Harshwardhan Sapkal : हर्षवर्धन सपकाळांच्या तोंडाला काळे फासणाऱ्याला एक लाखाचे बक्षीस, मराठा ठोक मोर्चा आक्रमक
Harshwardhan Sapkal On Tipu Sultan : काँग्रेस प्रदेशाध्यक्ष हर्षवर्धन सपकाळ यांनी टिपू सुलतानची तुलना छत्रपती शिवाजी महाराज यांच्यासोबत केल्यानंतर त्यांच्यावर टीका केली जात आहे.
सोलापूर : टिपू सुलतान याची छत्रपती शिवाजी महाराजांसोबत तुलना करणारे वक्तव्य केल्याप्रकरणी काँग्रेस प्रदेशाध्यक्ष हर्षवर्धन सपकाळ (Harshwardhan Sapkal) यांच्यासमोरील अडचणी अधिक वाढण्याची शक्यता आहे. हर्षवर्धन सपकाळ यांच्या विरोधात मराठा ठोक मोर्चा (Maratha Thok Morcha) आक्रमक झाल्याचं दिसून आलं. हर्षवर्धन सपकाळ यांच्या तोंडाला काळे फासणाऱ्यास एक लाख रुपयाचे बक्षीस जाहीर करण्यात आलं आहे. मराठा ठोक मोर्चाचे सोलापुरातील समन्वयक महेश डोंगरे यांनी हे जाहीर केलं.
सोलापूर मराठा ठोक मोर्चाच्या वतीने हर्षवर्धन सपकाळ यांच्यावर जोरदार टीका करण्यात आली. हर्षवर्धन सपकाळ यांच्यामुळेच काँग्रेस संपली असं महेश डोंगरे म्हणाले. त्यांच्या तोंडाला जो कुणी काळे फासेल त्याला एक लाखाचं बक्षीस देणार असल्याचं त्यांनी जाहीर केलं. तसेच हर्षवर्धन सपकाळ यांना मराठा समाज रस्त्यावर फिरू देणार नाही असा इशाराही देण्यात आला.
नेमकं प्रकरण काय?
मालेगाव महापालिकेतील उपमहापौरांच्या दालनात टिपू सुलतानचा फोटो लावण्यात आला होता. त्यावर हिंदुत्ववादी संघटनांनी आक्षेप घेतल्यानंतर अखेर हटवण्यात आला. मात्र, याच वादानंतर काँग्रेस प्रदेशाध्यक्ष हर्षवर्धन सपकाळ यांनी त्यासंदर्भात एक वक्तव्य केलं. 'टिपू सुलतानला छत्रपती शिवरायांच्य़ा समकक्ष बघितलं पाहिजे, असं सपकाळ यांनी म्हटलं. ज्याप्रमाणे छत्रपती शिवाजी महाराजांनी शौर्य आणि स्वराज्य असा विचार दिला, अगदी त्याचप्रमाणे टिपू सुलतान यांनी त्याच समकक्ष काम केलं, असं सपकाळ म्हणाले. सपकाळ यांच्या या वक्तव्यानं नव्या वादाला तोंड फुटलं. भाजप आणि शिवसेनेने सपकाळ यांच्या वक्तव्याचा चांगलाच समाचार घेतला.
छत्रपती शिवाजी महाराज यांची तुलना टिपू सुलतान यांच्यासोबत केल्याच्या वक्तव्यावरून राजकीय वर्तुळात मोठा वाद निर्माण झाला आहे. काँग्रेसचे प्रदेशाध्यक्ष हर्षवर्धन सपकाळ यांच्याविरोधात पुण्यातील पर्वती पोलिस ठाण्यात गुन्हा दाखल करण्यात आला आहे.
आपल्या वक्तव्याची मोडतोड केली
टिपू सुलतानाच्या वक्तव्यासंदर्भात काँग्रेसचे प्रदेशाध्यक्ष यांनी अखेर मौन सोडलं आहे. माझ्या वक्तव्याची मोडतोड करून "ध" चा "मा" करून मुख्यमंत्री देवेंद्र फडणवीसांना राज्यात दंगली घडवायच्या आहेत, असा आरोप हर्षवर्धन सपकाळ यांनी एक्सवर शेअर केलेल्या पोस्टमध्ये केला. तसेच पुण्याच्या महापौर मंजुषा नागपुरेंवर गुन्हा दाखल करण्याची मागणीही त्यांनी केली.
ही बातमी वाचा:
महत्त्वाच्या बातम्या
