केला. बळीराजाच्या मुलींचे विवाह करून त्यांना आधार देणार आहेत. अनेक गावात आमचा शोध सुरु असल्याचीही माहिती त्यांनी दिली.

Anand Paranjpe on Mahayuti: दोस्तीमधे कुस्ती कुणी करू नये, तीच अपेक्षा आम्ही मित्रपक्षाकडून करतोय

दरम्यान, संजय गायकवाड यांचा शेतकऱ्यांवरील वक्तव्यावर बोलताना संजय गायकवाड म्हणाले की, कोणत्याही कार्यत्यांनी असे वक्त्यव्य करू नये, असे आदेश एकनाथ शिंदे यांनी दिले आहे. भविष्यातही असे कोणी बोलू नये, असे आदेश त्यांनी दिले आहेत. कालच एकनाथ शिंदे यांनी स्पष्ट केले, की चार ठिकाणी युतीधर्म पाळला. आम्ही युतीधर्म पाळत आलोय. कोणत्याही प्रकाराची टीका कुणी करू नये. दोस्तीमधे कुस्ती कुणी करू नये, तीच अपेक्षा आम्ही मित्रपक्षाकडून करतोय. आज देखील जी भाषा वापरली ती मित्र पक्षाने पाळायला हवी होती. शिवसेनेचे मुख्य नेते उपमुख्यमंत्री एकनाथरावजी शिंदे असतील, राष्ट्रवादीच्या नेत्या व उपमुख्यमंत्री सुनेत्राताई पवार असतील त्यावेळेला नक्कीच महायुतीच्या अधिक समन्वयावर चर्चा होईल. पण मित्रपक्षांनी देखील शिवसेनेवर कुठल्याही प्रकारचे आरोप करणं त्यांच्या प्रवक्त्यांनी किंवा नेत्यांनी टाळलं पाहिजे. असेही शिवसेना प्रवक्ते आनंद परांजपे म्हणाले.

शिवसेनेच्या कुठल्याही प्रवक्ता, पदाधिकारी किंवा नेत्यांनी मित्र पक्षातील पक्षावर कुठल्याही प्रकारची टीका करू नये, भविष्यामध्ये अधिक प्रकारचं तिन्ही पक्षांमध्ये समन्वय तसा राहील याची वरिष्ठ पातळीवर चर्चा होईल. हीच अपेक्षा आम्ही आमच्या दोन मित्र पक्षांकडून पण ठेवतो. असेही ते म्हणाले.

Anand Paranjpe: कृतीतून एक, पुस्तकातनं एक, आणि सकाळच्या पत्रकार परिषदमध्ये टीका, अशी विसंगती

अनेक वेळेला खासदार संजय राऊत यांनी देशाचे लोकप्रिय पंतप्रधान नरेंद्र मोदी साहेबांची स्तुती केलेली आहे. अनेक वेळेला शिवसेना उभाठाने देखील लोकसभेमध्ये राष्ट्रहिताच्या विषयांवर एनडीए सरकारच्या बाजूने मतदान देखील केलेला आहे. म्हणून कृतीतून एक, पुस्तकातनं एक सकाळच्या पत्रकार परिषदमध्ये टीका अशी विसंगती कायमच खासदार संजय राऊत यांच्या बद्दल दिसते. असेही आनंद परांजपे म्हणाले.

Sanjay Gaikwad: शेतकऱ्यांबाबतचं वादग्रस्त वक्तव्य; टीकेची झोड उठताच एकनाथ शिंदेंकडून 'करेक्ट कार्यक्रम? आता संजय गायकवाडांचा यू-टर्न, म्हणाले....

Meenakshi Shinde and Pradeep Purnekar: मिनाक्षी शिंदेंना दुहेरी धक्का, आधी राजीनामा द्यावा लागला, नंतर शिवसेनेच्या नगरसेवकांनी साथही सोडली, टेंभी नाक्यावर कोणीच फिरकलं नाही

सुरज सावंत — Fri, 30 Oct 2026 13:56:48 +0530

Meenakshi Shinde and Pradeep Purnekar: ठाण्यातील ठाकरे गटाचे विभागप्रमुख प्रदीप पूर्णेकर यांच्या हत्याप्रकरणामुळे वादाच्या भोवऱ्यात सापडलेल्या शिंदे सेनेच्या नेत्या मिनाक्षी शिंदे (Meenakshi Shinde) या सध्या प्रचंड संकटात सापडल्या आहेत. एकीकडे त्यांना पक्षांतर्गत दबाव वाढल्यामुळे शिवसेनेतील ठाणे जिल्हा महिला आघाडीच्या प्रमुखपदाचा राजीनामा द्यावा लागला होता. एवढेच नव्हे तर मिनाक्षी शिंदे यांच्याविरोधात ठाण्यातील पक्षसंघटनेतच प्रचंड नाराजी असल्याची माहितीही समोर आली आहे. (Thane Crime news)

गुरुवारी आदित्य ठाकरे आणि संजय राऊत (Sanjay Raut) हे दोन्ही नेते प्रदीप पूर्णेकरांच्या कुटुंबीयांना भेटण्यासाठी त्यांच्या घरी गेले होते. त्याच्या आदल्याच दिवशी पूर्णेकर समर्थकांनी नौपाडा पोलीस ठाणे आणि घोडबंदर रस्त्यावर मोठे आंदोलन केले होते. त्यावेळी पूर्णेकर कुटुंबीयांनी थेट एकनाथ शिंदे यांच्यावर गंभीर आरोप केले होते. यानंतर ठाण्यातील राजकीय वातावरण प्रचंड तापले होते. आदित्य ठाकरे आणि संजय राऊत ठाण्यात येणार असल्याने शिंदे सेनेने सर्व नगरसेवकांना टेंभी नाका येथे जमायला सांगितले होते. मात्र, मोजके नगरसेवक वगळता कोणीही टेंभी नाक्याला गेले नाहीत. यानंतर मिनाक्षी शिंदे यांच्याविरोधात पक्षांतर्गत प्रचंड खदखद असल्याची माहिती समोर आली आहे.

ठाकरेंच्या विरोधात काल शिंदे सेनेकडून ठाण्यात टेंभी नाका येथे जमण्याच्या सूचना असताना अनेक नगरसेवकांनी याठिकाणी येणे टाळले. टेंभी नाक्यावर काल कल्याण, डोंबिवली आणि मुंबईतील काही नगरसेवक होते. मात्र, अनेक नगरसेवकांनी याठिकाणी येणे टाळले होते. 'आम्ही एकनाथ शिंदे यांच्यासाठी येऊ, मिनाक्षी शिंदेंसाठी येणार नाही', असे या नगरसेवकांचे म्हणणे आहे. मिनाक्षी शिंदे यांच्या गंभीर आरोप होत असताना स्वतःहून तिने राजीनामा आधीच द्यायला हवा होता. पक्षाची बदनामी झाल्यानंतर राजीनामा देण्यात काय अर्थ आहे, असे मत खासगीत काही नगरसेवकांनी बोलून दाखवले. एका व्यक्तीमुळे पक्षाची नाहक बदनामी ही राज्यभरात झाली, त्या नाराजीतूनच अनेक नगरसेवक कालच्या ठाणे टेंभी नाका येथील गर्दीत नव्हते, अशी सूत्रांची माहिती आहे.दरम्यान, मिनाक्षी शिंदे त्यांच्या महिला आघाडी पदाचा राजीनामा दिल्यानंतर लवकरच माध्यमांसमोर सविस्तर बोलणार आहेत.

Thane News: आदित्य ठाकरेंसोबत ठाण्यात आलेल्यांना नग्न करुन मारहाण, राम पूर्णेकरांचा गंभीर आरोप

प्रदीप पूर्णेकर यांच्या कुटुंबीयांना भेटायला गुरुवारी आदित्य ठाकरे ठाण्यात आले होते. ते ठाण्यात आले असताना जे-जे शिवसैनिक तिकडे आले होते, त्यांना शोधून मारहाण करण्यात आल्याचा आरोप पूर्णेकर कुटुंबाने केला. पूर्णेकर कुटुंब शुक्रवारी कापुरबावडी पोलीस ठाण्यात पोहोचले. आदित्य ठाकरे काल ठाण्यात आले होते तेव्हा जे जे तिथे उपस्थित होते त्यांना शोधून शोधून मारहाण केली. आंदोलन करणाऱ्या मुलांना नग्न करुन मारण्यात, असा आरोप राम पूर्णेकर यांनी केला आहे. मारहाण झालेल्या मुलांना घेऊन राम पूर्णेकर हे कापुरबावडी पोलीस ठाण्यात दाखल झाले आहेत.

आणखी वाचा

Meenakshi Shinde on Pradeep Purnekar death Case: तुम्ही प्रदीप पूर्णेकरांच्या मृत्यूनंतर कुटुंबीयांच्या सांत्वनासाठी का गेला नाहीत? मिनाक्षी शिंदे म्हणाल्या जायची इच्छा असली तरी....

Sanjay Gaikwad: मोठी बातमी: शेतकऱ्यांबाबतचं 'ते' वक्तव्य भोवलं, एकनाथ शिंदे संजय गायकवाडांवर संतापले, शिवसेनेतून निलंबित करणार?

अक्षय भाटकर, एबीपी माझा — Fri, 30 Oct 2026 09:06:10 +0530

Sanjay Gaikwad and Eknath Shinde: वादग्रस्त वक्तव्यांसाठी कुप्रसिद्ध असणारे बुलढाण्यातली शिवसेना आमदार संजय गायकवाड यांच्यावर पक्षाकडून मोठी कारवाई होण्याची शक्यता आहे. आमदार संजय गायकवाड (MLA Sanjay Gaikwad) यांनी अलीकडेच शेतकऱ्यांबाबत (Farmers) बोलताना एक वादग्रस्त टिप्पणी केली होती. त्यांच्या या वक्तव्यानंतर टीकेची प्रचंड झोड उठली होती. यामुळे उपमुख्यमंत्री एकनाथ शिंदे (Eknath Shinde) हे गायकवाड यांच्यावर प्रचंड संतापले असून आता त्यांच्यावर निलंबनाची कारवाई होणार असल्याची माहिती सूत्रांनी दिली आहे. (Maharashtra Politics news)

शेतकऱ्यांच्या प्रत्येक संकटात शिवसेना मदतीला धावून जाते. राज्यातील दुष्काळग्रस्त शेतकऱ्यांच्या मदतीसाठी शिवसेनेने व्यापक मदत मोहीम सुरू केली आहे. शेतकरी कुटुंबांतील लाडक्या बहिणींना 25 हजार शिलाई मशिन्सचे वाटप केले जात आहे. शेतकऱ्यांच्या मुलींना 25 हजार सायकली दिल्या जात आहेत. दसरा मेळाव्यात शिवसेनेने 100 ट्रक अन्नधान्य दुष्काळग्रस्त भागात पाठवले आहे. गुरुवारी आणखी २४ ट्रक धान्य पाठवण्यात आले. शिवसेना शेतकऱ्यांच्या मदतीसाठी ठोस काम करत असताना संजय गायकवाड यांच्या वादग्रस्त विधानामुळे शिवसेनेची प्रतिमा नाहक मलीन होत असल्याची पक्षातील नेते, पदाधिकारी आणि कार्यकर्त्यांची भावना आहे. शेतकरी आपला अन्नदाता असून त्याच्याविरोधातील कोणतीही विधाने खपवून घेतली जाणार नाहीत, अशी तंबी देत शिंदे संजय गायकवाड यांच्यावर शिवसेना पक्षातून निलंबनाची कारवाई करण्याचे आदेश एकनाथ शिंदे यांनी दिल्याची माहिती सूत्रांकडून देण्यात आली आहे.

Sanjay Gaikwad on Farmer: संजय गायकवाड नेमकं काय म्हणाले?

बुलढाण्याचे शिवसेनेचे आमदार संजय गायकवाड (Sanjay Gaikwad) यांनी शेतकरी आत्महत्या विषयावर उद्विग्न प्रतिक्रिया देत भाष्य केलं आहे. शेतकरी कुटुंबाला वाऱ्यावर सोडून आत्महत्या करतो. त्याला काही अडचण असेल तर त्याने आमदार, खासदार यांना चिठ्ठी लिहावी. आम्ही सर्व मिळून त्याची मदत करू. असा सल्लाही आमदार संजय गायकवाड यांनी यावेळी दिलाय. आत्महत्या करणाऱ्या शेतकऱ्याच्या अंत्यविधीला किंवा मयताला कोणीही जाऊ नये. जेव्हा लोकांना समजेल की, आपल्या मृतदेहाला जनावरे खातात आणि आपल्या मृतदेहाचे काय होते, तेव्हा ते आत्महत्या करणे थांबवतील. त्यांनी शेतकऱ्यांना आवाहन केले की, काही अडचण असल्यास त्यांनी आत्महत्या न करता सरकारला, आपल्या आमदार किंवा खासदारांना चिठ्ठी लिहून सांगावे. सर्वजण मिळून मदतीला धावून येतील. शेतकरी आत्महत्या करून आपल्या लहान मुलांचे आणि पत्नीचे आयुष्य उद्ध्वस्त करतात, असे संजय गायकवाड यांनी म्हटले होते.

Meenakshi Shinde Resignation: मीनाक्षी शिंदेंचा राजीनामा

प्रदीप पूर्णेकर हत्याप्रकरणामुळे वादाच्या भोवर्‍यात सापडलेल्या शिंदे सेनेच्या नेत्या मिनाक्षी शिंदे यांनी पमुख्यमंत्री आणि शिवसेनेचे मुख्यनेते एकनाथ शिंदे यांना पत्र लिहून पक्षातील आपल्या पदाचा राजीनामा दिला. मिनाक्षी शिंदे या ठाणे जिल्हा महिला आघाडीच्या प्रमुख होत्या. पक्षाच्या अंतर्गत दबावामुळं किंवा इतर कारणांमुळं मीनाक्षी शिंदे यांनी राजीनामा दिला आहे. आता मीनाक्षी शिंदे या ठाणे महापालिकेच्या नगरसेवक म्हणून कार्यरत असतील.

आणखी वाचा

काही लोक आपल्याच मस्तीत असतात, पक्षश्रेष्ठींनाही महत्त्व देत नाहीत; श्वेता महालेंची पुन्हा संजय गायकवाडांवर टीका

Pradeep Purnekar : दिशा सालियन प्रकरणात आदित्य ठाकरेंना अटक करा, सीबीआयकडे मागणी करणार, अमित शाहांना भेटणार: नरेश म्हस्के

एबीपी माझा ब्युरो — Thu, 29 Oct 2026 18:46:00 +0530

ठाणे : ठाकरेंच्या शिवसेनेचे ठाण्यातील विभागप्रमुख प्रदीप पूर्णेकर यांच्या हत्या प्रकरणावरून दोन्ही शिवसेनेमध्ये आरोप-प्रत्यारोप होत आहेत. प्रदीप पूर्णेकर प्रकरणात एकनाथ शिंदे हे कोणाला वाचवण्याचा प्रयत्न करत आहेत असा प्रश्न आदित्य ठाकरे यांनी विचारला. त्यावर आता शिवसेनेचे खासदार नरेश म्हस्के यांनी प्रत्युत्तर दिलं आहे. आदित्य ठाकरे यांचे नाव दिशा सालियन प्रकरणात आरोपी म्हणून आहे. त्यांना अटक करा अशी मागणी आपण सीबीआयकडे करणार असल्याचं ते म्हणाले. तसेच या प्रकरणात कारवाई व्हावी यासाठी केंद्रीय गृहमंत्र्यांना भेटणार असल्याचंही म्हस्के म्हणाले.

प्रदीप पूर्णेकर प्रकरणात शिंदेंच्या शिवसेनेच्या नगरसेविका मीनाक्षी शिंदे यांना अटक करा, अशी मागणी आदित्य ठाकरे यांनी केली. तसेच एकनाथ शिंदे हे मीनाक्षी शिंदेंना का वाचवत आहेत? असा सवालही त्यांनी केला.

आदित्य ठाकरे यांच्या आरोपांना प्रत्युत्तर देताना खासदार नरेश म्हस्के म्हणाले की, "एकनाथ शिंदे यांच्यावर आरोप करण्याचा कोणताही अधिकार आदित्य ठाकरे यांना नाही. आदित्य ठाकरे यांचे नाव दिशा सालियन प्रकरणात आरोपी म्हणून आहे. दिशा सालियन यांच्या वडिलांनी तसे आरोप केले आहेत. सुशांत सिंह राजपूत प्रकरणातही त्यांचे नाव आहे. ठाण्यात ऑटोमोबाईलचे दुकान असलेल्या मनसुख हिरेन प्रकरणाशी त्यांचा संबंध आहे. असं असताना शिंदेंचे नाव त्यांनी घेऊ नये."

आदित्य ठाकरे यांना सीबीआयने अटक करावी यासाठी शिवसेना मुंबईत मोर्चा काढणार असल्याचं नरेश म्हस्के म्हणाले. आदित्य ठाकरे यांना अटक करावी यासाठी आम्ही केंद्रीय गृहमंत्र्यांची भेट घेऊ, असंही म्हस्के म्हणाले.

ठाण्यात तणावाचं वातावरण

प्रदीप पूर्णेकर हत्येला एक महिना पूर्ण झाल्यावर आज ठाण्यात तणावाचं वातावरण आहे. आदित्य ठाकरेंनी ठाणे पोलीस आयुक्तांची भेट घेतली. आदित्य ठाकरे आणि संजय राऊत यांनी पोलीस आयुक्तांशी तपासासंदर्भात चर्चा केली. त्याआधी त्यांनी पूर्णेकर कुटुंबाची भेटही घेतली. दुसरीकडे आनंद आश्रम इथे शिवसैनिकांनी मोठी गर्दी केली. दिशा सालियन प्रकरणी आदित्य ठाकरेंना अटक करा अशी मागणी नरेश म्हस्केंनी केली.

मीनाक्षी शिंदे यांचा राजीनामा

प्रदीप पूर्णेकरांच्या हत्येप्रकरणी सातत्यानं पूर्णेकर कुटुंबीय आणि ठाकरे सेनेच्या निशाण्यावर असणाऱ्या मीनाक्षी शिंदेंनी शिवसेना महिला आघाडी प्रमुखपदाचा राजीनामा दिला आहे. नेतृत्वाची बदनामी टाळण्यासाठी आपण निर्णय घेतल्याचं स्पष्टीकरण मीनाक्षी शिंदेंनी दिलं. आपला संबंध नसलेल्या काही प्रकरणांमध्ये नाव जोडून पक्ष नेतृत्वावर दबाव आणण्याचा प्रयत्न केला जात असल्याचा आरोप मीनाक्षी शिंदेंनी आपल्या पत्रात केला. मीनाक्षी शिंदे यांच्या या निर्णयामुळे ठाण्यातील राजकीय वर्तुळात चर्चांना उधाण आले आहे.

ही बातमी वाचा:

Pradeep Purnekar : ठाणेकरांच्या दबावानंतर मीनाक्षी शिंदेंचा राजीनामा, आता त्यांना अटक कधी करणार? आदित्य ठाकेरेंचा सवाल

Pradeep Purnekar : ठाणेकरांच्या दबावानंतर मीनाक्षी शिंदेंचा राजीनामा, आता त्यांना अटक कधी करणार? आदित्य ठाकरेंचा सवाल

एबीपी माझा ब्युरो — Thu, 29 Oct 2026 18:11:26 +0530

ठाणे : ठाकरेंच्या शिवसेनेचे विभागप्रमुख प्रदीप पूर्णेकर यांच्या हत्येला एक महिना उलटून गेला तरी या प्रकरणातील मास्टरमाईंडला अद्याप अटक का करण्यात आली नाही? एकनाथ शिंदे यांनी मीनाक्षी शिंदे यांना वाचवण्यासाठी सगळी यंत्रणा का कामाला लावली आहे? असा सवाल आदित्य ठाकरे यांनी विचारला. पोलिसांसमोर सगळे पुरावे असतानाही ते काहीच करत नाहीत, असा आरोपही त्यांनी केला. प्रदीप पूर्णेकर प्रकरणात तातडीने कारवाई व्हावी यासाठी आदित्य ठाकरे यांनी पोलीस आयुक्तांची भेट घेतली. त्यानंतर ते माध्यमांशी बोलत होते.

आदित्य ठाकरे म्हणाले की, "ठाण्यात हत्या झाल्यानंतर सर्वत्र आक्रोश निर्माण झाला. राम पूर्णेकर हा त्याच्या वडिलांच्या हत्येवर न्याय मागण्यासाठी एकनाथ शिंदे यांच्या निवासस्थानी गेला असता पोलिसांनी रामलाच अटक केली. पोलीस आयुक्तांची आम्ही भेट घेतली आणि या हत्येसंबंधी माहिती घेतली. परंतु पोलीस काही प्रयत्न करत नाहीत. पूर्णेकर कुटुंबीयांनी जो व्हिडीओ दिला आहे त्यावर पोलीस काहीही कारवाई करत नाहीत. यामध्ये कुणाला वाचवण्याचा प्रयत्न केला जात आहे."

प्रदीप पूर्णेकर हत्या प्रकरणात मीनाक्षी शिंदे यांना वाचवण्यासाठी एकनाथ शिंदे यांनी सगळी सरकारी यंत्रणा कामाला का लावली आहे? असा सवाल आदित्य ठाकरे यांनी केला. तसेच आम्ही न्याय मागत असताना ठाण्याच्या खासदारांची भाषा बघा, असं सांगत नरेश म्हस्के यांच्यावरही टीका केली. ठाणेकरांच्या दबावानंतर मीनाक्षी शिंदेंचा राजीनामा झाला आहे. मग आता त्यांना अटक कधी करणार? असा सवालही आदित्य ठाकरे यांनी केला.

संजय राऊतांची मुख्यमंत्र्यावर टीका

ठाण्याची अवस्था ही बीडपेक्षाही वाईट करून टाकली आहे. ही राजकीय हत्या असून मीनाक्षी शिंदे आणि राजेंद्र शिंदे यांनी घडवून आणली आहे, असा आरोप संजय राऊत यांनी केला. महाराष्ट्राने इतका दुर्बल मुख्यमंत्री आणि गृहमंत्री या आधी कधीही पाहिला नाही, असं म्हणत त्यांनी देवेंद्र फडणवीस यांच्यावरही टीका केली.

स्वतः पोलीस आयुक्तांना माहिती आहे या प्रकरणातील मास्टरमाईंड कोण आहे. मात्र पोलिसांची हात बांधले आहेत. पोलिसांना पुरावे शोधता येत नसतील तर पोलीस खातं बरखास्त करा, अशा शब्दात राऊत यांनी संताप व्यक्त केला.

मीनाक्षी शिंदे यांचा राजीनामा

ही बातमी वाचा:

Eknath Shinde : शिवसेनेनं युतीधर्म पाळला नाही भाजपचा आरोप, एकनाथ शिंदेंची पहिली प्रतिक्रिया, मीनाक्षी शिंदेंच्या राजीनाम्यावरही बोलले...

Pratap Sarnaik on Meenakshi Shinde: 'आरोप चुकीचे सिद्ध होईपर्यंत पदाचा राजीनामा...'; प्रताप सरनाईकांचं मिनाक्षी शिंदेंबाबत सूचक वक्तव्य, ठाण्यातील पत्रकार परिषदेत काय घडलं?

रोहित धामणस्कर — Thu, 29 Oct 2026 12:15:23 +0530

Pratap Sarnaik on Meenakshi Shinde: ठाण्यातील ठाकरे गटाचे विभागप्रमुख प्रदीप पूर्णेकर हत्याप्रकरणाला आता एक महिना उलटला आहे. तरीही याप्रकरणातील सूत्रधारांवर ठोस कारवाई न झाल्यामुळे ठाकरे गट आक्रमक झाला आहे. आज ठाण्यात सर्वपक्षीय मोर्चाही काढला जाणार होता. परंतु पोलिसांनी परवानगी नाकारल्याने ऐनवेळी हा मोर्चा रद्द करण्यात आला. तत्पूर्वी गेल्या दोन दिवसांपासून प्रदीप पूर्णेकर हत्याप्रकरणावरुन (Pradeep Purnekar Murder case) ठाकरे गट प्रचंड आक्रमक झाला आहे. ठाकरे गटाकडून नौपाडा पोलीस ठाणे आणि घोडबंदर रोडवर आंदोलन करण्यात आले होते. प्रदीप पूर्णेकर यांच्या पत्नीने एकनाथ शिंदे (Eknath Shinde) यांच्यावर गंभीर आरोप केले होते. या आरोपांनी शिंदे सेनेचे खासदार नरेश म्हस्के आणि मंत्री प्रताप सरनाईक यांनी बुधवारी पत्रकार परिषद घेऊन प्रत्युत्तर दिले होते. याच पत्रकारपरिषदेत प्रताप सरनाईक यांनी मिनाक्षी शिंदे यांच्यावरील कारवाईच्या अनुषंगाने केलेले एक वक्तव्य सध्या राजकीय वर्तुळात चर्चेचा विषय ठरत आहे. प्रताप सरनाईक यांचे हे वक्तव्य म्हणजे मिनाक्षी शिंदे यांना पक्षश्रेष्ठींकडून देण्यात आलेला अप्रत्यक्ष संदेश असावा का, अशी कुजबुजही राजकीय वर्तुळात रंगली आहे. (Thane Crime news)

प्रदीप पूर्णेकर हत्याप्रकरणाचा कट मिनाक्षी शिंदे आणि राजेंद्र शिंदे यांच्या सांगण्यावरुन आखण्यात आल्याचा आरोप पूर्णेकर कुटुंबाने केला आहे. मिनाक्षी शिंदे या ठाण्यातील शिवसेनेच्या प्रमुख नेत्यांपैकी एक आहेत. ठाण्यात त्यांची मोठी ताकद आहे. त्या सध्या शिवसेनेच्या ठाणे जिल्हा महिला आघाडी प्रमुख (महिला जिल्हासंघटक) आहेत. मात्र, आता पूर्णेकर हत्याप्रकरणामुळे आता त्यांच्या याच पदावर गंडांतर येण्याची शक्यता आहे. कालच्या पत्रकारपरिषदेत मिनाक्षी शिंदे यांच्याबाबत प्रश्न उपस्थित करण्यात आला तेव्हा प्रताप सरनाईक यांनी कोणाचाही थेट उल्लेख न करता एक वक्तव्य केले. जर माझ्यावर एखाद्या प्रकरणात आरोप होत असतील तर प्रताप सरनाईक यांनी ताबडतोब पक्षाच्या प्रमुखांना सांगितलं पाहिजे, 'साहेब आरोप होत आहेत, आरोप जोपर्यंत चुकीचे असल्याचे सिद्ध होत नाही तोपर्यंत मी बाजूला राहतो'. मला विचारलं तर ही माझी प्रांजळ भूमिका आहे. मीदेखील शिंदे साहेबांना सांगितलं, आपल्या पक्षाच्या नेत्या आहेत, त्यांच्यावर आरोप होत असतील तर पक्षाचे जे काही पद आहे, ते बाजूला काढून ठेवलं तर ते अतिशय योग्य होईल, ही माझी भूमिका आहे, ती मी एकनाथ शिंदे साहेबांना सांगितली आहे, असे प्रताप सरनाईक यांनी सांगितले.

Pradeep Purnekar Murder Case: प्रदीप पूर्णेकर हत्याकांडाला आज एक महिना पूर्ण

प्रदीप पूर्णेकर हत्याकांडाला आज एक महिना पूर्ण होत आहे. 29 सप्टेंबरला रात्री पुर्णेकर यांच्यावर जीवघेणा हल्ला झाला होता, ज्यामध्ये त्यांचा मृत्यू झाला. त्यानंतर आजपर्यंत ठाण्यात प्रचंड आंदोलने, मोर्चे आणि विरोध झाले, आज देखील कुटुंबीय रात्री 8 वाजता शांततेत कँडल मार्च काढून प्रदीप पूर्णेकर यांना श्रद्धांजली वाहणार आहेत. तत्पूर्वी आज आदित्य ठाकरे, संजय राऊत, राजन विचारे येणार पूर्णेकर यांच्या घरी, त्यानंतर ठाणे पोलीस आयुक्तांची भेट घेणार आणि नंतर पत्रकार परिषद घेणार आहेत. मात्र, पोलिसांनी परवानगी नाकारल्याने आंदोलन होणार नाही.

तर दुसरीकडे शिंदे सेना देखील आनंद आश्रमात जमणार, पक्षाचे खासदार, मंत्री, आमदार, पदाधिकारी यांना दुपारी 2.30 वाजता जमण्याचे आदेश देण्यात आले आहेत. एकप्रकारे उबाठा गटाला राजकीय विरोध करण्यासाठी शिंदे सेनेकडून शक्ती प्रदर्शन होणार आहे. त्यामुळे आज ठाण्यातील राजकीय वातावरण तापणार आहे.

आणखी वाचा

Pradeep Purnekar Case: उद्याच्या आंदोलनात एकनाथ शिंदेंवर चुकीचं बोलणारा नेता ठाण्यातून परत जाणार नाही, नरेश म्हस्केंची वॉर्निंग

Maharashtra Breaking LIVE: प्रदूषण करणाऱ्यांवर आता मुंबई पोलिसांची करडी नजर, ध्वनी आणि वायूप्रदूषण करणाऱ्यांवर कठोर कारवाई करण्याच्या पोलीस आयुक्तांच्या सूचना

एबीपी माझा वेब टीम — Thu, 29 Oct 2026 06:41:51 +0530

Maharashtra Breaking LIVE: देश-विदेशातील महत्त्वाच्या बातम्यांचा आढावा फक्त एका क्लिकवर...

Maharashtra Vidhan Parishad Result 2026 Winner Candidate List: विधान परिषदेच्या 5 पैकी 3 जागांचा निकाल जाहीर; सर्व विजयी उमेदवार यादीचे अपडेट्स

Maharashtra Vidhan Parishad Result 2026 Winner Candidate List: राज्यातील विधान परिषदेच्या पदवीधर आणि शिक्षक मतदारसंघाच्या निकालाकडे (Maharashtra Vidhan Parishad Result 2026 Winner Candidate List) सर्वांचं लक्ष लागलं होतं. गेल्या 30 तासांपासून या निवडणुकांसाठी मतमोजणी सुरू होती. आता, विधानपरिषदेच्या पाचही जागांचे निकाल जाहीर झाला असून महायुतीने 2 जागांवर विजय मिळवला असून एका जागेवर आघाडी आहे, तर महाविकास आघाडीला दोन जागा जिंकता आल्या. पुणे शिक्षक मतदारसंघातुन (Pune Teachers Constituency Result 2026) भाजपचे कौस्तुभ गावडे यांचा विजय झाला आहे. पुणे शिक्षक मतदारसंघात कौस्तुभ गावडे विरुद्ध शिंदेंच्या शिवसेनेचा पुरस्कृत अपक्ष उमेदवार सचिन सानप आणि काँग्रेसचे जयंत आसगावकर यांच्यात लढत झाली. छत्रपती संभाजीनगर पदवीधर (Chhatrapati Sambhajinagar Graduates Constituency Result 2026) मतदारसंघाच्या निवडणुकीत राष्ट्रवादी शरद पवार गटाचे प्रतापसिंग पाटील यांनी विजय मिळवला आहे. तसेच पुणे पदवीधर मतदारसंघात (Pune Graduates Constituency Result 2026) राष्ट्रवादी काँग्रेस (शरदचंद्र पवार) पक्षाच्या हर्षदा देशमुख-जाधव यांनी विजय मिळवला.

फडणवींसांच्या शहरात भाजपचा सलग दुसऱ्यांदा पराभव, मोदींचा भ्रमाचा भोपळा फुटला, मविआचा 3 जागांवर दणदणीत विजय, हर्षवर्धन सपकाळांचा हल्लाबोल

Harshvardhan Sapkal : नागपूर पदवीधर मतदारसंघातून काँग्रेस मविआचे उमेदवार अभिजीत वंजारी यांनी भाजपचे उमेदवार सुधाकर कोहळे यांचा दारुण पराभव केला आहे. यानंतर काँग्रेसचे प्रदेशाध्यक्ष हर्षवर्धन सपकाळ यांनी भाजपवर जोरदार हल्लाबोल केला आहे. RSS चे मुख्यालय, मुख्यमंत्री देवेंद्र फडणवीस व केंद्रीय मंत्री नितीन गडकरी यांच्या शहरात काँग्रेस पक्षाने सलग दुसऱ्यांदा भाजपाचा पराभव केला आहे. पंतप्रधान नरेंद्र मोदी एवढे उतावीळ आहेत की निकालाआधीच काँग्रेसचा झिरो म्हणून अवहेलना केली, अखेर भ्रमाचा भोपळा फुटला असे म्हणत सपकाळांनी जोरदार टीका केली. दरम्यान, नागपूर पदवीधर मतदारसंघाची निवडणूक ही अत्यंत चुरशीची मानली जात होती. या निवडणुकीच्या निमित्ताने राज्याचे मुख्यमंत्री देवेंद्र फडणवीस यांची प्रतिष्ठा पणाला लागली होती. अखेर काँग्रसने भाजपला जोरदार धक्का दिला आहे.

आम्हाला न्याय पाहिजे, भीक नको; खंडणीविरोधी पथकाच्या कार्यालयापुढे पूर्णेकरांचा संताप, नरेश म्हस्केही पोलीस ठाण्यात

अक्षय भाटकर, एबीपी माझा — Wed, 28 Oct 2026 16:55:32 +0530

ठाणे : पूर्णेकर कुटुंबीय आणि महाविकास आघाडीच्या (MVA) नेत्यांनी ठाण्यातील खंडणी विरोधी पथक गुन्हे शाखा याठिकाणी भेट देऊन आपला संताप व्यक्त केलाय. प्रदीप पूर्णेकर (Pradeep purnekar) हत्याप्रकरणात नेमण्यात आलेलं SIT पथक (SIT) नेमकं काय करत आहेत. तपास कुठपर्यंत आलाय यासंदर्भात माहिती घेण्यासाठी आणि जाब विचारण्यासाठी येथे आले आहेत. यावेळी, पूर्णेकर कुटुंबीयांनी संताप व्यक्त करत सरकारला आणि पोलीस प्रशासनाला सवाल केला. ठाणे पोलीस (Police) डोळ्याला पट्टी लावून काम करत आहेत, असे म्हणत माजी महापौर मीनाक्षी शिंदे आणि त्यांचे पती राजेंद्र शिंदे यांना अटक करण्याची मागणीही त्यांनी केली.

आम्हाला न्याय पाहिजे भीक नको, सत्तेची मस्ती पालक मंत्री एकनाथ शिंदे यांनी दाखवू नये, असे म्हणत पूर्णकर कुटुंबीयांनी आपला रोष व्यक्त केला. प्रदीप पूर्णेकर यांच्या पत्नी विजेता पूर्णेकर, मुलगा राम पूर्णेकर, पुतणी खुशबू पूर्णेकर यांच्यासह माजी खासदार राजन विचारे, ठाकरे गटाचे ठाणे जिल्हा प्रमुख केदार दिघे, राष्ट्रवादी शरदचंद्र पवार पक्ष कडून राष्ट्रवादी शरदचंद्र पवार गटाचे ठाणे शहर अध्यक्ष मनोज प्रधान,राष्ट्रवादी शरदचंद्र पवार गटाचे नगरसेवक अभिजित पवार,काँग्रेस ठाणे शहर अध्यक्ष राहुल पिंगळे, तसेच वकील समीर हटले यांच्यासह कार्यकर्तेही खंडणीविरोधी पथकाच्या कार्यालयापुढे हजर होते.

पत्रकारांच्या प्रश्नावर पोलिसांचे तेच उत्तर

दरम्यान, ठाणे पोलिसांनी आज पत्रकार परिषद घेऊन पूर्णेकर हत्याप्रकरणाबाबत माहिती दिली. ठाण्यातील शिवसेनेचे मानपाडा विभागप्रमुख प्रदीप पूर्णेकर हत्याकांड प्रकरणी विशेष तपास पथकाने आज पहिल्यांदा पत्रकार परिषद घेतली. या पत्रकार परिषदेमध्ये तीक्ष्ण प्रश्नांना उत्तरे देताना पोलिसांची मोठी तारांबळ उडाल्याचं दिसून आलं. पूर्णेकर हत्याकांड प्रकरणाचा तपास सुरू आहे, हेच पहिल्या दिवसांपासूनचे उत्तर पोलिसांनी आज दिले. या घटनेला तब्बल 29 दिवस उलटून देखील हत्येचे मुख्य कारण शोधण्यात पोलिसांना अपयश आलं आहे. तर, पत्रकारांच्या प्रश्नांना उत्तरे देताना देखील ठाणे पोलिसांना अक्षरशः घाम सुटल्याचे पाहायला मिळाले.

एकनाथ शिंदेंची बदनामी, नरेश म्हस्के पोलीस ठाण्यात

दरम्यान, शिवसेना खासदार नरेश म्हस्के हेही ठाणे पोलीस स्टेशनला पोहोचले होते, निवेदन देण्यासाठी नाही, तर तक्रार दाखल करण्यासाठी आम्ही आलो आहोत, असे नरेश म्हस्के यांनी म्हटले. म्हस्के यांनी आज अपर पोलीस आयुक्त अशोक दुधे यांच्यासोबत चर्चा केली, नौपाडा पोलीस ठाण्यात वरिष्ठ पोलीस अधिकाऱ्यांसोबत संवाद साधला. एकनाथ शिंदे यांची बदनामी केल्याप्रकरणी तक्रार दाखल करण्यासाठी शिवसेनेचे नेते आज पोलीस ठाण्यात पोहोचल होते.

हेही वाचा

मी प्रस्थापित गिळलाय, मराठवाडा पदवीधर मतदारसंघाचा निकाल, रिलस्टार रविराज साबळेंची प्रतिक्रिया, किती मतं?