Solapur Crime News: शरणू हांडे अपहरण प्रकरणात सातवा आरोपी पोलिसांच्या जाळ्यात; गाडी भाड्याने दिलेल्या पुण्यातून कंपनीवाल्याला चौकशीसाठी बोलावलं, आत्तापर्यंत काय काय आलं समोर?
Solapur Crime News: आरोपी अमितने अपहरणासाठी वापरलेली कार तब्बल सात दिवसांसाठी म्हणजेच सहा ते बारा ऑगस्टसाठी त्याने बुक केली होती. यासाठी त्याने ऑनलाइन दहा हजार पाचशे रुपये दिल्याची माहिती सुत्रांनी दिली.
सोलापूर: सोलापुरातील आमदार गोपीचंद पडळकर यांचा समर्थक असलेल्या शरणू हांडे अपहरण प्रकरणातील 7 व्या आरोपीला देखील एमआयडीसी पोलिसांनी अटक केली आहे. समर्थ वासुदेव भैरी असे अटक केलेल्या आरोपीचे नाव आहे. आरोपी समर्थ भैरी हा यापूर्वी अटक झालेल्या पुजारी आणि माने यांच्या संपर्कात होता अशी माहिती समोर आली आहे. दरम्यान या अपहरण प्रकरणातील सर्व 7 आरोपींना पोलिसांनी अटक केली आहे. यापूर्वी अटक केलेल्या 6 आरोपींना न्यायालयाने 12 ऑगस्टपर्यंत पोलीस कोठडी सुनावली आहे. तर 7 वा आरोपी समर्थ भैरी याला पोलिस आज कोर्टासमोर हजर करण्याची शक्यता आहे.
शेवटचा आरोपी असलेला समर्थ हा अटक झालेल्या पुजारी आणि माने यांच्या संपर्कातील होता. तो शिलाई काम करत होता, अशी माहिती समोर आहे. सध्या सर्व आरोपींना पोलिसांनी अटक केली आहे. दरम्यान, शरणू हांडे यांना शुक्रवारी सायंकाळी शासकीय रुग्णालयातून डिस्चार्ज देण्यात आला होता. यामुळे त्यांना घरी आणण्यात आले होते. त्यांच्या डोक्याला, छातीला मोठ्या प्रमाणात मुका मार लागलेला आहे. शिवाय त्याच्या पायालाही गंभीर जखम झालेली आहे. यामुळे डॉक्टरांनी पुढील काही दिवस आराम करण्याचा सल्ला दिला आहे. दरम्यान, आरोपी अमितने शरणू हांडेच्या अपहरणासाठी वापरलेली कार तब्बल सात दिवसांसाठी म्हणजेच सहा ते बारा ऑगस्टसाठी त्याने बुक केली होती. यासाठी त्याने ऑनलाइन दहा हजार पाचशे रुपये दिल्याची माहिती एका वृत्तसंस्थेने आपल्या वृत्तात दिली. यामुळे हा कट पूर्वनियोजित असल्याची चर्चा आहे.
पुण्यातून गाडी बोलावली, अपहरण केलं अन्....
अपहरण प्रकरणातील प्रमुख आरोपी अमित सुरवसे याने तीन महिन्यांपूर्वी झालेल्या मारहाणीचा आणि अपमानाचा बदला घ्यायचं ठरवलं होतं. बदला घेण्याच्या उद्देशाने त्याने सुरुवातीला पुण्यातून झूम अॅप वरून एक सेल्फ ड्रॉईव्हर कार भाड्याने घेतली. सोबत सुनील पूजारी, दीपक मेश्राम, अभिषेक माने, राकेश कुदरे, श्रीकांत सुरपुरे हे मित्र देखील त्याच्या मदतीला होते. पुण्यातून गाडी भाड्याने घेतल्यानंतर हे सगळे आरोपी सोलापुरात पोहोचले. शरणू हांडे हा सोलापुरातील साई नगर भागातल्या राज बियर शॉपीजवळ आल्यानंतर गाडीतून आलेल्या आरोपींनी शरणूवर हल्ला केला. घटनास्थळी शंकर बारोळे नावाच्या व्यक्तीने हा सगळा प्रकार पाहिला आणि शरणू याला वाचवण्याचे पहिले प्रयत्न बारोळे यांनी केले. मात्र आरोपीनी शस्त्राचा धाक दाखवल्याने ते मागे हटले आणि आरोपीनी शरणू याला कोयत्याने मारहाण करून चार चाकी गाडीत टाकून त्याचे अपहरण केले.
शरणू याचा कायमचा बंदोबस्त करण्याचा प्लॅन, पण अपहरणकर्त्यामध्ये वाद
संध्याकाळी 4.30 च्या सुमारास शरणू हांडे याचे अपहरण केल्यानंतर आरोपी अक्कलकोटच्या दिशेने निघाले. पोलिसांना अपहरणाची बातमी मिळताच शहर पोलिसानी ग्रामीण पोलिसांना देखील घटनेची माहिती दिली. ठिकठिकाणी नाकाबंदी करण्यात आली. मात्र नाकाबंदीची कुणकुण लागल्याने आरोपीनी गाडी कर्नाटकच्या दिशेने वळवली. कर्नाटकच्या निंबाळ गावात गेल्यानंतर अमित सुरवसे याने शरणू याचा कायमचा बंदोबस्त करायचा, अपमानाचा बदला अपमानाने घेण्यासाठी व्हिडीओ चित्रीकरण करायचा असा प्लॅन सांगितलं. अमितचा हा प्लॅन ऐकून अपहरणकर्त्यांमध्येच दोन गट पडले. एका गटाने ‘कायमचा बंदोबस्त’ करण्यासाठी विरोध केला. तर दुसरा गट कायमचा बंदोबस्त करण्यावर ठाम होता, जवळपास अर्धा तास अपहरणकर्त्यांमध्ये हा वाद सुरूच होता. याचं वादामुळे जो वेळ गेला तीच संधी पोलिसांना अपहरणकर्त्यापर्यंत पोहोचण्यात मदतशीर ठरली आणि शरणूचे प्राण वाचवण्यासाठी पोलिसांना यश आलं.
शरणूचे अपहरण झाल्याची माहिती मिळताच सोलापूरचे पोलिसांनी आयुक्त एम. राजकुमार यांनी तातडीने उपायुक्त विजय कबाडे आणि उपायुक्त आश्विनी पाटील यांना तपासाचे आदेश दिले. दोन्ही उपायुक्त स्वतः संपूर्ण घटनेची माहिती घेत गांभीर्य ओळखून चार पथक शरणू आणि आरोपीच्या शोधासाठी रवाना करण्यात आली. घटनास्थळावर मिळालेल्या सिसिटीव्हीवरून गाडी अक्कलकोटच्या दिशेने जातं असल्याने दोन पथक अक्कलकोटच्या दिशेने रवाना करण्यात आले. गाडीची ओळख पटू नये यासाठी आरोपीनी नंबर प्लेटवर चिखल लावला होता. मात्र सुदैवाने वळसंग येथील टोल नाक्यावर गाडीचा नंबर पोलिसांना मिळाला.
महत्त्वाच्या बातम्या
