Satara Crime: सातारा जिल्ह्यातील फलटण उपजिल्हा रुग्णालयात कार्यरत महिला डॉक्टरने गुरुवारी रात्री आपले जीवन संपवल्याची धक्कादायक घटना उघडकीस आली आहे. या डॉक्टरने भाऊबीजेच्या दिवशी फलटणमधील एका नामांकित हॉटेलच्या बंद खोलीत रात्री साडे दहा वाजेच्या सुमारास आत्महत्या केली. मात्र आता या आत्महत्या प्रकरणाला धक्कादायक वळण लागलंय. महिलेवर पोलिसाने अत्याचार केल्याचा प्रकार उघडकीस आलाय. तर या प्रकरणी महिलेच्या काकांनी आणि आतेभावाकडून गंभीर आरोप केले जात आहेत. काकांच्या आरोपानुसार, पुतणीवर शवविच्छेदन अहवाल बदलण्यासाठी दबाव आणला जात होता, ज्यामुळे ती मानसिक तणावाखाली होती. डॉक्टरने आपल्या वरिष्ठांना आणि नातेवाईकांना वारंवार सांगितले होते की, “तणावामुळे माझे आयुष्य संपवावे लागेल,” असे त्यांनी म्हटले आहे. तर आतेभावाने महिलेला फोन करणारे फलटण भागातील खासदार होते, असा आरोप केलाय.
Satara Crime: मृत महिला डॉक्टरच्या आत्येभावाचा खळबळजनक आरोप
महिला डॉक्टरचे आतेभाऊ म्हणाले की, फक्त खासदार इतकाच उल्लेख आहे. नाव कोणाचेही नाही खासदारांच्या पीएने खासदारांना फोन लावून दिला आणि त्यानंतर मॅडम त्यांच्याशी बोलल्या होत्या. हे खासदार फलटण भागातील आहेत. पोस्टमार्टम रिपोर्ट बदलण्यासाठी दबाव टाकला जात होता. याबाबत बहिणीशी चर्चा झालेली नाही. महिलेची दुसरी चुलत बहीण मेडिकल ऑफिसर आहे तिला काही दिवसांपूर्वी महिलेने दबाव येत असल्याबाबत सांगितले होते. त्यानंतर आत्महत्या केल्यानंतरच आम्हाला समजले. बहिणीने दोन-तीन महिन्याआधी तक्रार देऊन देखील त्यावर कुठलीही कारवाई झालेली नाही, असा आरोप त्यांनी केलाय.
नेमकं प्रकरण काय? (Satara Doctor Crime News)
सातारा जिल्ह्यातील फलटण उपजिल्हा रूग्णालयात महिला डॉक्टरने आत्महत्या केलीय. मात्र आता या आत्महत्या प्रकरणाला धक्कादायक वळण लागलंय. मृत डॉक्टरच्या हातावर सुसाईड नोट आढळली आहे. या सुसाईड नोटमध्ये महिला डॉक्टरने आपल्यावर बलात्कार झाल्याचं लिहिलंय. त्यात त्यांनी पोलीस निरीक्षक गोपाल बदनेचं नाव लिहीलंय. पोलीस निरीक्षक बदनेनं चारवेळा बलात्कार केल्याचं सुसाईड नोटमध्ये लिहिलंय. तसंच पोलीस प्रशांत बनकर यानेही मानसिक त्रास दिल्याचं सुसाईड नोटमध्ये म्हटलंय. काही महिन्यांपासून त्या पोलीस आणि आरोग्य विभागातील वादात अडकल्या होत्या अशी माहिती समोर येतेय. वैद्यकीय तपासणीसंदर्भात पोलिसांशी वादानंतर त्यांची चौकशी सुरू होती असं समजतंय. मात्र डॉक्टरच्या मृतदेहाच्या हातावर थेट सुसाईड नोट आढळलीय. त्यात त्यांनी पोलिसानेच बलात्कार झाल्याचं नमूद करत आत्महत्या केल्याचं म्हटलंय.
आणखी वाचा