Uday Samant on Manoj Jarange Patil : मराठा आंदोलक मनोज जरांगे पाटील ( Manoj Jarange Patil ) यांचे अंतरवाली सराटीत आमरण उपोषण सुरु झाले आहे. आज त्यांच्या उपोषणाचा दुसरा दिवस आहे. दरम्यान, यावर राज्याचे उद्योग मंत्री उदय सामंत (Uday Samant) यांनी प्रतिक्रिया दिली आहे. मनोज जरांगे पाटील यांची उद्या किंवा परवा मी भेट घेणार आहे. पुढच्या 24 तासात योग्य निर्णय घेऊ असं मोठं वक्तव्य मंत्री उदय सामंत यांनी केलं आहे. शासन मराठा समाजाच्या मागण्यांसोबत आहे. मागण्या पूर्ण व्हाव्यात यासाठी मी जरांगे यांच्या संपर्कामध्ये असल्याचे सामंत म्हणाले.
मनोज जरांगे पाटलांनी एकनाथ शिंदेंबद्दल वाईट बोलू नये, गैरसमज दूर करावा
माझे मित्र म्हणून, तसेच आमचे संबंध राजकारणाच्या आंदोलनाच्या पलीकडचे आहेत. म्हणूनच मी त्यांना विनंती करेन कोणाच्या गैरसमजा मधून एकनाथ शिंदे बद्दल वाईट बोलू नये. तसेच मुख्यमंत्री देवेंद्र फडणवीस यांच्या बद्दल देखील वाईट बोल नये. त्यांनी गैरसमज दूर करावा असे सामंत म्हणाले. शासन मराठा समाजाच्या मागण्यांसोबत आहे. मागण्या पूर्ण व्हाव्यात यासाठी मी जरांगे यांच्या संपर्कामध्ये आहे असेही सामंत म्हणाले.
मराठी समाजाला कमी लेखण्याचा कोणताही प्रयत्न शेतकरी मेळाव्यामधून झालेला नाही
मनोज जरागे यांचा उपोषणाचा कार्यक्रम आहे म्हणून उपमुख्यमंत्री एकनाथ शिंदे यांचा मेळावा आयोजित केलेला नव्हता, असा जर जरांगे यांचा गैरसमज झाला असेल तर तो साफ चुकीचा आहे. दोन महिन्यांपासूनच हा युवा संवाद आणि शेतकरी मेळावा आयोजित करण्यात आला होता. सात जुलैला हा कार्यक्रम होता मात्र एकनाथ शिंदे आजारी असल्यामुळे त्या दिवशी हा कार्यक्रम होऊ शकला नाही. कुणालाही काउंटर करण्यासाठी एकनाथ शिंदे यांचा हा कार्यक्रम नव्हता असे सामंत म्हणाले. मराठा आरक्षणाच्या संदर्भात शंका निर्माण करण्यासाठी हा कार्यक्रम घेतला नव्हता. मराठी समाजाला कमी लेखण्याचा प्रयत्न शेतकरी मेळाव्यामधून झालेला नाही असेही सामंत म्हणाले. मनोज जरांगे यांनी खासदार जाधव यांना फोन केला त्यावेळेला हजारो लोक जमले होते. शिंदे साहेबांना हा मेळावा करावा लागल्याचे सामंत म्हणाले.
मनोज जरांगेंनी प्रकृतीची काळजी घेतली पाहिजे असे एकनाथ शिंदेंनी सांगितले
एकनाथ शिंदे यांचा मला काल फोन आला होता. त्यावेळी एकनाथ शिंदेंनी मला सांगितलं आंदोलनात होत राहतील, मागण्या देखील मान्य होतील. परंतू जरांगे यांनी आपल्या प्रकृतीची देखील काळजी घेतली पाहिजे असे सामंत म्हणाले. असं सांगणार नेतृत्व हे शिवसेनेचे नेतृत्व आहे. त्यामुळं जरांगे यांचा गैरसमज निर्माण करण्याचा प्रयत्न केला जातो, तो खोटा आहे. जरांगे यांनी शिंदे यांच्या बाबतीतला गैरसमज दूर करावा. एकनाथ शिंदे यांची भूमिका मराठा समाजाला आरक्षण देणारी ठरली आहे असेही सामंत म्हणाले. खासदार संजय जाधव यांनी देखील वेळोवेळी मनोज जरांगे यांचे समर्थन केलं आहे. एकनाथ शिंदे जरांगे यांच्या प्रकृतीची काळजी घेतात, ते मराठा आरक्षणात अडचण यावं अशी भूमिका कधीच घेणार नाहीत, याची खात्री मनोज जरांगेंनी बाळगावी असे सामंत म्हणाले.