सातारा : युनेस्कोच्या 'वर्ल्ड हेरिटेज' (World Heritage) यादीत नोंद असलेल्या साताऱ्याच्या जगप्रसिद्ध कास पुष्प पठारावर (Kaas Pathar) सध्या मुसळधार पाऊस आणि धुक्याचा अद्भुत संगम पाहायला मिळत आहे. फुलांचा अधिकृत हंगाम सुरू होण्यासाठी अद्याप काही दिवसांचा कालावधी शिल्लक असतानाच, कास पठारावर 'रानहळद' (चवर) आणि 'वाय तुरा' या प्रजातीच्या फुलांचा मोठा बहर आला आहे. रानहळदीच्या पांढऱ्याशुभ्र फुलांमुळे सध्या संपूर्ण कास पठार पांढरी चादर पांघरल्यासारखे सुंदर दिसत आहे.
दरवर्षी कास पठारावर 150 हून अधिक दुर्मिळ व रंगीबेरंगी प्रजातींची फुले फुलतात. यंदा ऑगस्ट महिन्याच्या शेवटी फुलांचा मुख्य हंगाम पूर्ण क्षमतेने सुरू होईल, असा अंदाज निसर्गप्रेमी आणि कास पठार कार्यकारी समितीकडून व्यक्त केला जात आहे.
Kaas Pathar Tourism Safety : सुरक्षा जाळीचे काम अंतिम टप्प्यात
कास पठारावरील दुर्मिळ वनस्पती आणि फुलांचे पर्यटकांपासून संरक्षण व्हावे, यासाठी प्रशासनाकडून विशेष खबरदारी घेतली जात आहे. पठाराच्या दोन्ही बाजूला सुरक्षेसाठी जाळी (Safety Netting) लावण्याचे काम सध्या अंतिम टप्प्यात आले आहे. पर्यटकांना फुलांचा आनंद घेता यावा आणि वनस्पतींचे नुकसानही होऊ नये, यादृष्टीने कास पठार समितीच्या वतीने विशेष नियोजन करण्यात आले आहे.
Nature's Beauty Kaas Pathar : पाऊस आणि धुक्यामुळे निसर्गसौंदर्य बहरले
सध्या कास पठार परिसरात सुरु असलेल्या मुसळधार पावसामुळे निसर्गसौंदर्य अधिकच खुलले आहे. हिरव्यागार गालिच्यावर रानहळदीची पांढरीशुभ्र फुले आणि वाय तुरा फुलांची उधळण पाहण्यासाठी स्थानिकांसह पर्यटकांची पावले कास पठाराकडे वळू लागली आहेत.
Kaas Pathar Tourist Season : कास समितीचा विशेष आढावा
हंगामाच्या पार्श्वभूमीवर कास पठार कार्यकारी समितीने सर्व सोयी-सुविधांचा सविस्तर आढावा घेतला आहे. पर्यटकांची गर्दी नियंत्रण, पार्किंग व्यवस्था, गाईड्सची उपलब्धता आणि पठाराचे संरक्षण या सर्व बाबींवर विशेष भर दिला जात असून ऑगस्ट अखेरपासून कास पठार पर्यटकांसाठी पूर्णपणे सज्ज होणार आहे.
ही बातमी वाचा: