Popat Deshmukh Passes Away : सांगोला विधानसभा मतदारसंघाचे शेकापचे आमदार डॉ. बाबासाहेब देशमुख यांचे वडील तथा विक्रमवीर आमदार स्वर्गीय गणपतराव देशमुख यांचे ज्येष्ठ सुपुत्र पोपट गणपतराव देशमुखयांचे अल्पशा आजाराने आज निधन झालं. वयाच्या 69 व्या वर्षी त्यांनी अखेरचा श्वास घेतला आहे. गेल्या काही दिवसांपासून आजारी होते. त्यांच्या निधनाने सांगोला तालुक्यासह परिसरात हळहळ व्यक्त केली जात आहे.
पोपट देशमुख यांनी कधीही सक्रिय राजकारणात सहभाग घेतला नव्हता
पोपट देशमुख हे मूळचे मोहोळ तालुक्यातील पेनूर येथील रहिवासी होते. त्यांचे वडील स्वर्गीय गणपतराव देशमुख हे राज्याच्या राजकारणात दीर्घकाळ सक्रिय राहून विक्रमी 11 वेळा आमदार म्हणून निवडून आले होते. मात्र, इतक्या मोठ्या राजकीय वारशाची पार्श्वभूमी असतानाही पोपट देशमुख यांनी कधीही सक्रिय राजकारणात सहभाग घेतला नव्हता. ते साधेपणाने आपल्या मूळ गावी राहून सामाजिक व कौटुंबिक जबाबदाऱ्या पार पाडत होते. आमदार डॉ. बाबासाहेब देशमुख यांच्या राजकीय प्रवासात व त्यांना आमदार बनविण्यामागे पोपट देशमुख यांचे मोलाचे योगदान असल्याचे मानले जाते. शांत, संयमी व मनमिळावू स्वभावामुळे त्यांना परिसरात विशेष मान होता. त्यांच्या पश्चात पत्नी, एक मुलगा व एक मुलगी असा परिवार आहे. त्यांच्यावर उद्या मंगळवारी (ता. 12) सकाळी 9 वाजता पेनूर (ता. मोहोळ) येथे अंत्यसंस्कार करण्यात येणार आहेत.
महाराष्ट्राच्या स्थापनेपासून सांगोला मतदारसंघात शेकाप आणि गणपतराव देशमुखांचं वर्चस्व राहिलंय. एकाच मतदारसंघातून आणि एकाच पक्षातून गणपतराव देशमुख विक्रमी 11 वेळा आमदार झाले 2014 साली 87 वर्षांचे गणपतराव सांगोल्यातून शेवटची निवडणूक लढले आणि जिंकलेही. पण 2019 मध्ये गणपतरावांचे नातू डॉ. अनिकेत देशमुख काही मतांच्या फरकानं पराभूत झाले. अनिकेत देशमुखांच्या पराभवाचं हे शल्य शेकापच्या प्रत्येक कार्यकर्त्याच्या मनात होतं. यंदा डॉ. बाबासाहेब देशमुख जिंकले आणि पुन्हा एकदा देशमुखांच्या घरात आमदारकी आली. दरम्यान, बाबासाहेब देशमुख यांच्या विधानसभेच्या विजयात त्यांचे वडील पोपट देशमुख यांचा मोलाचा वाटा होता पोपट देशमुख हे स्वभावाने शांत आणि संजयमी होते. त्यांच्या स्वभावामुळं सर्वत्र त्यांचा वावर होता. पोपट देशमुख हे गेल्या काही दिवसांपासून आजारी होते. अखेर आज त्यांची प्राणज्योत मालवली आहे. त्यांच्या निधनानंतर सर्वच स्तरातून शोक व्यक्त होत आहे.
महत्वाच्या बातम्या: