सातारा : सातारा नगरपालिकेच्या निवडणुकीसाठी भाजपनं नगराध्यक्षपदाचे उमेदवार म्हणून अमोल मोहिते यांचं नाव जाहीर केलं आहे. सातारा नगरपालिका निवडणुकीत खासदार उदयनराजे भोसले आणि मंत्री शिवेंद्रसिंहराजे भोसले यांच्याकडून भाजप म्हणून रिंगणात उतरण्याचा निर्णय घेण्यात आला होता. त्यानंतर साताऱ्याच्या थेट नगराध्यक्ष पदासाठी उमेदवार कोणत्या गटाचा असणार याबाबत चर्चा सुरु होत्या. नगराध्यक्षपद कोणाकडे असावं यासाठी शिवेंद्रसिंहराजे भोसले आणि उदयनराजे भोसले यांच्यात चर्चेच्या फेऱ्या सुरु होत्या. त्यानंतर नगराध्यक्षपदासाठी उमेदवारी कोणाला द्यायची यासंदर्भातील निर्णय मुख्यमंत्री देवेंद्र फडणवीस यांच्याकडे सोपवण्यात आला होता.
अमोल मोहितेंना उमेदवारी, उदयनराजे भोसलेंच्या भूमिकेकडे लक्ष
सातारा नगरपालिकेच्या नगराध्यक्ष पदाच्या उमेदवारीचा तिढा सुटला आहे.साताऱ्यात नगराध्यक्ष पदाच्या उमेदवारीसाठी मंत्री शिवेंद्रसिंहराजे भोसले यांच्या गटाचे माजी नगराध्यक्ष अमोल मोहिते यांचे नाव भाजप कडून जाहीर झाले आहे..सातारा नगराध्यक्ष पदावरून खासदार उदयनराजे भोसले आणि मंत्री शिवेंद्रसिंहराजे भोसले यांच्यात रस्सीखेच सुरू होती. त्यामुळं भाजप वरिष्ठांकडे नगराध्यक्ष पदाचा चेंडू गेला होता. भाजप कडून अमोल मोहिते यांचे नाव जाहीर झाल्याने खा.उदयनराजे भोसले काय भूमिका घेतात याकडे सर्वांचे लक्ष लागलं आहे.
थेट नगराध्यक्षपदाच्या निवडणुकीत यापूर्वी उदयनराजेंच्या गटाला यश
सातारा नगरपालिकेच्या गेल्या 30 वर्षात दोन वेळा थेट नगराध्यक्षपदासाठी निवडणुका झाल्या होत्या. त्या निवडणुकांमध्ये खासदार उदयनराजे भोसले यांच्या सातारा विकास आघाडीनं शिवेंद्रसिंहराजे भोसले यांच्या नगरविकास आघाडीचा पराभव केला होता. सातारा विकास आघाडीच्या रंजना रावत एकदा थेट नगराध्यक्ष बनल्या होत्या.
2016 मध्ये झालेल्या थेट नगराध्यक्षपदाच्या निवडणुकीत उदयनराजे भोसले आणि शिवेंद्रसिंहराजे भोसले मनोमिलन तुटल्यानंतर सातारा विकास आघाडी आणि नगरविकास आघाडी आमने सामने आले होते. सातारा विकास आघाडी कडून उदयनराजे भोसले यांनी थेट नगराध्यक्ष म्हणून माधवी कदम यांना उमेदवारी दिली होती. तर, नगरविकास आघाडीकडून शिवेंद्रसिंहराजे भोसले यांच्या पत्नी वेदांतिकाराजे भोसले रिंगणात होत्या. या निवडणुकीत माधवी कदम यांनी वेदांतिकाराजे भोसले यांचा पराभव केला होता.
आता दोन्ही राजे एकत्र, भाजप म्हणून रिंगणात
सातारा विकास आघाडी आणि नगरविकास आघाडी म्हणून निवडणूक न लढवता उदयनराजे भोसले आणि शिवेंद्रराजे भोसले यांचे समर्थक भाजप म्हणून निवडणूक लढवणार आहेत. सातारा नगरपालिकेची सदस्यसंख्या 50 असून उदयनराजे भोसलेंच्या गटाला 22, शिवेंद्रसिंहराजेंच्या गटाला 22 आणि मूळ भाजपला 6 जागा असा फॉर्म्युला चर्चेत होता.
दरम्यान, महाविकास आघाडीकडून राष्ट्रवादी काँग्रेस शरदचंद्र पवार पार्टीकडून थेट नगराध्यक्षपदासाठी उमेदवार दिला जाणार आहे. त्यांच्याकडून कोणाला उमेदवारी मिळते ते पाहावं लागेल.