Raigad : पळस्पे–कोन पंचायत समिती गणात भाजपचा दबदबा; जिल्हा परिषद आणि पंचायत समितीचे तीनही उमेदवार विजयी
Panvel Palaspe Election : पळस्पे जिल्हा परिषदेतून भाजपचे राजेंद्र पाटील तर पंचायत समिती गणातून हर्षदा घरत आणि योगिता लहाने यांनी विजय मिळवला आहे.
नवी मुंबई : पनवेल–पळस्पे–कोन पंचायत समिती गणातून भाजपच्या हर्षदा अतुल घरत यांनी दणदणीत विजय मिळवला आहे. घरत यांनी शेकापच्या अस्मिता ढवळे यांच्यावर ६,८२९ मतांनी विजय मिळवला. हा निकाल जाहीर होताच पळस्पे–कोन परिसरात भाजप समर्थकांनी फटाके फोडून, मिठाई वाटून जल्लोष साजरा केला.
रायगड जिल्हा परिषद व पनवेल पंचायत समितीच्या सार्वत्रिक निवडणुकीत पळस्पे–कोन परिसरात भारतीय जनता पक्षाने वर्चस्व सिद्ध केले आहे. पळस्पे–कोन पंचायत समिती गणासह जिल्हा परिषद गट व अन्य पंचायत समिती गणांमध्ये भाजप व मित्रपक्षांच्या उमेदवारांनी दणदणीत विजय मिळवला.
पळस्पे–कोन पंचायत समिती गणातून हर्षदा अतुल घरत यांनी स्पष्ट बहुमताने विजय मिळवला. त्यांना १६,०२४ मते मिळाली, तर प्रतिस्पर्धी उमेदवाराला ९,१९५ मते मिळाली. ४०३ मते ‘नोटा’च्या पारड्यात गेली. एकूण २५,६२२ वैध मते नोंदवण्यात आली.
कोन पंचायत समिती गणातून भाजपच्या योगिता योगेश लहाने यांनी विजय मिळवला. त्यांना ६,२५६ मते मिळाली, तर प्रतिस्पर्धी उमेदवार ५,१०४ मतांवर समाधान मानावे लागले. या गणात १५० मते नोटाला पडली. एकूण ११,५१० वैध मते नोंदवली गेली.
पळस्पे जिल्हा परिषद गट क्रमांक ४ मधून राजेंद्र हरिश्चंद्र पाटील (भाजप) यांनी विजय मिळवला. त्यांना ८,४६० मते मिळाली. शिवसेना उमेदवाराला ४,६८९ मते, तर अन्य उमेदवाराला ७१४ मते मिळाली. २५० मते नोटाला पडली. एकूण १४,११३ वैध मते नोंदवण्यात आली.
तीनही ठिकाणी विजयाची घोषणा होताच पळस्पे–कोन परिसरात जल्लोषाचे वातावरण निर्माण झाले. कार्यकर्ते व समर्थकांनी फटाक्यांची आतषबाजी करत आनंदोत्सव साजरा केला. ढोल-ताशांच्या गजरात विजयी उमेदवारांचे अभिनंदन करण्यात आले.
हर्षदा अतुल घरत यांनी प्रतिक्रिया देताना सांगितले की, हा विजय एखाद्या व्यक्तीचा नसून जनतेच्या विश्वासाचा आहे. दिलेला कौल विकासकामांद्वारे प्रामाणिकपणे पूर्ण करू असा विश्वास त्यांनी व्यक्त केला. तर त्यांचे पती आणि वाहतूक संघटना अध्यक्ष अतुल मारुती घरत यांनीही सर्व मतदार, कार्यकर्ते व हितचिंतकांचे आभार मानत, येत्या काळात विकासाभिमुख व लोकहिताच्या कामांना प्राधान्य दिले जाईल, असा विश्वास व्यक्त केला.या निकालामुळे पळस्पे–कोन परिसरात विकासाच्या नव्या अपेक्षा निर्माण झाल्या असून स्थानिक प्रश्नांना गती मिळेल, अशी भावना नागरिकांत व्यक्त होत आहे.
ही बातमी वाचा:
महत्त्वाच्या बातम्या
