Solapur News : तुकाराम मुंढे यांचा धडाका! 37 हजार लिटर भेसळयुक्त दूध जागेवरच ओतलं, सांगोल्यातील 'अजिंक्यराणा' केंद्रावर कारवाई

शेतकऱ्यांसाठी आनंदाची बातमी! उजनी धरणातून सीना नदीला पाणी सुटणार, मंत्री विखे पाटलांचे अधिकाऱ्यांना आदेश

गणेश लटके — Tue, 14 Jul 2026 22:19:13 +0530

Ujani Dam : सोलापूर जिल्ह्यातील माढा तालुक्यातील शेतकऱ्यांसाठी आनंदाची बातमी समोर आली आहे. शेतकऱ्यांना दिलासा देण्यासाठी उजनी धरणातून सीना नदीत पाणी सोडण्यात येणार आहे. राज्याचे जलसंधारण व जलसंपदा मंत्री राधाकृष्ण विखे पाटील यांनी सीना नदीला पाणी सोडण्याबाबतचे आदेश अधिकाऱ्यांना दिले आहेत. उद्यापासून म्हणजे 15 जुलैपासून उजनी धरणातून सीना नदीत पाणी सोडण्यात येणार आहे. यामुळं पिण्याच्या पाण्यासह जनावरांच्या पाण्याचा प्रश्न मिटणार आहे. त्याचबरोबर शेतकऱ्यांची करपू लागलेली पिकं देखील या पाण्यामुळ वाचणार आहेत. गेल्या अनेक दिवसांपासून उजनी धरणाचं पाणी सीना न दीत सोडण्यात याव, अशी मागणी शेतकरी करत होते. अखेर या मागणीला यश आलं.

उजनीतून सीना नदीत पाणी सोडण्यासंदर्भात आदेश प्राप्त, अधिकाऱ्यांनी दिली महत्वाची माहिती

दरम्यान, उजनी धरणातून पाणी कधी सुटणार? याबाबत एबीपी माझाने जलसिंचन विभागाच्या अधिकाऱ्यांशी देखील संपर्क साधला. यावेळी अधिकाऱ्यांनी उजनी धरणातून सीना नदीत पाणी सोडण्यासंदर्भात आम्हाला आदेश प्राप्त झाले आहेत. त्या दृष्टीने आम्ही पुढची कार्यवाही सुरु केल्याची माहिती अधिकाऱ्यांनी एबीपी माझाला दिली आहे. अधिकाऱ्यांनी दिलेल्या माहितीनुसार, साधारणत: 33 टक्क्यांचे पुढे धरणातील पाणीसाठा गेल्यास आपण नदीला, कालव्यांना, बोगद्याद्वारे पाणी सोडू शकतो. पण सध्या एल निनोची परिस्थिती आहे. पावसाचं प्रमाण कमी असल्याची माहिती अधिकाऱ्यांनी दिली आहे. दरम्यान, या स्थिती देखील आण्हाला आलेल्या आदेशाप्रमाणे पाणी सोडण्यासाठी प्रशासन सकारात्मक असल्याची माहिती अधिकाऱ्यांनी दिली.

उजनी धरणाचं पाणी सीना नदीला सुटावं या मागणीसाठी शेतकऱ्यांसह राष्ट्रवादी काँग्रेस शरद पवार गटाचे माढ्याचे आमदार अभिजीत पाटील, माजी आमदार बबनदादा शिंदे यांचे सुपुत्र आणि भाजपचे नेते रणजितसिंह शिंदे तसेच स्वाभिमानी शेतकरी संघटनेच्या नेत्यांनी पाठपुरावा केला होता. या सगळ्या नेत्यांच्या मागणीला यश आलं आहे. मंत्री विखे पाटील यांनी सीना नदीत पाणी सोडण्याचे आदेश दिले आहेत. 15 जुलैपासून नदीत पाणी सोडण्यात येणार आहे.

सीना नदीत पाणी सोडण्याचा निर्णय, रणजितसिंह शिंदेंनी मानले विखे पाटलांसह पालकमंत्री गोरेंचे आभार

दरम्यान, भाजप नेते रणजितसिंह शिंदे यांनी आज मंत्री राधाकृष्ण विखे पाटील आणि सोलापूर जिल्ह्याचे पालकमंत्री जयकुमार गोरे यांची भेट घेतली होती. याबाबत त्यांनी एबीपी माझाला दिलेल्या माहितीनुसार, पाण्यावाचून सीना नदी काठच्या शेतकऱ्यांची पिके करपू लागली आहेत. त्यामुळं शेतकऱ्यांना आता पाण्याची सक्त गरज आहे. पिण्याच्या पाण्याचा प्रश्न गंभीर बनत चालला आहे. याबाबत जलसंपदा मंत्री राधाकृष्ण विखे पाटील आणि पालकमंत्री जयकुमार गोरे यांनी वस्तुस्थिती सांगितली. त्यानंतर विखे पाटील यांनी सोलापूर जलसंपदा विभागाचे मुख्य अभियंता श्री. चोपडे साहेब यांना फोनवरुन तात्काळ पाणी सोडण्याचे आदेश दिल्याची माहिती रणजितसिंह शिंदे यांनी दिली. त्यामुळं पुढच्या एक ते दोन दिवसात पाणी सुटणार असल्याचे शिंदे यांनी एबीपी माझाशी बोलताना सांगितले. यावेळी त्यांनी मंत्री विखे पाटील आणि पालकमंत्री जयकुमार गोरे यांचे आभार मानले.

अधिवेशनाच्या पहिल्या दिवसापासून पाणी सोडण्याबाबत मागणी केली होती : अभिजीत पाटील

उजनी धरणातून सीना नदीत पाणी सोडावं यासाठी मी सातत्याने पाठपुरावा केल्याची माहिती माढ्याचे आमदार अभिजीत पाटील यांनी एबीपी माझाला दिली. अधिवेशनाच्या पहिल्या दिवसापासून याबाबत मागणी केली होती. महापुराच्या काळात आम्हाला पाण्याची आवश्यकता नव्हती त्यावेळी नको तेवढे पाणी दिले. आता आम्हाला पाण्याची गरज आहे. याबाबत मंत्री राधाकृष्ण विखे पाटील, सोलापूर जिल्हाधिकारी, पालकमंत्री जयकुमार गोरे तसेच मुख्यमंत्री देवेंद्र फडणवीस यांनी भेटून देखील याबाबत निवदेन दिले होते अशी माहिती अभिजीत पाटील यांनी दिली. पाण्यावाचून पिकं जळू लागली आहे. त्यामुळ पाणी सोडावं अशी मागणी केल्याचे पाटील म्हणाले. पाणी जर सोडले नाहीतर आम्ही रास्ता रोको आंदोलन करणार असल्याचा इशारा देखील दिला होता असे अभिजीत पाटील म्हणाले. पण आता सरकारने पाणी सोडण्याचा निर्णय घेतला आहे. त्यामुळं मंत्री विखे पाटील यांचे आभारी असल्याचे पाटील म्हणाले.

करपत चाललेल्या पिकांना संजीवनी मिळणार

मिळालेल्या माहितीनुसार, कालव्यातून 2 हजार 500 क्युसेक्स, भीमा सीना बोगद्यातून सीना नदीत 950 क्युसेक्स, सीना माढा सिंचन योजनेतून 222 क्युसेक्स पाणी लाभक्षेत्रातील शेतीसाठी सोडण्यात येणार आहे. त्यामुळं शेतकऱ्यांना दिलासा मिळणार आहे. दरम्यान, सोलापूर जिल्ह्यात समाधानकारक पाऊस नसल्याने पाणी पातळी कमालीची घटली असून दुष्काळसदृश परिस्थिती निर्माण झाली आहे. शेतकऱ्यांची उभी पिके जळत असून पिण्याच्या पाण्याचा प्रश्न गंभीर बनत चालला आहे. असा स्थितीत उजनी धरणात सध्या 51 टक्के जलसाठा उपलब्ध असल्याने, धरणातून सीना - माढा उपसा सिंचन योजना, उजवा व डावा कालवा, आणि भीमा - सीना जोड कालव्याद्वारे तातडीने पाणी सोडण्याची मागणी करण्यात आली होती. अखेर पाणी सोडण्याचा निर्णय घेण्यात आला आहे. या पाण्यामुळं करपत चाललेल्या पिकांना संजीवनी मिळणार आहे.

Pandharpur Ashadhi Wari : वारकऱ्यांसाठी मोठी खुशखबर, खवय्यांची कोंडी! पंढरपुरात मटण-मास विक्रीवर प्रशासनाची कडक बंदी

सुनील दिवाण, एबीपी माझा, पंढरपूर — Tue, 14 Jul 2026 15:33:23 +0530

पंढरपूर : आषाढी वारीसाठी पंढरपुरात (Pandharpur Ashadhi Yatra 2026) विठू माऊलीच्या दर्शनाला येणाऱ्या लाखो वारकऱ्यांसाठी प्रशासनाने एक अत्यंत मोठा आणि महत्त्वाचा निर्णय घेतला आहे. पंढरपूर शहर आणि आजूबाजूच्या परिसरात उद्यापासून (15 जुलै) थेट 29 जुलै पर्यंत असे 15 दिवस मांस आणि मटण विक्रीवर (Meat Ban) संपूर्ण बंदी घालण्यात आली आहे.

सोलापूरचे पालकमंत्री जयकुमार गोरे (Jayakumar Gore) यांच्या सूचनेनंतर जिल्हाधिकाऱ्यांनी हे कडक आदेश जारी केले आहेत. या निर्णयामुळे पंढरपुरातील खवय्यांची अडचण होणार असली, तरी लाखो वारकरी आणि भाविकांमधून या निर्णयाचे जोरदार स्वागत केले जात आहे.

15 Days Meat Ban Pandharpur : भाविकांच्या भावना जपण्यासाठी निर्णय

आषाढी यात्रेच्या (Ashadhi Ekadashi) काळात दररोज लाखो वारकरी पंढरपुरात विठ्ठल दर्शनासाठी पायी चालत येत असतात. या पवित्र काळात शहरातील विविध भागांत सुरू असणाऱ्या मांस आणि मटण विक्रीमुळे भाविकांच्या धार्मिक भावना दुखावू नयेत, यासाठी प्रशासनाने हा निर्णय घेतला आहे.

जिल्हाधिकाऱ्यांनी जारी केलेल्या नव्या नियमांनुसार, पुढील 15 दिवस म्हणजेच 15 जुलै ते 29 जुलै या वारीच्या काळात पंढरपूर शहर आणि परिसरात कुठेही मांस किंवा मटणाची विक्री करता येणार नाही. नियमांचे उल्लंघन करणाऱ्यांवर कडक कायदेशीर कारवाई केली जाईल, असा इशाराही प्रशासनाकडून देण्यात आला आहे.

Pandharpur ST Bus Update : पाच नव्या कोऱ्या 'राजमाता जिजाऊ' बसेस!

एकीकडे मटण विक्रीवर बंदी असताना, दुसरीकडे पंढरपूरकडे येणाऱ्या वारकऱ्यांचा प्रवास सुखाचा व्हावा यासाठी एसटी महामंडळाने (MSRTC) पावले उचलली आहेत. आषाढी यात्रेपूर्वी पंढरपूर आगाराला 5 नव्या कोऱ्या 'राजमाता जिजाऊ' (Rajmata Jijau Bus) बसेस मिळाल्या आहेत. या सर्व बसेसचे लोकार्पण पंढरपूर-मंगळवेढा मतदारसंघाचे आमदार समाधान आवताडे (MLA Samadhan Awtade) यांच्या हस्ते पूजन करून करण्यात आले.

याप्रसंगी बोलताना आमदार समाधान आवताडे यांनी विश्वास व्यक्त केला की, "वारीच्या काळात वारकरी भक्तांना उत्तम आणि दर्जेदार सेवा-सुविधा पुरवणे हे आमचे कर्तव्य आहे. यात्रेपूर्वी पंढरपूर आगाराला महामंडळाकडून अजून काही नवीन बसेस मिळणार आहेत. लाखो भाविकांची वाहतूक सुरक्षित आणि सुकर करण्यासाठी आम्ही सातत्याने प्रयत्नशील आहोत." या नवीन गाड्यांमुळे विठ्ठल भक्तांचा वारीचा प्रवास अधिक सुखकर होणार आहे.

ही बातमी वाचा:

विठ्ठल नामाची ऊर्जा; 15 दृष्टीहीन वारकऱ्यांची 450 किमीची वारी, हाती, भजन, ढोलकी अन् पाऊले चालती पंढरीची वाट

विठ्ठल नामाची ऊर्जा; 15 दृष्टीहीन वारकऱ्यांची 450 किमीची वारी, हाती, भजन, ढोलकी अन् पाऊले चालती पंढरीची वाट

आप्पासाहेब शेळके — Tue, 14 Jul 2026 14:04:35 +0530

धाराशिव : पंढरीच्या वारीला सुरुवात झाली असून याच महिन्यात 25 जुलै रोजी आषाढी एकादशी (Ashadhi) साजरी होत आहे. त्यासाठी, हजारो दिंड्या पंढरपूरकडे रवाना झाल्या असून महाराष्ट्राच्या कानाकोपऱ्यातून वारकरी देखील मजल दरमजल करत वारीत सहभागी झाले आहेत. मानाच्या पालख्यांचे देखील पंढरीच्या दिशेने प्रस्थान झाले असून श्री संत तुकाराम महाराज, श्री संत ज्ञानेश्वर महाराज, श्री संत मुक्ताई, श्री संत गजानन महाराजांच्या पालख्याही आता पंढरपूरजवळ (Pandhapur) पोहोचत आहेत. या वारीत, दिंडीत सर्वकाही विसरुन भाविक तल्लीन होऊन विठुनामाचा जप करत आहेत. विशेष म्हणजे दृष्टिहीनांची विठ्ठल भक्ती देखील याची देही याची डोळा पाहायला मिळत असून संत सूरदास महाराज दिव्यांग बांधवांचीही 450 किमीची पायी वारी सुरू आहे.

आषाढीसाठी विठ्ठलाच्या दर्शनाची ओढ मनी घेऊन तब्बल 450 किलोमीटरचा पायी प्रवास करत दृष्टिहीन वारकरी पंढरीच्या वाटेवर निघाले आहेत. धाराशिव जिह्यातील कळंब शहरात दाखल होताच, स्थानिकांकडून त्यांचे स्वागत करण्यात आले. विठ्ठल भक्तीला डोळ्यांची नव्हे तर श्रद्धेची दृष्टी लागते, याचा प्रत्यय देणारी वाशिम येथील संत सूरदास महाराज दिव्यांग पायी वारी आज धाराशिव जिल्ह्यातील कळंब शहरात दाखल झाली. आषाढी एकादशी निमित्त विठ्ठलाच्या दर्शनासाठी निघालेल्या या दिंडीत 15 दृष्टिहीन वारकरी आणि त्यांच्या सेवेसाठी 5 स्वयंसेवक सहभागी आहेत. तब्बल 450 किलोमीटरचा पायी प्रवास करत हे वारकरी मजल-दरमजल पंढरपूरच्या दिशेने वाटचाल करत आहेत.

आपल्याला डोळ्यांनी विठ्ठल पाहता येत नसला तरी अंतःकरणातील अखंड श्रद्धा, नामस्मरण आणि भक्तीच्या बळावर हे वारकरी पंढरीची वाट चालत असून, त्यांच्या जिद्दीचा आणि भक्तीभावाचा हा प्रवास अनेकांसाठी प्रेरणादायी ठरत आहे.

हेही वाचा

जयंत पाटलांवर आगपाखड करणाऱ्या सुरेश धसांना मेहबुब शेख यांनी शिंगावर घेतलं, म्हणाले, 'तुम्ही देवस्थानाच्या जमिनी....'

ATS Action In Pune And Solapur: पुण्यातील 60 जणांच्या घरावर एकाचवेळी छापे; महाराष्ट्र एटीएसची सगळ्यात मोठी कारवाई, सोलापुरमधून एकाला अटक

मिकी घई, एबीपी माझा — Tue, 14 Jul 2026 13:16:42 +0530

ATS Action In Pune And Solapur: महाराष्ट्र दहशतवाद विरोधी पथकाने (ATS) पुणे शहर, पुणे ग्रामीण आणि पिंपरी-चिंचवड परिसरात मोठी छापेमारी सुरू केली आहे. पाकिस्तानी गँगस्टर शहजाद भट्टी (Shahzad Bhatti) आणि त्याच्या कथित आयएसआय (ISI) संपर्कांच्या अनुषंगाने 60 हून अधिक संशयित व्यक्तींवर एटीएसची नजर असून, त्यांच्या घरांवर एकाचवेळी छापे टाकण्यात आले आहेत.

प्राथमिक माहितीनुसार, आयएसआयकडून शहजाद भट्टीच्या माध्यमातून भारतातील काही तरुणांना देशविरोधी कारवायांसाठी प्रवृत्त करण्याचा प्रयत्न होत असल्याचा एटीएसला संशय आहे. त्याच अनुषंगाने या संशयितांची चौकशी आणि पुरावे गोळा करण्याचे काम सुरू आहे. यापूर्वीही काही दिवसांपूर्वी राज्यातील विविध भागांत एटीएसने याच प्रकरणाशी संबंधित छापेमारी केली होती. त्यानंतर आता पुन्हा एकदा एटीएसने राज्यभर कारवाईची मोहीम तीव्र केली असून, पुणे जिल्ह्यातील 60 हून अधिक ठिकाणी एकाचवेळी छापेमारी सुरू असल्याची माहिती समोर येत आहे. (ATS Action In Pune)

संशयास्पद आर्थिक व्यवहारप्रकरणी सोलापुरातील NGO वर ATS ची कारवाई; एका पदाधिकाऱ्याला अटक- (ATS Action In Solapur)

सोलापूरातील एका स्वयंसेवी संस्थेच्या (NGO) संशयास्पद आर्थिक व्यवहारांप्रकरणी मुंबई दहशतवाद विरोधी पथकाने (ATS) मोठी कारवाई केली आहे. धर्मादाय आयुक्त कार्यालयात अधिकृत नोंदणी न करता संस्थेने तब्बल 10 कोटी रुपयांची देणगी गोळा केल्याचा आरोप असून, या प्रकरणी संस्थेच्या तीन पदाधिकाऱ्यांविरोधात गुन्हा दाखल करण्यात आला आहे. तपासात संस्थेने चुकीचे नोंदणी क्रमांक वापरून आयकर विभाग, देणगीदार आणि शासनाची फसवणूक केल्याचे समोर आल्याचे सांगण्यात आले आहे. या तिघांपैकी एका पदाधिकाऱ्याला ATS ने अटक केली असून, त्याच्या मोबाईलमध्ये 50 हून अधिक पाकिस्तानी नागरिकांचे संपर्क क्रमांक आढळल्याची माहिती तपास यंत्रणांनी न्यायालयात दिली आहे.

सोलापुरातील ही संस्था सुरू करण्यासाठी एका परदेशी संस्थेकडून 8 लाख रुपयांची देणगी मिळाल्याचेही तपासात समोर आले आहे. संबंधित परदेशी संस्थेचीही ATS मार्फत चौकशी करण्यात आली असून, त्या संस्थेच्या 15 बँक खात्यांतून तब्बल 126 कोटी रुपयांचे आर्थिक व्यवहार झाल्याचे उघड झाले आहे. या पार्श्वभूमीवर सोलापुरातील संस्था आणि संबंधित परदेशी संस्थेकडे जमा झालेला निधी नेमका कशासाठी वापरला गेला, तसेच या पैशाचा वापर देशविघातक कृत्यांसाठी झाला का, या सर्व बाबींचा सखोल तपास मुंबई ATS करत आहे. दरम्यान, या प्रकरणातील अटकेत असलेल्या एका पदाधिकाऱ्याचा नियमित जामीन अर्ज तसेच अन्य दोन पदाधिकाऱ्यांचे अटकपूर्व जामीन अर्ज सोलापूर जिल्हा न्यायालयाने फेटाळून लावले आहेत. ही माहिती सोलापूरचे प्रमुख जिल्हा सरकारी वकील ॲड. प्रदीपसिंग राजपूत यांनी दिली.

राज्यासह देश-विदेशातील महत्वाच्या घडामोडी, VIDEO:

Tukaram Mundhe FDA Nagpur: नागपूरमधील तीन बड्या हॉटेल्सवर एफडीएची कारवाई, किचनमध्ये प्रचंड अस्वच्छता अन् उंदरांचं साम्राज्य

तुषार कोहळे — Tue, 14 Jul 2026 08:09:55 +0530

Tukaram Mundhe FDA Nagpur: अन्न व औषध प्रशासन (FDA) विभागाचे आयुक्त तुकाराम मुंढे (Tukaram Mundhe) यांच्या कारवाईचा धडाका सुरूच असून भेसळ करणाऱ्यांचे धाबे चांगलेच दणाणले आहेत. याच तुकाराम मुंढेंच्या कारवाईचा 'इफेक्ट' (Tukaram Mundhe Effect) आता उपराजधानी नागपुरात (Nagpur News) पाहायला मिळाला आहे. किचनमध्ये अस्वच्छता आढळल्याने अन्न व औषध प्रशासन विभागाच्या पथकाने नागपूरमध्ये तीन बड्या हॉटेलचे परवाने रद्द केले आहते. यात काटोल रोडवरील इंडियन तंदूर, द हट फॅमिली रेस्टोरेंट जगदीशनगर आणि फॅमिली गार्डन रेस्टोरेंट, फेटरी या तीन हॉटेल्सचा समावेश आहे. अन्न व औषध प्रशासन विभागाच्या तपासणीत या हॉटेलच्या किचनमध्ये मोठयाप्रमाणं उंदीर आढळून आले, सोबतच घाणीचे साम्राज्य देखील होते. त्यामुळे विभागाने तात्काळ कारवाईचा बडगा उगारत हॉटेलचे परवाने रद्द केले आहते. (FDA Actions in Nagpur)

Nagpur News: वाढदिवसाच्या पार्टीत आरॊ कॅनचे पाणी पिल्याने 30 जणांना उलटया आणि मळमळचा त्रास

दुसरीकडे, नागपूर शहरात एका वाढदिवसाच्या पार्टीत आरॊ कॅनचे पाणी पिल्याने 30 जणांना उलटया आणि मळमळचा त्रास झाल्याचे समोर आलं आहे. सुरवातीला पालिकेच्या पाण्यामुळे हे घडले असावे असा संशय होता, मात्र वापरलेल्या आरो कॅनच्या पाण्याची तपासणी केली असता या कॅनच्या पाण्यामुळेच हा प्रकार झाल्याचे तपासणीत पुढे आले आहे. नागपूरच्या हनुमान नगर परिसरातील एका सभागृहात झालेल्या कार्यक्रमात हा प्रकार घडला आहे.

Dharashiv FDA : आठवडाभरानंतरही धाराशिव मधील दूध भेसळ प्रकरणातील सर्व आरोपी मोकाट

धाराशिवच्या भूममध्ये अन्न व औषध प्रशासनाने 7 जुलै रोजी मोठी कारवाई करत दूध भेसळीची 61 गोण्या पावडर जप्त करत सात जणांवर गुन्हा दाखल केला. मात्र यातील आरोपींना अद्याप अटक करण्यात आलेली नाही. बेकायदेशीर रित्या साठवून ठेवलेल्या व्हे पावडर आणि व्हे परमिएट जप्त करण्यात आले असून पावडर विक्री करणाऱ्यासह खरेदी करणारेही मोकाट असल्याचे चित्र आहे. सोलापूरच्या अकलूजमधून पावडर आणून भूममधील विविध दूध संकलन केंद्रात पुरवठा केला जात होता. भूममधील मधुबन ट्रेडिंग कंपनीचे बाळासाहेब गोडगे यांच्यासह सात जणांनी विरोधात गुन्हा दाखल करण्यात आला. मात्र दुधाचे प्रमाण आणि फॅट वाढवण्यासाठी पावडरचा वापर केला जात असल्याचा आरोप आहे. अन्न व औषध प्रशासन विभागाच्या तक्रारीनंतर भूम पोलिसात गुन्हा दाखल करण्यात आला असला तरी आरोपी अद्याप मोकाट असल्याने अटकेची कारवाई नेमकी कधी होणार याकडे लक्ष लागले आहे.

Whey powder : व्हे पावडर म्हणजे काय ?

दूध फाटल्यानंतर किंवा दुधापासून चीज पनीर अथवा चक्का बनवताना जे पाणी उरतो त्याला व्हे म्हणतात. हे पाणी सुकवून त्याची पावडर तयार होते. तिला व्हे पावडर म्हणतात. यामध्ये प्रथिने जास्त असते.

Solapur : विहिरीतील मुरूम वाहतुक आणि वापराची परवानगी देण्यासाठी 1 लाख रुपयाची लाच; मंडळ अधिकाऱ्यावर गुन्हा

विहिरीतील मुरूम वाहतुक आणि वापराची परवानगी देण्यासाठी 1 लाख रुपयाची लाच मागितल्याप्रकरणी सोलापुरातील एका मंडळ अधिकाऱ्यावर गुन्हा नोंद करण्यात आलाय. विजयकुमार माने असे गुन्हा दाखल झालेल्या अधिकाऱ्याचे नाव आहे. उत्तर सोलापूर तालुक्यातील बेलाटी गावात शेतातल्या विहीर खोदकामातून निघालेला मुरूमच्या वाहतुकीसाठी आणि वापरायची परवानगी मिळण्यासाठी तक्रारदाराने तहसीलदराकडे अर्ज केला होता. या अर्जावर कार्यवाही करण्यासाठी उत्तर सोलापूर तालुक्यातील मंडळ अधिकारी विजयकुमार माने यांना स्थळ पाहणी करून अहवाल सादर करण्याचे आदेश देण्यात आले होते. या प्रक्रियेदरम्यान स्थळ पाहणी करून सकारात्मक अहवाल देण्यासाठी विजयकुमार माने यांनी रॉयल्टी व्यतिरिक्त 1 लाख रुपयांची मागणी केली. मात्र तक्रारदाराने या प्रकरणाची तक्रार सोलापूरच्या लाच लुचपत प्रतिबंधक विभागाकडे तक्रार केली. तक्रारीची पडताळणी केल्यानंतर मंडळ अधिकारी विजयकुमार माने यांच्यावर गुन्हा नोंद करण्यात आलाय.

इतर महत्वाच्या बातम्या

Solapur Crime: उत्पादन शुल्क विभागाचा सोलापूरमध्ये ट्रॅप, 700 बॉक्स बनावट व्हिस्की भरलेला ट्रक सापडला

सुनील दिवाण, एबीपी माझा — Mon, 13 Jul 2026 14:40:03 +0530

Solapur Crime: उत्पादन शुल्क विभागाचा सोलापूरमध्ये ट्रॅप, 700 बॉक्स बनावट व्हिस्की भरलेला ट्रक सापडला

वारकऱ्यांसाठी आनंदीची बातमी! आषाढीला पंढरपुरात येणाऱ्या वारकऱ्यांसाठी ST महामंडळाची नवीन योजना, मंत्री सरनाईकांची माहिती

सुनील दिवाण, एबीपी माझा — Sun, 12 Jul 2026 18:16:05 +0530

Ashadhi Wari 2026 : आषाढी वारी (Ashadhi Wari 2026) जवळ आली आहे. सर्व संताच्या पालख्या पंढरीच्या दिशेनं मार्गस्थ होत आहेत. लाखो भाविक पालख्यांसोबत विठु नामाचा ज्ञानोबा माऊलींचा गजर करण्यात दंग आहेत. अशातच आषाढी वारीला पंढरपूरला येणाऱ्या वारकऱ्यांसाठी एक आनंदीचा बातमी समोर आली आहे. विठ्ठल भक्तांसाठी एसटी महामंडळानं एक नवी योजना जाहीर केली आहे. आषाढी वारीला पंढरपूर जाण्यासाठी 40 वारकरी जर एकत्र आले तर त्यांना विशेष बस देण्यात येणार आहे. मंत्री प्रताप सरनाईक (Minister Pratap Sarnaik) यांनी याबाबतची माहिती दिली आहे.

आषाढी वारीसाठी 5 हजार 500 बसेस आणि 11 हजार कर्मचारी

आषाढी वारीसाठी (Ashadhi Wari 2026) पंढरपुरात चार बस स्थानके करण्यात आली आहेत. तर 5 हजार 500 बसेस आणि 11 हजार कर्मचारी देण्यात आले आहेत. आषाढी वारीमध्ये येणाऱ्या वारकऱ्यांसाठी एसटी महामंडळाने एक नवी योजना पुढे आणली आहे. 40 वारकरी एकत्र आले तर त्यांच्यासाठी विशेष एसटी बस महामंडळाकडून दिली जाणार आहे. तर यंदाच्या वारीसाठी पंढरपुरात चार बस स्थानके 5500 बसेस आणि 11 हजार चालक आणि वाहक वारकऱ्यांच्या सेवेसाठी असतील. यंदा प्रथमच वारीमध्ये चांगले काम करणाऱ्या एसटी कर्मचाऱ्याचे प्रगती पुस्तकही तयार केले जाणार आहे. याच बाबत राज्याचे परिवहन मंत्री प्रताप सरनाईक यांनी आज पंढरपुरात येऊन एसटी बस स्थानकाची पाहणी करून महामंडळाच्या सर्व विभागांची बैठक घेऊन आषाढीचे नियोजन केले. तसेच वारकऱ्यांना सेवा सुविधा देण्याबाबत महामंडळ प्रयत्नशील असल्याचे सांगितले. आषाढी वारीला पंढरपूरला येणाऱ्या वारकऱ्यांना कोणताही त्रास होऊ नये, यासाठी विशेष बस सोडण्यात आल्या आहेत.

संजय राऊत सकाळी उठल्यापासूनच खरी संशयाला सुरुवात होत असते

खासदार संजय राऊत सकाळी उठल्यापासूनच खरी संशयाला सुरुवात होत असते. त्यामुळे संजय राऊत यांनी आपले मित्र असणारे विनायक राऊत यांच्या बद्दल कुठलाही प्रकारचा संशय व्यक्त करू नये. असे आपणास वाटते. हा राजकारणाचा भाग जरी असला तरी एखाद्या व्यक्तीच्या कौटुंबिक विषयावर न बोलणे अधिक उचित आहे. अशी प्रतिक्रिया राज्याचे परिवहन मंत्री प्रताप सरनाईक यांनी पंढरपुरात दिली आहे. माजी खासदार विनायक राऊत यांच्यावर त्यांच्या सुनेने आरोप केल्यानंतर परिवहन मंत्री सरनाईक यांनी कौटुंबिक विषयावर बोलणे टाळले. मात्र ठाण्यात गुन्हा दाखल झाला याबाबत संशय व्यक्त केलेल्या संजय राऊत यांच्यावर मात्र टोलेबाजी केली.

Pandharpur : पंढरपुरात हजारो सायकलस्वारांची दिंडी, रिंगण करत हरिनामाचा जयघोष, पंढरी दुमदुमली

सुनील दिवाण, एबीपी माझा — Sun, 12 Jul 2026 15:02:42 +0530

Pandharpur : पंढरपुरात हजारो सायकलस्वारांची दिंडी, रिंगण करत हरिनामाचा जयघोष, पंढरी दुमदुमली

Solapur Crime News: 74 मिनिटे ट्रेन थांबली संधी साधत दरोडेखोर घुसले; महिलेची 5 तोळ्यांची चैन ओढली, दगडफेकीत प्रवासी जखमी, यशवंतपूर-बिकानेर एक्स्प्रेसमध्ये पहाटेच्या सुमारास थरार

आफताब शेख, एबीपी माझा — Sun, 12 Jul 2026 10:21:40 +0530

सोलापूर: महाराष्ट्र-कर्नाटक सीमेवरील तडवळ रेल्वे स्थानकावर उभ्या असलेल्या यशवंतपूर-बिकानेर एक्स्प्रेसवर (Solapur Crime News) शनिवारी पहाटेच्या सुमारास दरोडा पडल्याची धक्कादायक घटना (Solapur Crime News) समोर आली आहे. ४ ते ५ अज्ञात दरोडेखोरांनी रेल्वेच्या डब्यांमध्ये घुसून महिलांसह प्रवाशांना बेदम मारहाण केली आणि सोन्याचे दागिने, रोख रक्कम व मोबाईल लंपास केले. या थरारक घटनेमुळे रेल्वे प्रवाशांमध्ये भीतीचे वातावरण पसरले आहे.(Solapur Crime News)

Solapur Crime News: ७४ मिनिटे गाडी थांबल्याचा साधला फायदा

यशवंतपूर-बिकानेर एक्स्प्रेस शनिवारी पहाटे २.४९ ते ४.०३ या कालावधीत तांत्रिक कारणांमुळे तडवळ स्थानकावर तब्बल ७४ मिनिटे उभी होती. याच संधीचा फायदा घेत ४ ते ५ अज्ञात दरोडेखोरांनी रेल्वेच्या एस-४ (S-4), एस-६ (S-6) आणि एस-७ (S-7) या डब्यांमध्ये प्रवेश केला. काही दरोडेखोरांनी थेट डब्यात घुसून, तर काहींनी खिडकीतून हात घालून प्रवाशांना लुटण्यास सुरुवात केली.(Solapur Crime News)

Solapur Crime News: विरोध करणाऱ्या प्रवाशांवर दगडफेक; राजस्थानचा प्रवासी जखमी

लूटमारी दरम्यान दरोडेखोरांना विरोध करण्याचा प्रयत्न करणाऱ्या प्रवाशांना त्यांनी बेदम मारहाण केली. प्रवाशांनी आरोपींना पकडण्याचा प्रयत्न केला असता, दरोडेखोरांनी त्यांच्यावर दगडफेक केली. या हल्ल्यात 'एस-६' कोचमधील सीट क्रमांक ५३ वरून प्रवास करणारे कालूराम भाटी (रा. पाली, राजस्थान) यांच्या नाकाला गंभीर दुखापत झाली. त्यांच्या चेहऱ्यावरून मोठ्या प्रमाणावर रक्तस्त्राव सुरू होता, त्यांच्यावर आरपीएफने (RPF) तातडीने प्राथमिक उपचार केले.

Solapur Crime News: ५ तोळ्यांची सोन्याची चैन लंपास

या घटनेत 'एस-७' डब्यातून प्रवास करणारे सोलापूरचे प्रवासी महेश गोपाळ पवार (वय ३४, रा. पूर्व मंगळवार पेठ) यांच्या पत्नीच्या गळ्यातील ५ तोळे वजनाची (किंमत सुमारे १ लाख ४३ हजार ५०० रुपये) सोन्याची चैन दरोडेखोरांनी हिसकावून नेली. याशिवाय इतर तीन प्रवाशांचे मोबाईल, रोख रक्कम आणि मौल्यवान साहित्यही लुटले गेले. दरोडा पडल्यानंतर डब्यातील प्रवाशांनी आरडाओरडा करत मदतीची याचना केली.

Solapur Crime News: रेल्वे पोलीस आणि प्रशासन ॲक्शन मोडवर

रेल्वेच्या मदत क्रमांकावर (Help-line) तक्रार प्राप्त झाल्यानंतर, पहाटे ४.५८ वाजता ही गाडी सोलापूर स्थानकावर पोहोचताच आरपीएफ आणि लोहमार्ग पोलिसांचे पथक दाखल झाले. महेश गोपाळ पवार यांनी दिलेल्या फिर्यादीवरून सोलापूर लोहमार्ग पोलिसांनी अज्ञात दरोडेखोरांविरुद्ध गुन्हा दाखल केला आहे. पोलीस उपनिरीक्षक तांबोळी यांनी फॉरेन्सिक पथकासह घटनास्थळाची पाहणी केली असून, रेल्वे पोलीस अज्ञात दरोडेखोरांचा वेगाने शोध घेत आहेत.

Solapur News : तुकाराम मुंढे यांचा धडाका! 37 हजार लिटर भेसळयुक्त दूध जागेवरच ओतलं, सांगोल्यातील 'अजिंक्यराणा' केंद्रावर कारवाई

सुनील दिवाण, एबीपी माझा — Sat, 11 Jul 2026 22:44:38 +0530

सोलापूर : अन्न व औषध प्रशासन (FDA) विभागाचे आयुक्त तुकाराम मुंढे यांच्या कारवाईचा धडाका सुरूच असून भेसळ करणाऱ्यांचे धाबे चांगलेच दणाणले आहेत. याच तुकाराम मुंढेंच्या कारवाईचा 'इफेक्ट' (Tukaram Mundhe Effect) आता सोलापूर जिल्ह्यात पाहायला मिळाला आहे. सांगोला तालुक्यातील जवळा येथील एका दूध संकलन केंद्रावर एफडीएने छापा टाकून तब्बल 37 हजार 532 लिटर भेसळयुक्त दूध जागेवरच नष्ट केलं. या दुधाची किंमत जवळपास 15 लाख इतकी आहे.

एफडीएच्या माध्यमातून सोलापूर जिल्ह्यात झालेली ही आजपर्यंतची सर्वात मोठी आणि धडक कारवाई मानली जात आहे. या कारवाईमुळे दुग्ध व्यवसायात भेसळ करणाऱ्या माफियांचे धाबे दणाणले आहेत.

Solapur Tukaram Mundhe FDA Action : 'अजिंक्यराणा मिल्क इंडस्ट्रीज'वर छापा

सांगोला तालुक्यातील जवळा येथे 'अजिंक्यराणा मिल्क इंडस्ट्रीज' (Ajinkyaraana Milk Industries) नावाचं एक मोठं दूध संकलन केंद्र आहे. या केंद्रामध्ये मोठ्या प्रमाणावर दुधात भेसळ केली जात असल्याची गोपनीय माहिती अन्न व औषध प्रशासन विभागाला मिळाली होती. या माहितीच्या आधारे एफडीएच्या पथकाने या केंद्रावर अचानक छापा टाकला.

या छाप्यात तब्बल 15 लाख रुपये किमतीचा 37 हजार 532 लिटर भेसळयुक्त दुधाचा साठा जप्त करण्यात आला. दुधाचा हा अवाढव्य साठा मानवी आरोग्यासाठी अत्यंत घातक असल्याचं समोर आल्याने अधिकाऱ्यांनी कोणताही वेळ न घालवता हा संपूर्ण साठा जागेवरच नष्ट केला.

Sangola Milk Adulteration : दूध केंद्र तातडीने बंद करण्याचे निर्देश

एफडीएच्या अधिकाऱ्यांनी दिलेल्या माहितीनुसार, या कारवाईदरम्यान जप्त करण्यात आलेल्या दुधाचे एकूण चार वेगवेगळे नमुने (Samples) अधिकृत प्रयोगशाळेत तपासणीसाठी पाठवण्यात आले आहेत. या तपासणीचा अहवाल आल्यानंतर संबंधित दोषींवर कडक कायदेशीर आणि फौजदारी कारवाई केली जाणार आहे.

नागरिकांच्या आरोग्याशी होणारा हा खेळ थांबवण्यासाठी अन्न व औषध प्रशासनाने हे 'अजिंक्यराणा दूध संकलन केंद्र' तातडीने बंद करण्याचे कडक निर्देश दिले आहेत. दुग्धजन्य पदार्थांमध्ये किंवा दुधात कोणत्याही प्रकारची भेसळ सहन केली जाणार नाही आणि यापुढेही अशा कारवाया अधिक तीव्र केल्या जातील, असा इशारा एफडीए प्रशासनाने दिला आहे. तुकाराम मुंढेंच्या कारवाईच्या भीतीने राज्यभरातील भेसळखोरांचे धाबे मात्र आता चांगलेच दणाणले आहेत.

ही बातमी वाचा:

Tukaram Mundhe : सडलेले दुग्धजन्य पदार्थ, ब्रेड अन् खाद्यपदार्थ ताब्यात, आऊटलेटला टाळे ठोकले; तुकाराम मुंढेंच्या FDA ची ठाण्यातील नौपाडात मोठी कारवाई